18. Lalram Inṭhen Thu

Kum tamka hnung chun Davida chu a thi a, Davida thi hnung chun a naipa Solomonan roi a rel tan ta a. Pathian in Solomona hniangah chun imawh a tul chem ti an don a, Solomonan varna a hni leiin Pathian chu an lawmtir ta a, khawvela mi var chemin a siam a. Chun Pathianin Solomona chu inchong chem dingin a siam sa den a.

Jerusalem khu a a chun Solomona chun a pa in Temple bawl dinga hmangrua a loi ilak khawm hei nih a bawl dan ding rem a loi iruat hmang chun Temple chu a bawl ta a. Inhmukhawmna puan in ha hmang ta loiin mipui hei chun Temple a chun Pathian chu biakin, inthawina hei chu an hong inhlan ta zawk a.

Changhomsiala Solomona chun ramdang nupanghei chu dit enin a en a. Pathian thu zawm loiin nupui tamka 1,000 ka lai zet chu a nei ta a. Ma a nupui tamka hei hi ramdang atang hong an chang a, an pathian hei chu an hong chawi a, pathian angkan an biak hoi a. Solomona hom chu a hong tar hnung chun an pathian hei chu a biak ve ta zawk a.

Solomona chunga chun Pathian ning a thik ta a, a ringom loina leia a hremna dingin Israel ram chu a thi hnungin inhnikan a then ding thu Pathian chun thu an tiam ta a.

Solomona thi hnung chun a naipa Rehoboama chu lal a hong chang ta a, Rehoboama chu lal inthlaw mihriam a chang a. Israel mi kapai chu Rhoboama chu an lal ah hnemnghet dingin an kal khawm a. Rehoboama chun sin rik fe feka hei chu an thawtir thu hom tamka an chawitir leiin an inphun thu hawi a chang a.

Rehoboama chun inthlaw fekan “Ki pa Solomona han sin rik fe feka nangni an thawtir a, kei crawchu ki pain nangni a inthawtir hneka rik zawk nangni inthawtir ke tih, aman nangni a hrem hneka na in nangni hrem ke tih ti hawi mai ro,” tiin a thung hoi a.

Israel hnam sawmkahei chu Rehoboama chunga chun an hel ta a. Hnam inhnikahei chai chu a chunga ringoma om an chang. Ma hnam inhnika hei hin Juda ram indingpu an chang.

Hnam sawmka Rehoboama chungah an helin an la dingin Jeroboama chu an siam ve ta a. An lal ram dingin hmar tiang ram kapaia chun an inbenga, Israel lal ram an ti ve a.

Jeroboama chu Pathian laka chun a hel ta a, mipui hei chu Pathian laka an heltir sa den a. Juda ram sunga Temple a Pathian biak hnekin mipui hei chun an biakna ding milem pathian ihnika a siam pek a.

Juda lal ram nih Israel lal ram chu hmelinhma in an insiam ve ve ta a. An indoi mai mai a chang.

Isarel ram sunga lal kapaihei chu lal insual an chang rit a. Lal tamka chu lalna inchu in an hmuna lala inthung tumin Israel midanghei chun an that thin a.

Isarel lal ram kapai nih mi tamka chun milem pathian chu an biak a, maleiachun uirena suol nih a chang chun nupanga inthawina a ri in a tlung pha a.

Juda lal rama lal hei hi chu Davida thla an chang. Thenka hi lal tha, fel em emka nih Pathian ti puma roirel an chang. Changhomsiala Juda lal a tam tiang hi chu lal sual, dik loi feka thilthaw awi nih milem biak thin an chang. Lal thenkahei dek hi chu an naihei ari milem pathian hniangah inthawina in an inhlan thina. Mahei chai chu an chang nawh, Juda mipui hei homin Pathian chu an hel a, pathian danghei chu an biak sa den a chang.

I Lalhei bung 1-6, 11-12 sûng aṭanga Bible chanchin lâk suak a chang.