11. Kalkân kût Ruai

Pathianin Farawa hniangah Israelhei ân kaltir ala awi nai naw chun Aigupta mihriam nâi hmasak chem ipa nih an ran piang hmasak chem a chalhei kapai chu a that rît ding thu a hril lawk a. Farawan ma thu chu a hawia, changhomsiala Pathian chu ala ring awi nai naw a.

Pathianin a thu iring taphot hei chu an nâi lutir hei sanhim dingin rem a ruat pêk a. Insûng tinin berate mawh awle kelte maw demkâiloi chu an that ding a chang ti in.

Chun Israel hei chun an kot banga nawle an kot lua chun berate maw awle kelte thisen chu i tât an ti a. Ma sa chu i em hmin an ti a, chol ṭangloi bai rêk chun inhmaw fêkan fâng an ti a, an fâk lai vu hom chun Aigupta ram chu suak khal thei an tih ti in.

Pathianin thaw dinga a hril kapai chu Israel hei chun an thaw a. Zân an ril lai mat chun Pathian chun Aigupta ram sûng kapai chu a sir suaka, an nâi lutir kapai chu a that pêk rit a.

Israel hei chun an kot banga nih a lua chun thisen an tât leiin Pathianin an inhei chu a kan tiama, insûnga om hei chu an him ta rit a, Berate thisen lei chun an him ta a chang.

Changhomsiala Aigupta mihei chun Pathian chu an ring ve naw a, a thupêk hom an pom naw a. Maleiachun Pathianin an inhei chu a kan pêk ve naw a. Aigupta nâi lutir ipa nih an ran piang hmasak a chal phot chu a that pêk rit a.

Aigupta nâi ipa taphot, lung ina intâng nâi ipa piang hmasak chem aṭangin Farawa nâi lutîr ipa a riin a that fâi rit a, Aigupta ram sûng kapai chu ṭap rihâiin a sip ta a chang.

Ma zân chun, a zân azânin Mosia nih Arona chu Farawan a koi a, “Israel hei chu ṭhui unla Aigupta ram hi a rang thei angkan suak khal roi,” a ti a. Aigupta mihei hom chun Israelhei chu suak nghal dingin an tuang dar ta a.

Exodas 11:1-12:32 sûng aṭanga Bible thu lâk suak a chang.