36. Hmêl Danginlamna

Nika chu Isuan a zîrtîr inthumkahei Petera, Jakopa nih Johana chu a ṭhui a. (Ma taka Johana hi Isua baptisma petu ha a chang nawh). Anmani chaiin tlâng insâng fêka tia chun an hang kâi a.

Isua hmêl chu ni angkan a hong vâr ta a, a silfênhei chu vûr angkan a hong vâr a, rinêngah tuhomin an sûka an invâr thei loi ding khop hin a vâr a.

Chun, Elija nih Mosia, kum tamka hma a mihei ha an hong inlâr a. Isua rêk chun Jerusalema a thi viak tak ding thu an ti ti hoi a.

Elija nih Mosia chu Isua rêk an insawn lai chun Peteran, “Isu, ma taka om mai hi ei ta dingin a ṭha. Puan in inthumka zar ei ti a, ni ta dingin khatka, Elija ta dingin khatka, Mosia ta dingin khatka,” a ti a. Petera chun a ti chu hawi loia a hril a chang.

Petera a ṭong mai lai chun sûm chu a hong zîng a, anmani chu a hong inhlia ta a, sûm aṭang chun rawlin, “Ma hi ki Nâipa dit chem chu a chang. A chungah ki lawm êm êm a, A thu hi ngai roi,” ti in. Zîrtîr inthumka hei chu an ṭi ta fê a, rinênga chun an bokkhup a.

Chun Isuan anmani hei chu a them a, “Ṭi naw roi,” a ti a. An hang en chun Isua chai loi chu tuhom an hmu tâk naw a.

Tlânga inthoka an ṭum lai chun, Isuan an hniangah, “Mithi lai aṭanga ki thoi nawk hmâka chu ma taka thil tlung hi tuhom hril naw roi,” ti in zîrtîr inthumka hei hnianga chun ma thu hi a cha a.

Matthaia 17:1-9; Marka 9:2-8; Luka 9:28-36 sûng aṭanga Bible thu lâk suak a chang.