21. Pathianin Messia Pêk Ân Tiam Thu

A tîr aṭang han Pathianin Messia hong tir a tum ta hrim a. Messia a hongtirna ding thu ân tiam pêkna hmasak chem chu Evi nih Adama hniangah a chang. Evi thla aṭanga hong piang chun rûl lu chu thukber a tih tiin Pathianin thu a loi intiam ta a. Evi inthlêmpu chu Setana a chang. Thutiam Messia hong ding chun Setana chu ihne tang a tih tina a chang.

Pathianin Abrahama hnianga a ma thla a inthokin khawvela hnamtin la thawveng an ti a, malsawmin anla om ding thu ân tiam a. Ma malsawmna hi a hong ding Messia chun hnamtin dingin sandamna lampui la hong hong a tih tina a chang.

Pathianin Mosia hniangah Mosia angka zawlnei ala hong tir ding thu ân tiam pêk a. Ma hom hi a hong ding Messia chanchin thu a intiam tho ha a chang.

Pathianin Davida hniangah Messia chu Davida thla aṭanga mi ngêi a chang ding thu ân tiam a.

Pathianin zawlnei Jeremiah hmangin Israelhei hnianga thu a intiam angka ha chang loi, Thutiam thar a siam ding thu ân tiam pêk a. Thutiam thar a chun Pathianin an lungrila dân thupêk hei chu ân zia a, kachun mihei chun Pathian hawi tâng an ti a, anmani hei chu a mi hei hong chang tâng an ti a, an insualna hei chu ngaidam chang tâng an tih. Messia chun Thuthlung Thar a siam ding a chang.

Pathian zawlnei hei homa a hong ding chu zawlnei, puithiam nih lal inkop chang a tih ti in an loi hril a. Zawlnei chu Pathian thu i hawi a, Pathian Thu chu mihei hnianga inpuang darpu chu a chang. A hong ding Messia chu zawlnei famkim chang a tih.

Puithiam chu mihei an insualna ngaidam an chang theina dinga Pathian hnianga inthawina inhlânpu chu a chang. Puithiam hei chun Pathian hniangah mihei dingin an ṭonginṭai pêk ṭhin a. A hong ding Messia raw hi chu Puithiam lal chem changin Pathian hniangah ama ngêi chu inthawina famkim inhlân a tih.

Lal chu lalram sûnga mipui hei chunga roirêlpu a chang. A hong ding Messia raw hi chu ân thlapu Davida lalṭhungpha a inṭhungin lal chem chang a ti a, chatuanin khawvel pumpui chungah inlal a ti a, ringom vaikan roi rêl a ti a, thuthlûkna dik fêka chu siam kumkhua tâng a tih.

Pathian zawlnei hei chun a hong ding Messia chanchin hi kong tinrengin a loi hril lawk a, zawlnei Malakia chun Messia a hong hma in zawlnei roiinpui fêka chu a hong hmasak ding a chang tiin a loi hril lawk a. Isaia chun Messia chu nunghak thianginhlima inthokin a hong piang ding thu a loi hril lawk a. Mika chun Messia chu Bethlehem khua ah a piang ding thu a sa dên a.

Isaia chun Messia chu Galili rama a om a ti a, lungrila inriang nih intâng hei suakna ding nih salhei hnianga zalenna dingin thlamuangna thu hril a tih. Isaia dên chun Messia chun damloi hei indam a ti a, kuar set nih mitchaw hei chu dam an ti a, ṭong thei loi hei nih phei inbâi hei hom indam a tih ti in a loi hril sa dên a.

Isaia dên chun Messia chu a san om riai loiin hnel an ti a, hnawlin om a tih. Zawlnei danghei homin Messia thatpuhei chun a silzêm hei insemin ṭhûm vawr an ti a, a champa in inhmantir a tih tiin an hril a. Zakaria chun a champa chun ân hmantir theina dingin tangka 30 lang a tih ti in a loi hril ve chang.

Zawlnei hei chun Messia a thi ding dân an loi hril hoi a. Isaia chun chil sâkkhum an ti a, nuiza siamna in hmang an ti a, ivuang an tih ti in an loi hril a. Chun a nâka chun sun an ti a, thing lêra inkhâiin a thi ding thu hom an loi hril lawk a chang.

Messia chu sualna nei loi, mi famkim chang a tih. Mihei sualna la in hremna ituarin a thi ding a chang. A tuarna lei chun mihriam nih Pathian inkâra chun inremna intlung a tih. Maleiachun Messia chu vuak thiduka invua chu Pathian lawmzawng a chang.

Messia thi ding thu chai inpuang loiin Pathianin a thina a inthokin a kai thoi nawk ding thu chu zawlnei hei chun an loi hril lawk a. Messia thina nih thoi nawkna chun Pathianin sandamna lampui a loi isiam chu infamkimtir tâng a ti a. Thuthlung Thar inṭan tâng a tih.

Messia hongna ding thu zawlnei hei hmangin Pathianin thil tamkan a loi inentir a, changhomsiala Messia chu a la hong viak naw a. Hril lawkna atawp tiang kum 400 hnêka tam a ral hnungin a hun bi chu a hong kip chun Pathianin Messia chu khawvela hin a hong tir ta chai a chang.

Genesis 3:15; 12:1-3; Deuteronomy 18:15; 2 Samuela 7; Jeremia 31; Isai 59:16; Daniala 7; Malaki 4:5; Isai 7:14; Mika 5:2; Isaia 9:1-7; 35:3-5; 61; 53; 50:6; Sâm 16:10-11; 22:18; 35:19; 69:4; 41:9; Zakaria 11:12-13; sûng aṭanga Bible chanchin lâk suak a chang.