40. Krawsah Isua An Khêngbet Thu

Nuiza siamna dingin an hmang zoi hnung chun Kraws ah khêngbet dingin sipaihei chun an ṭhui a. An khêngbetna ding kraws chu an inputtir a.

Sipaihei chun “Luru hmun” an iti a chun Isua chu an ṭhui a, a kut nih a phei hei chu krawsa chun an kil a. Changhomsiala Isuan, “Pa anmani hi ngaidam rawh, an thilsual thaw hi an hawi nawh a chang,” a ti a. “Judahei Lal” ti in a lu chunga lekha târ dingin Pilata chun thu a pêk a.

Sipaihei chun ai enin Isua silfênhei chu a insem a. Ma thil chu an thaw chun “Ki silfênhei chu an insem a, ki zakua ai an san a,” ti a zawlnei ihril lawk ha a tlungkip ta a.

Isua chu misual inkhnika karah an khêngbet a. Misual khatka chun Isua chu a hal a, changhomsiala a champa khatka chun, “Pathian ni ṭi naw bei? Eini chu misual ei chng a, ani hin raw chu ihom sualna a nei nawh. Isu, ni ram ni tlung tikin ni hawi mai raw aw?” a ti a. Isuan a hniangah, “Vawn hin ki hniangah Paradisah om ve ne tih,” a ti a.

Juda hruaitu nih mipuihei chun nuiza siamna in Isua chu an hmang a, “Pathian Nâipa ni chang chun Kraws aṭang han hong ṭum raw chu, kachun nangman insandam inla keini homin nang ring kin tih,” a ti a.

Sûn vânglai tak a chang a, changhomsiala khawvel kapai chu a hong zîng ta rît a. Sûn vânglai tak aṭang chun chawhnung dar 3 a ri chun khawvel kapai a zîng ta a.

Kachun Isua chu ân khêk a, “Ân zoi ta, Pa ki Thlarau ni kutah kên koltir,” a ti a. Chun a lu a kûn a, a thlarau a hla ta a. A thi lai chun lî nânsa vaikan ân hnîng a. Tempul puan zar hom chung tiang aṭangin a hnuai tawp ari in ân thlêr dai a.

A thina lei chun mihei chu Pathian hniangah an hong theina dingin Isuan lampui a hong ta a. Isua hma a ngîr sipai han thil tlunghei chu a hmu chun, “Ma mi hin thil ihom a thaw sual nawh. Pathian Nâipa a chang ngêi hih,” a ti a.

Chun Nikodema nih Jsefa, Juda hruaituhei laia mi inhnika chu Messia a chang ti ringtuhei chun Isua ruak chu Pilata hniangah an hni a. Isua ruak chu puanin an tuam a, thlân lung inker sûnga chun Isua chu an phûm ta a. Thlân kotkhar chu lung lian fêkan an sî ta a.

Mathaia 27:27-61; Marka 15:16-47; Luka 23:26-56; Johana 19:17-42 sûng aṭanga Bible thu lâk suak a chang.