41. Mithi lai aṭangin Pathanin Isua a kaithoi thu

Krawsah Isua an khêngbet zoi hnungin, Juda hruaitu hei han ring loi mi Pilata hniangah, “Ma khêlnâmpa han ‘Ni inthumka hnungin mithi lai aṭangin thoi nawk ke ti a. A zîrtîr heiin a ruak chu an rûka mithi lai aṭangin a thoi nawk tah an ti loina dingin a thlân chu vêng ṭha ding chang a tih,” an ti a.

Pilata chun, “A thlân chu a him thei patawpa him dingin nin thei tawp insua roi,” a ti a. Kachun thlân chu lungin an sîn phui tlit a. Isua ruak chu mi tuhomin an rûk loina dingin sipaihei chu an invêngtir tlat a.

Isua an vui zoi, tûk chu chawl ni, sabbat ni a chang. Chawl ni hapta hmasak chem a ni khatni chun nupang thenka chu Isua ruak imtui nâl dingin an va a.

Li nânsa vaikan ân hning a, Kawlinlek angka maia vârin rivân aṭangin vântirkoi chu a hong inlâr a. Thlân kot sînna lung chu a hong inhlumtir a, a chunga chun a ṭhung a. Thlân vêngpu sipai hei chun an ṭi a, mithi angka maiin rinênga chun an inlîr ta a.

Vântirkoi chun nupanghei hnianga chun, “Ṭi naw roi, ma hmuna hin Isua a om ta nawh. Mithi lai aṭanga thoi nawk ding thu a hril angka ngêi han a thoi nawk tah. Thlâng sûng hi en hman ta u,” a ti a. Nupanghei chun thlâng sûng chu an en a, Isua zâlna hmun chu an en a, a taksa ma hmuna hin a om ta anwh!

Chun vântirkoi chun nupanghei chu a hril a, “Isua chu mithi lai aṭangin a thoi nawk ta, nin hma a Galili ram tiang chun a kal ta ti a zîrtîrhei hu va hril roi ,” a ti a.

Kachun ṭi nih lawm fêka chun nupanghei chu an om a. Ma chanchin lawmom tak chu a zîrtîrhei hniangah hril dingin an kal ta a.

An kal laiin lampuia chun Isua chu an hniangah a hong inlâr a, ama chu chibai an bûk a. Isuan an hniangah, “Ṭi naw roi. Kal unla Galili rama kal dingin ki zîrtîr hei chun va hril roi, ma hmuna chu ni hmûng an tih,” a ti a.

Mathaia 27:62-28:15; Marka 16:1-11; Luka 24:1-12; Johana 20:1-18 sûng aṭanga Bible thu lâk suak a chang.