15. Ram Tiam Ram Chu

A tawp chema chun Kanan ram chu Israelhei dingin lût a hongin rup ta a. Josua chun Jeriko khua a chun enthlapu mi inhnika a tir suak a. Khua chu lung bang nânsa fêka inhuan a chang. Pathian a ṭi leiin Rahabi, Nawchizuar chun enthlapu hei chu a loi ṭangpuia, a loi hum tlat a. Anni hei chun Jeriko insieta a om tik chun Rahabi nih a insûnghei chu zua chang ngei an tih ti an intiam ta tlat a.

Ram tiam lûtna ding chun Israelhei ta dingin tuidung inkan ngei a ṭul a. Josua hnianga chun Pathianin, “Puthiamhei inkaltir hmasak rawh,” ti in a hril a. Puithiamhei phei chun tuidung chu a tawn kani chun tui luang chu a tawp ta chat a. Israelhei chu rinêng hula chun an kal thei ta a.

Jordan tuidung chu an kâi zoi chun Pathianin Jeriko khua roiinpui fêka chu doi dingin Josua hnianga chun thu a hril a. Mipuihei chun Pathianin a ihril chu an pom a. Puithiamhei nih sipaihei chun nintin voika Jeiko Jeriko khua chu an vêl suak a.

A ni sari ni chun Jeriko khua chu voi sarika an vêl suak a. Ani tawpna a chun Puithiamhei chun tawtawrawt an mût sûngka chu sipaihei chu an inkhek dur dur a.

Mangkachun Jeriko khaw kulpui an inhuanna chu a chim rît ta a. Pathianin thaw dinga thu a pêk angka chia chun Jeriko khaw sûnga thil chu an siat rît a. Israelhei tianga ṭang Rahabi nih a insûnghei chai chu that loiin an zua ta a. Khaw danga Kanan mihei chun Jeriko khua a thil tlung dân chu an loi hawiin an ṭi ta êm êm a.

Pathianin Kanan rama hnam dang omhei rêk chun inremna reng reng siam loi dingin thu a pêk a. Changhomsiala Kanan rama om Gibeon khua a omhei chun ram hla fêka inthoka hong an chang zia hrilin Josua chu an lem ta a. Josua chu anmani rêk inremna siam dingin an u a. Josua nih Israelhei chun Gibeon khawmihei rêka inremna siam dingin Pathian an rawn naw a. Kachun Josua chun anmani hei rêk chun inremna a siampui ta a.

Israel hei chun Gibeon khawmi heiin an ilem a chang ti an hong hawi chun an ning a thik ta fê a, changhomsiala Pathian hma ah inremna an loi siam tâk leiin ihom an hen tâk naw a. Kachun Kanan rama om hnam danghei chun Gibeon khawmi hei nih Isarelhei chun inremna an siam ti thu an loi hawi chun Gibeona khua chu an rûn ta a. Gibeon khawmihei chun Josua chu ṭangpui dingin an u ta a.

Josuan a sipahei chu a koi khawm a, Gibeon khua tlung daikan zânkhua in an kal ta a. Khawhloi inhmân fêkan Kanan ram hmêlmahei chu an zu ṭhawng a, a doi ta a.

Pathianin Kanan mihei chu ân buaitir a. Pathian chu Israelhei tiang a ṭang a, rial nânsa vaikan ân thlâktir a, Kanan mihei chu rial chun a sep that ta rît a.

Kadenchun Israel sipaiheiin Kanan mihei chu an hne theina dingin Pathianin vânlai zawla chun ni chu nithla in ân ngîrtir a. Ma ni chun Pathianin Isarelhei dingin a hne pêk ta a.

Israel miheiin Kanana mihei chu an hne hnung hom chun Kanan mi la dam sûn hei chu an pung a, Israehei chu an doi nawk a. Josua nih Israelhei chun a letting an doi ve a. Kanna mhei chu an hne a, tamka an that ta a.

Ma indoi hnung hin Pathianin Israel hnamtin hniangah ram tiam ram chu an chanhrang a pêk ṭiang a. Kchun Pathianin a ram sûng kapaia chun thlamuangna a pe ta a.

Josua chu a tar fê tak leiin Israel mipui kapai hei chu a koi khawm a. Sinai tlânga chun Israel mipui hei chu Pathian rêk inremna thuthlung an siam ṭhat nawk a. Kachun mipuihei chun Pathian hniangah ringom mai ding nih a thupêk hei ni a dân hei chu zawmtir dingin an intiam ta a.

Joshua bung 1-24 sûng aṭanga Bible chanchin lâk suak a chang.