22. Johana piang thu

Kum 400 hnêka tam a liam hnungin Pathianin mihei hnianga chun thu a hong hril ta a. Kachun puithiam lalchem Zakaria hnianga chun vântirkoi a hong inlâr a. A nupui rêk chun Pathian ngaisak mi fê an chang a. Changhomsiala Elizabetin chun nai a nei thei tlat naw a.

Vântirkoi chun Zakaria hnianga chun, “Ni nupui in nâipa nei a ti a, a rihming chu Johana sak ne tih. Zawlnei roiinpui fêka chang a ti a, Messia hong hma in, loi hong a tih,” a ti a. Zakaria chun, “Ki nupui nih kei hi tar fêka kin chang tâk a, nâi nei dingin kin unlian ta. Ma chu a hong tlung ding thu chu kan mawh hawi thei ki ti?” a ti a.

Vântirkooi chun a hniangah, “Ma chanchin ṭha hril ding hin Pathianin ani hong itir ke chang. Ki thu hril hi ni ring naw leiin nâipang chu a piang hmâka chu ṭong thei loiin om ne tih,” a ti a. Mangkachun Zakaria chu ṭong thei loiin a om ta nghal a. Chun, Vântirkoi chun a kal khal a. Zakaria chu in tiang ân lawi a, a nupui chun nâi a von ta a.

Elizabeti chu thla rukka lai a liam hnung chun a hnianga Vântirkoi inlâr a ha a suapuinu Mari hniangah chun ân lâr ve a. Ani chu nunghâk thianginhlim a chang a, mi khatka Joesefa an iti ni chun an inhual lai a chang a. Vântirkoi chun, “I râi ni ti a, nâi ipa nei ni ti a. A rihming chu Isua sak ne tih, Messia chang a tih,” a ti a.

Marin, “Ma chu inkan mawh chang thei a ti, pasal ki nei nghâl naw a” a ti a. Vântirkoi chun a hniangah, “Ni chungah Thlarau Thianghlim hong tlung a ti a, Pathian thilthawtheina chun nang inkhum a tih. Kachun nâite chu mi thianghlim Pathian nâipa tîng an tih,” ti in a thung a. Vântirkoi thuhril chu Marin a ring a, kachun a râi ta a.

Tawika hnung chun Mari chu Elizabeti a hang pan a. Elizabethin Mari chibai bûk rihâi chu a hawi kani in, a sul sûnga nâite chu ân chawm a. An ta dinga Pathianin thil a thawhei lei chun an lawm ta êm êm a. Mari chu Elizabethi hnianga thla inthumka lai a om hnungin an in tiang a kîr ta a.

Elizabethin nâipa a nei zoi chun Vântirkoiin a rihming a loi sak pêk angka han Johana an sak ta a. Mazoi kani chun Pathianin Zakaria chu ân ṭongtir nawk a. Zakaria chun, “A mihei a hawi mai leiin Pathian chu inpâkin om rise. Nang ki nâipa Pathian chunginung chem zawlnei nang tîng an tih. Messia dingin lampui siam pêk ne tih,” a ti a.

Luka bung 1 sûng aṭanga Bible thu lâksuak a chang.