32. Khawhri Ihman Ipa nih Nupang Damloi Isuan Ân Dam Thu

Nika chu Isua nih a zîrtîrhei chu Galili Dîl inkanin, Gerasin tiang chun an kal a.

Varâl an tlung chun khawhri ihman a hniangah an hong tloi a.

Ma pa hi a hât a chang fê leiin tûhomin ihman an hen thei naw a. Mipuiin meirilchîngin an khit homin a sat phat phat a.

Thlâna hei chun a om ṭhin a, sûn nih zân ân khêk ṭhin a. Puan sil loiin a om a, lunghei chun ân ât ṭhin a.

Isua hniangah a hong tlung chun a hma kunga chun a bokkhupa, chun Isuan, “Nang khawhri, mihriam sûng aṭangin hong suak rawh,” a ti a.

Nâipa, kei nih nangma imawh inzomna ei nei? Khawngaitakan ni soisak hrâm naw rawh,” a ti a. Chun Isuan, “Ni rihming imaw a chang?” ti in ân don a. Ani chun a hniangah, “Ki rihming chu Nuaia a chang, tamka kin chang a,” a ti a. (Nuaia chu sipai 6,000 pawl an chang).

Khawhri hei chun a hniangah, “Ma ram aṭang hin ni tir suak hrâm naw rawh,” ti in an ngên a. Ma rama tlâng panga hei chun vokrual an om a. Khawhri hei chun Isua hniangah, “Vokhei sûnga son nên lûttir zawk rawh,” ti in an u a. Isuan, “Va roi” a ti a.

Khawhrihei chu mihriam sung aṭang chun an suak a, vok sûngahei chun an lût a, vokhei chu khâmahei chun an thlâk a, kachun dîl sûngahei chun an thlâka an thi ta a. Vok rual chu 2,000 ka lai an chang.

Vok vulhei chun vokhei chunga thil tlung chu an hmu in a inbûmkhawm hoi a. Isua thilthawhei chu an hril sup sup a. Khua a mihei chu an hong a, khawhri ihman mihriampa ha an hong hmu a. Ani chu inṭhunga, puan silin, mi dam pangai angkan an hong hmu a.

Mihei chun Isua chu an ṭi ta fê a, khua a inthoka suak dingin an ngên a. Kachun Isua chu rilonga a chuang a, a kal ta a. Indama ompa chun Isua chu zui dingin a u a.

Changhomsiala Isuan a hniangah, “Ni intiang kal inla, ni chunga Pathian thilthaw dân hei nih nanga khawngai zia chu ni insûnghei nih ni chamhei hniangah va hril rawh,” a ti a.

Kachun a kal a, Isuan a chunga a thilthawhei chu mitin hniangah a hril a, ma chanchin hawi taphothei chun mak tina nih hril ding hawiloi khopin an om a.

Isua chu varâl dîl tiang chun a kal nawk ta a. Mipui tam fêkan ama chu an hong bûm a, an hneng sup sup a. Mipuihei laia chun nupang khatka hi kum sawmhlei kum inhnika lai thi pût a om ve a. A thil nei kapai chu sengin daktor panna in ân sêng zoi rît a. Ṭha tiang hnêkin a zual dap dap zawk a.

Isuan natna, damloi tamka ân dam ti thu a loi hawi a. “Isua puan hmor tal va them inlang kei hom dam ve mai ke tih,” ti in a ngaitua ta a. Isua hnung tiang chun a hong a, a puan hmor chu a va them a, Isua a hei tawn kani chun a thi pût chu a hong re ta thai a.

Isuan a sûnga inthoka thithawtheina suak ṭhin ha, a suak ti a hawi ta thai a. Kachun mipuihei laia chun an en vel a.”Tûmawh a nên them?” a ti a. Zîrtiîr hei chun, “Isu, mipui heiin nangan hong hneng sup sup ni hmu a, tûmawh a nên them inka tia ni ti mawh a chang?” an ti a.

Nupang chu ṭi nih inthing pumin Isua hmakunga a hong bokkhup a, Isua hniangah chun ipai thup nei loiin a hril fâi rît a. Isuan a hniangah, “Ni ringna in nangan dam a chang hi. Thlamuang vaikan kal rawh” a ti a.

Mathaia 8:28-34; Marka 5:1-20; Luka 8:26-39 sûng aṭanga Bible thu lâk suak a chang.