Simrek ti Basol iti Lubong

Siraragsak nga agbibiag ni Adan ken ti asawana idiay nakapinpintas nga minuyongan nga inaramid iti Dios para kadakuada. Agpadada a saan a nakawesan. No man pay kasta, saanda a makarikna iti panagbain gapu ta awan pay laeng ti basol iti lubong. Kankanayonda a magmagna iti minuyongan ken makisarsaritada ti Dios.

Idiay minuyongan, adda maysa nga uleg a nasikap. Dinamagna ti babai, “Agpayso kadi nga imbaga iti Dios kadakayo a saankayo a mangan iti bunga iti aniaman kadagiti kaykayo iti minuyungan?”

Simmungbat ti babai ket kinunana, “Imbaga iti Dios a mabalinmi a kanen ti bunga iti aniaman a kayo malaksid iti bunga ti kayo ti pannakaammo iti nasayaat ken dakes. Imbaga iti Dios kadakami a 'no kanenyo dayta a bunga wenno uray sagidenyo laeng ket mataykayo."

Sinungbatan iti uleg ti babai a kunana “Saan nga agpayso dayta! Saankayo a matay. Ammo iti Dios a no kanenyo, agbalinkayo a kas iti Dios ken maawatanyonto ti nasayaat ken dakes a kas kenkuana.”

Nakita iti babai a naimas diay bunga ket makaay-ayo ti buyana. Maysa pay ket tinarigagayanna met nga agbalin a masirib. Isunga nangpuros kadagiti bunga ket kinnanna. Intedna ti dadduma iti asawana a kaduana ket nangan met.

Dagus a naamirisda a lamulamoda. Inabbunganda ti bagbagida babaen iti panagdaitda iti bulbulong a bado wenno kawesda.

Nangngeg iti lalaki ken iti asawana ti arimpadek ti Dios a magmagna iti minuyungan. Naglemmengda a dua manipud iti Dios. Inawagan iti Dios ti lalaki, “Sadinno ti ayanmo?”Simmungbat ni Adan ket kinunana “Nangngegko a magmagnaka iti minuyungan, nagbutengak gapu ta lamulamoak isu a naglemmengak.”

Dinamag iti Dios, “Siasino ti nangibaga a lamulamoka? Nanganka kadi iti bunga nga imbagak a saanmo a kanen?” Simmungbat ti lalaki ket kinunana, “Daytoy babai nga intedmo kaniak isu ti nangted iti bunga.” Sinaludsod iti Dios ti babae,“Ania ti inaramidmo?.” Simmungbat ti babae, “Inallilawnak diay uleg.”

Kinuna iti Dios iti uleg, "Mailunodka!" aguyaskanto ket manganka iti tapuk. Agginnurakayonto iti babae, uray pay dagiti an-annakmo ken an-annakna ket agginnuradanto met. Rim-itento iti kaputotan iti babae ti ulom ket sugatemto met ti mukodna."

Kalpasanna, kinuna iti Dios iti babae, “Aramidek a nakasaksakitto ti panagpasngaymo. Tarigagayamto ni lakaymo ken iturayannakanto.”

Imbaga iti Dios iti lalaki, “Dimngegka iti asawam ket sinukirnak. Itatta, mailunod ti daga ket kasapulamon iti kasta unay a panagtrabaho tapno adda iti kanem. Sumaruno, mataykanto ket ti bagim agsubli iti tapuk. Pinanaganan iti lalaki ti asawana iti Eba nga ti kaipapananna,“mangted iti biag” gapu ta agbalinto nga ina dagiti amin a tattao. Kinawesan iti Dios ni Adan ken Eba babaen iti kudil iti ayup.

Kalpasanna, imbaga iti Dios, ”Itatta ngarud ta nagbalinen dagiti tao a kas kadatayo babaen iti pannakaammoda iti nasayaat ken dakes, saandan a mapalubusan a mangan iti bunga iti kayo iti biag, ken saandan nga agbiag nga agnanayon.” Gapu iti daytoy, pinapanaw iti Dios ni Adan ken Eba iti adayo manipud iti nakapinpintas a minuyongan. Pinabantayan iti Dios iti mannakabalin nga angheles ti ruangan iti minuyongan tapno awan uray maysa a makapangan iti bunga iti kayo iti biag.

Istorya iti Biblia manipud: Genesis 3