44. Johana nih Peteran kutdaw an indam thu

Nika chu Petera nih Johana chu Tempul ah kal kal lawiin lampuia chun phei inbâi kutdaw an hmu a.

Peteran ani chun en mai a, Peteran, “Nang pe ding tangka kin nei nawh, changhomsiala kin i neisûn nang pe kin tih. Isua rihmingin thoi inla ni pheiin kal ta rawh,” a ti a.

Ani chu a dam ta thai a, a pheia kalin intawm pumi Tempula chun Pathian inpâk dingin a lût ve a. Tempula loi om mihei chun mak anti fê a.

Mipui an hong inbûmkhawm thai a. Peteran, “Ma pa indama om hi i dinga mak nin iti mawh a chang? Kin ṭhana lei nih kin theina leia mapa hi a dam a chag nawh, Isua a ringna leia dam a chang.”

“Isua chu that dingin nin hni chiam a. Damna pepu chu nin that a, changhomsiala Pathianin thina inthokin a kai thoi nawk ta a chang. Mangka hi a chang hrillawkna thu chu, Messia chun harsatna tuar a ti a, a thi ding a chang, ti Pathianin ân kiptir dân chu. Changhomsiala atun hin sualhei insufai dingin sim unla, Pathian hiangah hong kir roi,” a ti a.

Petera nih Johana inzîrtîrna lei chun Tempula hotuhei lungril chu nânsa vaikan a nat a, an lungril a awi naw fê a chang. Kachun an hman a tâng ina chun an khum ta a. Changhomsiala mi tamka chun an ihmu nih an ihawi hei chu an ring ta a, nupang naipang tinsa ritin mi 5,000kan Koihran an hong belsa a, an hong pung ta tir a.

A thâi zînga chun Juda hruaitu hei chun Petera nih Johana chu puithiam lal chem nih a insûnghei hnianga chun an hong hruai a. “I thuneina a mahei hi ni thaw maw chang?” an ti a, an indon a.

Peteran a thung a, “Isua Messian thilthawtheina leiin mapa hi kin indam a chang. Ani chu kraws ah nin khêngbet a, changhomsiala Pathianin ani chu a kai thoi nawk ta a chang. Ama chu nin dit naw a, changhomsiala Isua thilthawtheina ringot loi chun sandam chang theina lampui dang a om nawh,” a ti a.

Petera nih Johana chu lekhathiam loi mi hmawl ve mai an chang ti an hawiin hruaitu hei chun mak an ti fê a. Isua hniangah an om tah ti an hawi sa den a. Petera nih Johana chu an inthi hnung chun an sua ta a.

Sinthawhei 3:1-4:22 sûng aṭanga Bible thu lâk suak a chang