Dagiti Mangisalakan

Kalpasan a natay ni Josue, sinukir dagiti Israelita ti Dios. Saanda a pinapanaw dagiti nabati a taga Canaan, wenno nagtulnog kadagiti linteg ti Dios. Rinugian dagiti Israelita ti nagdaydayaw kadagiti didiosen dagiti taga Canaan imbes a ni Yahweh, ti pudno a Dios. Awan idi ti ari dagiti Israelita, isu nga inaramid ti tunggal maysa no ania ti pagarupda nga usto para kadakuada.

Nagtultuloy dagiti Israelita a nagsuksukir iti Dios. Gapu iti daytoy, dinusa ida iti Dios. Pinalubosanna a parmeken ida dagiti kalabanda. Tinakawan ida dagiti kabusorda. Dinadaelda pay dagiti sanikuada. Adu ti natay kadakuada. Adu a tawen a pinarparigat ida dagiti kabusorda. Iti dayta a panawen saanda a nagtungpal iti Dios ngem nagbabawi dagiti Israelita. Dinawatda nga isalakan ida iti Dios.

Nangibaon ngarud ti Dios iti mangispal kadakuada manipud kadagiti kabusorda ken mangyeg iti talna iti lugar. Uray no kasta ti inaramid iti Dios, nakalipat manen dagiti tattao. Nangrugida manen a nagdaydayaw kadagiti didiosen. Gapu iti daytoy, impalubos iti Dios nga abaken ida dagiti Midianita. Dagiti Midianita ket maysa a puli iti tattao nga agnanaed iti asideg.

Pito a tawen nga innal-ala dagiti taga Midian amin nga apit dagiti Israelita. Mabuteng launay dagiti Israelita, isu a naglemmengda kadagiti kuweba tapno saan ida a mabirukan dagiti Midianita. Kalpasanna, nagpakaasida iti Dios tapno isalakanna ida.

Maysa nga aldaw, nalimed nga agir- irik iti apitna ti maysa nga Israelita nga agnagan iti Gideon. Ilimlimedna ti panagirikna tapno saan a makita isuna dagiti Midianita ken saanda a takawen dagiti irikna. Bayat ti panagirikna, immay ti anghel iti Yahweh ken ni Gideon ket kinunana, "Adda ti Dios kenka, mannakabalin a soldado! Isalakan mo dagiti Israelita manipud kadagiti Midianita".

Adda ti altar ti ama ni Gideon para iti didiosen. Imbaga iti Dios kenni Gideon a dadaelenna daytoy. Mabuteng ni Gideon kadagiti tattao. Gapu ta mabuteng isuna, inurayna a rimmabii sana binurak ti pagidatonan. Nangipatakder isuna iti pangidatonan a para iti Dios iti abay iti dati nga altar a para iti didiosen. Kalpasan daytoy, nagidaton isuna iti Dios.

Kabigatanna, nakita dagiti tattao nga adda nangburak iti altar. Kasta launay ti ungetda. Napanda iti balay ni Gideon tapno patayenda isuna ngem kinuna iti ama ni Gideon kadakuada, "Apay a tulunganyo ti diosyo? No pudno a dios isuna, masalaknibanna ti bagina". Gapu ta kasta ti imbaga iti ama ni Gideon, saan a pinatay dagiti tattao ni Gideon.

Immay manen dagiti nakaad-adu a Midianita tapno agtakawda kadagiti Israelita. Aduda launay a saandan a mabilang. Inurnung ni Gideon dagiti Israelita tapno labananda ida. Dimmawat ni Gideon iti Dios iti dua a pagilasinan tapno masiguradona nga aramaten isuna iti Dios a mangisalakan kadagiti Israelita.

Kastoy ti inaramid ni Gideon para iti umuna a pagilasinan, nangikabil ni Gideon iti kudil iti karnero iti daga. Dinawatna iti Dios a mabasa laeng iti linnaaw iti agsapa ti kudil iti karnero ken saan dapat a mabasa ti daga. Isu ti inaramid ti Dios daytoy. Iti sumarunu a rabii, dinawatna manen iti Dios a ti daga ket mabasa ngem ti kudil iti karnero ket namaga. Inaramid met iti Dios dayta. Gapu iti daytoy a dua a pagilasinan, namati ni Gideon nga usaren isuna ti Dios a mangisalakan kadagiti Israelita manipud kadagiti Midianita.

Napan kenni Gideon ti 32,000 a soldado nga Israelita ngem kinuna iti Dios nga adu launay dagitoy. Pinagawid ngarud ni Gideon dagiti 22,000 a mabuteng a makilaban. Imbaga iti Dios ken ni Gideon nga adu latta dagita a tattaona. Pinagawid ngarud ida ni Gideon malaksid ti 300 a soldado.

Iti dayta a rabii kinuna iti Dios kenni Gideon, "Sumalog kayo iti kampo dagiti taga Midian ket no mangngegyo no anya ti ibagbagada ket saan kayonton a mabuteng kadakuada. Iti dayta a rabii simmalog ni Gideon iti kampo ket nangngegna ti soldado a Midianita nga ibagbagana iti gayyemna a soldado ti natagtagainepna. Kinuna iti lalaki iti gayyemna, "Ti kaipapanan daytoy a tagtagainep ket parmeken to dagiti soldado ni Gideon datayo a Midianita. Nagdaydayaw ni Gideon iti Dios idi nangngegna daytoy.

Kalpasan daytoy, nagsubli ni Gideon kadagiti soldadona. Inikkanna ida iti saggaysa a tangguyob a sara, banga ken burruong. Pinalikmutanda ti kampo nga ayan dagiti matmaturog a soldado a Midianita. Inkabil dagiti 300 a soldado ni Gideon ti silaw iti uneg dagiti banga tapno saan a makita dagiti Midianita ti lawag dagiti pagsilawanda.

Kalpasanna, naggigiddan dagiti soldado ni Gideon a nangburak kadagiti bangbangada. Dagus a naipakita dagiti apuy kadagiti pagsilawanda. Pinuyotanda dagidiay tangguyubda ken impukkawda, "Makigubat kami para ken ni Yahweh ken ni Gideon."

Riniribok iti Dios dagiti Midianita isu a nagraranget ken nagpipinnatay ti tunggal maysa kadakuada. Dagusda a pinaayab dagiti dadduma pay nga Israelita a nabati kadagiti balbalayda tapno tumulongda a mangkamat kadagiti Midianita. Adu ti pinatayda. Pinapanawda dagiti dadduma pay a Midianita manipud iti Israel. Natay ti 120,000 a Midianita iti dayta nga aldaw. Insalakan iti Dios dagiti Israelita.

Kayat dagiti tattao nga aramiden nga arida ni Gideon. Saan nga immanugot daytoy. Ngem dimmawat ketdi ni Gideon iti balitok a singsing nga innalada manipud kadagiti Midianita. Adu a balitok ti inted dagiti tattao kenni Gideon.

Inaramat ni Gideon dagiti balitok a nagaramid iti naisangsangayan a pagan-anay a kas ti us-usaren iti nangato a padi. Dinayaw dagiti tattao daytoy a kas maysa a didiosen. Gapu iti daytoy, dinusa manen iti Dios dagiti Israelita. Pinalubusan iti Dios a parmeken ida dagiti kabusorda. Kalpasanna, dimmawatda manen iti tulong iti Dios ket nangibaon ti Dios iti sabali a mangispal kadakuada.

Naulit-ulit a napasamak ti kastoy. Agbasol dagiti Israelita ken dusaen iti Dios ida, agpakawanda ket mangibaon manen ti Dios iti mangispal kadakuada. Adu a tawtawen, nangibaon ti Dios iti mangispal kadagiti Israelita manipud kadagiti kabusorda.

Kalpasanna, nagdawat dagiti tattao iti ari kas kadagiti dadduma a nasyon. Kayatda iti ari a natayag ken napigsa ken adda kabaelanna a mangidaulo kadakuada iti gubat. Saan a kayat ti Dios daytoy a kiddawda ngem intedna kadakuada ti ari a kas iti dinawatda.

Isorya ti Bibliya manipud: Uk-ukom 1-3; 6-8