38. Isua inhmantira a omna

Kumtin Judahei chun kalkan kût ruaṭhe chu an hmang ṭhin a. Kum riza tamka a liamg hma han Aigupta ramah sala an tangna aṭang han Pathianin a sansuakna ha hawimaina dingin ruai an ṭhe ṭhin a. Isuan rongbawlna a ṭan hnungin kum inthumka lai mipui laiah thu a hril ta a. Isuan Jerusalema khua a chun an that ding thu a hawi a, a zîrtîrhei ma taka chun kal dingin a ti a.

Juda chu Isua Krista zîrtîrhei laia ṭang ve a chang a. Zîrtîrhei poisa inkolpu a chang a, poisa a ngainat a, ru hom a loi inru nai ṭhin a chang. Isua nih a zîrtîrhei hniangah a vâ a, Juda hruaituhei hniangah Isua chu inhmantira tangka sum la dingin a ti a. A san chu Juda hruaitu hei chun Isua hi Messiah ti an ring naw leiin that dân ding a rûkin an rêl leiin.

Juda hruaitu puithiam lal chem, kaihruaina hnuaiah Isua Krista chu an hman theina dingin Juda hnianga chun tangka sawminthumka chu an va pêk a. Zawlnei heiin an loi hril lawk angka chia han mahi a hong tlung a chang. Juda chun a pom a, tangka sawm inthumka chu a lâk a. Isua inhmantir dân ding remchâng zongin a suak ta a.

Isua chu a zîrtîr hei rêk kalkân kût ruaiṭhe chu an hmang a. Bu an nêk lai chun Isuan bai chu a lâk a, a khoi a, “Ma hi la unla fa roi, ki taksa a chang. Anni hawimaina dingin mahi thaw ṭhin roi,” a ti a. Mangka hin a taksa chu an ta dinga inthawina dingin a pe ding a chang ti a hril ta a.

Khawhloi bu chu an nêk zoi chun Isuan hâi chu a lâk a, “Ma hi in roi, sual ngaidamna dinga suak ding ki thisen Thuthlung Thar chu a chang. Nin intik paiin anni hawimaina dingin mahi thaw ṭhin roi,” a ti a. Mangka chia chun an sualhei ngaidamna dingin a thisen a suak ding a chang ti a hril a.

Chun Isuan a zîrtîrhei hniangah, “Nin laia mi khatkan nen hmantir a tih,” a ti a. Zîrtîr hei chun a tu tak mawh mangka chu a thaw ding ti an hawi naw a, mak anti fê a. Isuan, “Bai her chu a chia a, ki pêk apai chu chang a tih a nen hantirpu ding chu,” a ti a. Chun bai chu Juda hnianga chun a pe ta a.

Judan bai her chu a lâk zoi kani chun a sûnga chun Setana chu a lût a. Juda hruaipu hei chu Isua inhmantir dingin a suak ta a. Zânah a chang ma chu.

Khawloi bu an nêk zoi chun Isua nih a zîrtîrhi chu Olive tlâng tiang chun an kal a. Isuan an hniangah, “Zâni hin keima leiin nin rêngkan raw rît nin tih. ‘Berapu chu vuang kiti a, berahei chu indar rît an tih,’ ti inziak a chang leiin,” a ti a.

Petera chun a thung a, “Midang hei kapaiin nangma khal rît homsiala, nang phat riai naw ning,” a ti a. Isuan Petera hniangah, “Setanan nangni a hîp tum rît a chang hi. Peter nin ringna a chai loina dingin nangni ki ṭonginṭai pêk a chang hi. Mangka hom chun zâni hin ar voi inhni a khuang hma in nang chun voi inthumka ne phat ne tih,” a ti a.

Peteran Isua hniangah, “Ni thina a chun thi ve ding hominlang nang phat riai naw ning!” a ti a. Kachun zîrtîr danghei hom chun mangka den chun anti pak a.

Chun Isua nih a zîrtîr hei chu Gestmani rihuana chun an kal a, Isuan zîrtîr hei hniangah chun thlêma ah an lût loina dingin ṭonginṭai dingin a ti hoi a. Kachun a khata ṭonginṭai dingin a kal ta a.

Isua chu voi inthumka a ṭonginṭai a, “Pa, ân thei hrâm chun ma tuarna aṭang hin nen zoktir rawh. Changrawchu mihei sandamna ding lampui dang a om naw chun ni thu thu chang rise,” a ti a. Isua chu a lung a riang ta fê a, a rithlân chu tuifar ṭuk ṭuk angka khopin a far ta a. Pathianin ama chu inhrâttir dingin vântirkoi chu a hong tir a.

Chun a ṭonginṭai zoi chun a zîrtîr hei hniangah a hong kîr a. Changhomsiala an loi in inhnil rît a. A voi inthumna a hong kîr chun, “Thoi roi thaw, a nên hmantirpu ding chu mahin a hong om ta,” a ti a.

Juda chu Juda hruaituhei nih mipui tam fêkahei ni chun khandai nih fei hei chawiin an hong a. Juda chu Isua hnianga chun a hong a, “Chibai, zîrtîrtu,” a ti a, a fawp ta a. Mahi Juda hoituhe dingin tumawh hmanpu ding chu ti sininsiana a chang. Isuan a hniangah, “Juda, in fawpa nen hmantir ding ne chang maw?” a ti a.

Sipaiheiin Isua an hman kani chun Petera chun a khandai a dok a, puithian lal chem siahlaw kuar chu a tuk ṭhul pêk a. Isuan a hniangah, “Khandai ha sia dai rawh! A ne san dingin Vân angel rual sipai ki Pa hniangah ke hni thei mai hi. Changhomsiala ki Pa thu chu ke zawm ding a chang,” a ti a. Ma zoi chun Isuan ma pa kuar chu ân dam pêk a, zîrtîr hei ha an rêngkan an raw hoi ta rît a.

Mathaia 26:14-56; Marka 14:10-50; Luka 22:1-53; Johan 18:1-11 sûng aṭanga Bible thu lâk suak a chang.