Insalakan ti Dios ni Joseph ken ti Pamiliana

Naglabas ti adu a tawtawen ket lakayen ni Jacob. Imbaonna ti kaykayatna nga anak a ni Jose tapno kitaenna dagiti kakabsatna a lallaki nga agayaywan kadagiti arban.

Kagurgura dagiti kakabsatna a lallaki ni Jose gapu ta kasta unay ti panagayat ti Amada kenkuana ken maysa pay ket natagtagainep ni Jose nga isunanto ti mangidaulo kadakuada. Idi napan ni Jose kadagiti kakabsatna a lallaki ket pinilitda nga innala isuna ken inlakoda kadagiti aggatgatang ti adipen.

Sakbay a nagawid dagiti kakabsat a lallaki ni Jose idiay balayda ket pinigispigisda pay ti pagan-anayna ken insawsawda iti dara ti kalding. Impakitada ti pagan-anay ni Jose iti Amada tapno pagarupenna a pinatay ti narungsot nga ayup ni Jose isunga nagladingit ni Jacob.

Impan ngarud dagiti aggatgatang ti adipen ni Jose idiay Egipto. Nalawa ken mannakabalin a nasion ti Egipto nga asideg idiay karayan ti Nilo. Inlakoda ni Jose iti maysa a nabaknang nga opisial ti gobierno. Nasayaat ti panagserbi ni Jose iti amona ket binendisionan isuna ti Dios.

Pinadas ti asawa ti amona ti makikaidda kenni Jose ngem saan a kayat ni Jose nga agbasol iti Dios. Isunga nakaunget ti babae ket pinabasolna ni Jose iti saan nga agpayso isunga tiniliwda ni Jose, kalpasanna ket impanda isuna idiay pagbaludan. Nagtalinaed a napudno ni Jose iti Dios uray adda isuna idiay pagbaludan ket binendisionan ti Dios.

Kalpasan ti dua a tawen ket nakabalud latta ni Jose uray no inosente. Iti maysa a rabii, adda ti dua a tagtagainep ti Paraon (nga isu ti awag dagiti Egipcio iti arida)a nangriribuk kenkuana. Awan uray maysa kadagiti mamasiribna ti makaipalawag kenkuana ti kaipapananna dagiti tagtagainepna.

Inikkan ti Dios ni Jose ti sirib a mangipalawag dagiti tagtagainep isunga pinaayaban ti Paraon ni Jose idiay pagbaludan. Impalawag ni Jose dagiti tagtagainep ti Paraon ket kinunana kenkuana, ”Mangted ti Dios ti pito a tawen a nawadwad nga apit ken pito a tawen a panagbisin.”

Naay-ayo ti Paraon iti sirib ni Jose isunga pinagbalinna isuna a maikadua a mannakabalin a mangituray iti Egipto.

Binilin ni Jose dagiti tattao nga agurnongda ti adu nga taraon kabayatan ti pito a tawen a nawadwad nga apit. Naglako ni Jose ti makan idi simmangbay ti pito a tawen ti panagbisin tapno adda ti umdas a makan dagiti tattao.

Nakaro unay ti panagbisin saan laeng nga idiay Egipto no di ket uray pai idiay Canaan a pagnanaedan ni Jacob ken ti pamiliana.

Isunga imbaon ni Jacob dagiti inauna nga annakna a lallaki idiay Egipto tapno gumatang ti makan. Saanda nabigbig ni Jose idi nakatakderda iti sangoananna tapno gumatang ti makan. Ngem nabigbig ida ni Jose.

Kalpasan a pinadas ni Jose dagiti kakabsatna a lallaki no adda nagbalbaliwanda. kinuna ni Jose kadakuada, “Siak ti kabsatyo a ni Jose! Saankayo nga agbuteng. Dakes ti inaramidyo kaniak idi inlakodak a kas adipen. Ngem inaramat ti Dios ti dakes iti pagsayaatantayo! Umaykayo ket makipaggiankayo kaniak ditoy Egipto tapno maipaayko dagiti kasapulanyo.”

Idi nagawiden dagiti kakabsat ni Jose, kasta unay ti ragsak ni Jacob idi imbagada kenkuana a sibibiag pay ni Jose.

Napan latta ni Jacob idiay Egipto uray pay lakay unayen isuna. Kaduana iti amin a pamiliana ket nakipagnaedda amin idiay. Binendisionan ni Jacob ti tunggal maysa kadagiti annakna sakbay a natay isuna.

Ti tulag ti Dios nga inkarina kenni Abraham a naited kenni Isaac a naited kenni Jacob ken kalpasanna ket naited met kadagiti sangapulo ket dua nga annak ni Jacob ken pam-pamiliada. Dagiti kaputotan ti sangapullo ket dua ket isu ti nagbalin a sangapulo ket dua a tribo ti Israel.

Istorya ti Biblia manipud: Genesis 37-50