23. Isua Piang Thu

Josefa chu mi fel fêka a chang a. Marin nâi a von thu a hawi chun a nâi a chang nawh ti a hawi a. Mari chu hmualinphoitir a awi naw leiin a rûka mâ a tum ta a. Ma chu a thaw hma in Vântirkoi chu a rimangin a hong inlâr a.

Vântirkoi chun a hniangah, “Josefa, ni nupui nei ding hi ṭi naw rawh, a nâi von hi Thlarau Thianghlim aṭanga mi a chang ti ni hawi naw bei. Nâi ipa nei a ti a, a rihming chu Isua sak ne tih. Ani chun a mi hei sualna aṭangin a sandam ding leiin,” a ti a.

Chun Josefa chun Mari chu a nei a, a nupui dingin an intiang chun a ṭhui ta a. Changhomsiala nâi a nei hmâka chu a pawl naw a.

Marin nâi a nei lai chun Rom sorkarin mitin chu rihming inzia dingin mani khua ṭianga kal dingin a ti a. Mari nih Josefa hom Davida thla a mi an chang leiin Galili ram Nazareth khua aṭangin Juda ram khawpui Bethlehema chun rihming inzia dingin an kal ve a.

Bethlehema an zu chun riakna ding hmun an hmu naw a. Riakna ding hmun a inhmu sûn chu ran riakna hmun chai a chang. Nâite a hong piang chun nâite zâlna ding chu khum a om naw leiin a nu chun ran bupêkna thlênga chun ân zâltir ta a. A rihming chu Isua an sak a.

Ma zân chun an kawla chun berapuhei chu an om a, phâiah an berahei an vêng a. Pathian vântirkoi ivâr fêka chu an hniangah a hong lang ta thut a, an ṭi fê a. Vântirkoi chun an hniangah, “Ṭi naw roi, nin ta dingin chanchin ṭha nangni ki hong intlung a chang hi. Messia, Hoitu lian chem chu Bethlehema a piang ta.

“Kal unla, nâite puana tuam, ram bu pêkna thlênga zâl va hmu nin tih,” an hong ti a. Voikarengin rivâna vântirkoi hei chu an hong ta thut a, Pathian an inpâk a. “Chunginung chema khin Pathian chu roiinpui chem rise, rinêngah inremna nih mihriamhei hniangah ditsakna om rise,” an ti a.

Berapu hei chun Isua omna hmun an va tlung chun , vântirkoiin an hnianga a hril angka chia han ran bu pêkna thlênga zâl chu an va hmu a. An hlim êm êm a. Mari hom a loi hlim fê a. Berapi heiin hrila an om angka chia han an va hmu leiin Pathian inpâk pum tirin an omna phâi tiang chun an kîr ta a.

Hun itenka maw chang hnung chun, khawsak tianga mi vâr ram hla fê a mi hei chun arsi danginlam fêka chu an hmu a. Juda hei ta dingin lal thar a piang ti an hawi a. Kachun ma lal hi hmu dingin ram hla fêk aṭang chun an inzin ta a. Bethlehem khua chu an tlung a, Isua omna hmun chu an va hmu ta a.

A nu nih Isua an va hmu chun bokkhupin chibai an va bûk a. Thilpêk hlu fêka hei chu an pêk a. Kachun in tiang an kîr nawk ta a.

Mathaia 1, nih Luka 2 sûng aṭanga Bible thu lâk suak a chang.