39. Rorêlna Hma ah Isua A Ngîr Thu

A tun hin zânril lai tak a chang. Sipaihei chun Isua chu indon dingin puithiam lal chem ina chun an ṭhui a. Petera chun hla fêka ti aṭang hin a tlîr mai a. Isua chu insûngah a ṭhui lût lai chun Patera chu tuallai ah a ṭhung a, mei lum chu a loi ua a.

Insûnga chun Juda hoituhei chun Isua chu an indon a, thu khêla hêkin hawipuitu telêm tamka an insiam a. Changrawchu an hêkna thu hei raw chu an in ang hoi naw a. Isua thiamloina reng an hmu thei naw a, Isua raw chun ihom a hril nawh.

A tawpa chun puithiam lal chem chun Isua chu a en a, “Ni hril rawh Messia, Pathian dam Nâipa chu ni chang bei?” a ti a.

Isuan a hniangah, “Chang e, rivâna inthoka thilthawtheina nin hong a, Pathian hniangah inṭhungin nila hmu nin tih,” a ti a. Puithiam lal chem chu a ning a thika, a puanhei chu a thlêr a. “Hawipuitu dang reng ei nngai ta nawh, ‘Pathian Nâipa ke chang’ a ti nin hawi ta hih, Inkan mawh nin ngai ve?” ti in ân khêk a.

Juda hruaituhei chun, “Thi thlâk a chang,” an ti a. kachun Isua hmâi chu an tuam pêk a, a hmâiah chil an sâk khum a, an ben a, nuiza siamna in an hmang a.

Tuala chun nupangte khatkan Petera chu a hmu a, “Nang hom hi Isua hnianga om ve ne chang!” a ti a. Petera chun Isua hnianga om a chag loi zia a hril a. Mangka den chun nupangte dangin ân don ve a, Petera chun a panai den han a thung a. A tawpa chun mipuiin, “Galili ram mi ve ve nin chang leiin Isua hnianga om ve ne chang,” an ti a.

“Ma pa hi ki loi hawi chun Pathianin ki chungah ṭongsia intlung rise,” ti in ân tiam a, kachun âr a khuang ta thai a, chun Isuan Petera a hei en a.

Petera chu a kal suak a, a ṭap ta ngawi ngawi a. Ma kâr chun ân hmantirpu Juda han Isua chu thiam loi an inchangtir ti a hmu kani chun poi ati in a lungngai ta êm êm a, a kal suak a, a vân awk that a.

A thâitûk zînga chun Juda hruaitu heiin Rom Borsap Pilata hniangah thi dinga rêl beiseiin Isua chu an ṭhui a. Pilata chun, “Judahei lal maw ni chang?” ti in ân don a.

Isuan a thung a, “Ni hril angka chu a chang, changhomsiala ki Lalram ram chu ma khawvela mi hi chang siala chun ki siahlaw heiin doi an tih. Changhomsiala Pathian Thu hril dinga khawvela hong ke chang zawk. Mi tupaiin thudik a ngainat chun ki thu an ingaithla ṭhin,” a ti a. Pilata,n “Thutak chu imaw a chang?” a ti a.

Pilata chun Isu a sawn zoi chun, mipui hei hnianga chun a kal a, “Ma pa hin sualna ihman a nei ki hmu nawh,” a ti a. Chaghomsiala Juda mipui nih hruaituhei chu an inkhek suak a, “Kraws ah khêng bet rawh” an ti a. Pilata chun, “Ân sualna ki hmu nawh,” a ti nawk a. Changhomsiala an inkhêk ring hlek helk a. Kachun Pilata chun, “Sual reg ân sual nawh” a ti a.

Changhomsiala buaina a suak mai thei ti in aṭi thawng a, indai dingin Isua chu an hniagah a pêk suak a. Sipaihei chun an kutin an ben a, puan senduk an insiltir a, rihling lukhum an siam a, an inkhumtir a. Nuiza siamna a hmangin “Chibai, Judahei Lal!” an ti a.

Mathaia 26:57-27:26; Marka 14:53-15:15; Luka 22:54-23:25; Johana 18:12-19:16 sûng aṭanga Bible thu l^ak suak a chang.