31. Tui Chungah Isua Pheiin a Kal thu

Chun, mipuihei chu ân ṭintir lai chun a zîrtîr hei chu ama hma a kala rinlonga chuang dingin a ti a. Mipuihei ân ṭintir hnungin a khâtin tlângah ṭonginṭai dingin a kal a. Ma hmuna chun a man khât chaiin a om a, khawhloi thlâi fêka khopin a ṭonginṭai a.

Ma zân chun zîrtirhei chu tuipui chunga chun an lêng an lênga, zân sawt hnung chun dîl inlaina a chun an hong tlung a. Thlipui a nânsat fê leiin an kal ṭhat thei naw a.

Chun, dîl chungah pheia kalin an omna tiang chun a hong ta a.

Zîrtirhei chun Isua an hei hmu chun, khawhri an hmu ah an ingai leiin an ṭi ta êm êm a. Isuan an ṭi ti a hawiin anmani hei chu a hong sawn a. “Ṭi naw roi, keima ke chang hite,” a ti a.

Chun, Peteran a hniangah, “Lalpa, nangma ni chang chun tui chungah ni hniangah hong dingin thu ni pe rawh,” a ti a. Isuan Petera hniangah,”Hong raw chu,” a ti a.

Kachun Petera chu rilonga inthok chun a suak a, tui chunga kalin Isua tiang a va ta a. Changhomsiala tawikate a hei kal hnung chun Isua tiang en loiin thlipui nih tuifawn tiang chun a en ṭan ta a.

Kachun Petera chu a ṭi a, ân hnîk ṭan ta a. “Lalpa ni sandam rawh!” ti in ân khêk suak a. Chun Isuan a hang ban thai a, a hei tum ta a. A hniangah chun, “Aw, nang ringna hroipa, i ding maw ni ringhnel ngare?” a ti a.

Isua nih Peterahei chu rilong sûnga an chuang chun thli nih tuifawn chu a hong re ta ṭhuap a. Zîrtîrhei chun mak an ti fê a. “Pathian Nâipa ne chang tak zet a chang,” ti in Isua chu chibai an bûk a.

Mathaia 14:22-33; Marka 6:45-52; Johana 6:16-21 sûng aṭanga Bible thu lâk suak a chang.