Dagiti Profeta

Iti amin a pakasaritaan dagiti Israelita, nangibaon ti Dios kadagiti profeta kadakuada. Mangmangeg dagiti profeta ti mensahe manipud iti Dios ket ibagada met dagitoy a mensahe kadagiti tattao.

Idi ni Ahab ti ari iti pagarian iti Israel, adda ti maysa a profeta nga agnagan iti Elias. Managdakdakes a tao ni Ahab. Isuna ti nangawis kadagiti tattao nga agrukbabda iti didiosen a ni Baal. Kinuna ni Elias kenni Ahab, “Maawanto ti tudo wenno linnaaw iti pagarian iti Israel inggana nga ibagak nga ummada.” Nagpungtot ni Ahab gapu iti daytoy.

Imbaga iti Dios kenni Elias a mapan aglimmeng iti maysa a waig idiay let-ang, tapno maisalakanna ti biagna manipud kenni Ahab a mangpapatay kenkuana. Saaan a mabirukan ni Ahab ken dagiti soldado ni Elias. Tapno ada ti kanen ni Elias, nangipatulod ti Dios kadagiti uwak iti tinapay ken karne kada agsapa ken rabii. Natianan diay waig gapu iti nakaro a tikag.

Gapu iti dayta, napan ni Elias iti kabangibang a pagilian. Iti dayta a lugar, adda maysa a balo a babai nga addaan iti anak a lalaki. Ngannganidan a maibusan iti kanen gapu iti panagbisin. Inaywananda ni Elias ket insabet iti Dios ti kasapulanda. Binendisionan ida iti Dios isu a saan a pulos a naibusan iti arina ti banga, saan met a naibus ti lana iti bote . Naaddaanda ngarud iti kanen iti panawen iti panagbisin. Nagtalinaed ni Elias idiay iti mano a tawtawen.

Kalpasan iti tallo ket kagudua a tawen, imbaga iti Dios kenni Elias nga agsubli idiay pagarian iti Israel tapno ibagana kenni Ahab a palubosan iti Dios nga agtudo manen. Idi nakita ni Ahab ni Elias kinunana, “Addaka gayam ditoy sika a manangriribuk! Simmungbat ni Elias ket kinuna, “Sika ti manangriribuk! Tinallikudam ni Yahweh, ti pudno a Dios ken nagrukbabka kenni Baal. Ibaonmo dagiti amin a tattao iti pagarian iti Israel a mapanda idiay bantay Carmel.”

Napan amin dagiti tattao iti pagarian iti Israel idiay bantay Carmel, agraman dagiti 450 a profeta ni Baal. Kinuna ni Elias kadagiti tattao, “Mangngedeng kayon nu siasino ti pagserbianyo,” No ni Yahweh ti Dios, agserbikayo kenkuana ngem no ni Baal ti Dios Isuna ti pagserbianyo!”

Kalpasanna, kinuna ni Elias kadagiti profeta ni Baal, “Mangparti kayo iti bulog a baka ket isaganayo kas daton ngem saanyo a pasgedan diay pagidatonan. Kastanto met ti aramidek. Ti Dios a makapasged iti apuy iti daton, isu ti pudno a Dios.” Nangisagana ngarud dagiti papadi ni Baal iti daton ngem saanda a nagpasged iti apuy.

Nagkararag dagiti profeta kenni Baal, kinunada, “Denggenna kami Baal!” Nagkararag ken nagpukpukkawda a nagmalmalem. Sinugsugatda pay dagiti bagbagida babaen iti kutsilyo ngem saan a simungbat ni Baal.

Malemen idi insagana ni Elias ti datonna iti Dios. Imbagana kadagiti tattao nga ibuyatda ti sangapulo ket dua a dadakkel a burnay iti danum iti rabaw iti daton inggana a mabasa ti karne, dagiti kayo ken uray pay ti aglawlaw iti pagidatonan.

Kalpasanna, nagkararag ni Elias ket kinunana, “Yahweh, Dios ni Abraham, Isaac, ken ni Jacob. Paneknekam kadakami ita nga aldaw a sika ti Dios iti Israel ken paneknekam a siak ket adipenmo. Sungbatannak tapno maammoan dagitoy a tattao a sika ti pudno a Dios.”

Dagus a bimmaba ti apuy manipud iti tangatang. Napuuran ti karne, dagiti kayo, bato ken tapuk, uray pay ti danum nga adda iti aglawlaw iti pagidatonan. Idi nakita dagiti tattao daytoy, nagrukbabda iti daga ket kinunada, “Ni Yahweh ti Dios! Ni Yahweh ti Dios!”

Kalpasanna kinuna ni Elias, “Saanyo a palubusan dagiti profeta ni Baal! Tiniliw dagiti tattao dagiti profeta ni Baal. Inyadayo ken pinatayda ida.

Kinuna ni Elias kenni ari Ahab, “Agsublika a dagus idiay siudad ta agtudon.” Saan a nagbayag, simmipnget ti tangatang ket nagtudo iti napigsa. Ditoy ti nagpatinggaan iti panawen iti tikag, ken pinaneknekanna nga isuna ti pudno a Dios.

Kalpasan iti panawen ni Elias, pinili iti Dios ti maysa a tao nga agnagan iti Eliseo tapno agbalin a profetana. Nangaramid ti Dios iti adu a milagro babaen kenni Eliseo. Maysa kadagitoy a milagro ket napasamak kenni Naaman a panguloen dagiti kabusorda. Adda ti nakaro a sakitna iti kudil. Naamoanna dagiti naaramidan ni Eliseo isu a napan isuna kenni Eliseo ket kiniddawna nga agasanna daytoy. Binilin ni Eliseo ni Naaman nga irarebna iti maminpito a daras ti bagina idiay karayan iti Jordan.

Idi umuna, nakaunget ni Naaman ken saanna kayat nga aramiden daytoy ta kasla maysa a minamaag ngem namati metlaeng isuna kadagiti inbaga ni Eliseo. Inrarebna iti namin pito a daras ti bagina idiay karayan iti Jordan. Iti maudi a daras, naagasan ti kudilna. Inagasan iti Dios ni Naaman.

Nangibaon ti Dios iti adu pay a profeta. Imbagada kadagiti tattao nga isardengda ti panagdaydayawda kadagiti didiosen. Imbagada pay nga ipakitada ti asi ken rumbeng a pannakikadua kadagiti dadduma. Binallaagan dagiti profeta dagiti tattao. No saanda nga isardeng ti dakes nga aramidda ken no saanda a rugian nga agtulnog iti Dios, ukomento ida iti Dios agsipud ta nagbasolda ket dusaennanto ida.

Kanayon a saan nga agtultulnog dagiti tattao iti Dios. Parparigatenda a masansan dagiti profeta ken no dadduma, patpatayenda pay ida. Iti naminsan, intinnagda ti profeta a ni Jeremias iti maysa a namagaan a bubon, pinanawanda isuna tapno matay idiay. Limned isuna iti pitak nga adda iti uneg iti bubon isu a naasian ti ari kenkuana. Imbaon iti ari dagiti agserserbi tapno iruarda ni Jeremias manipud iti bubon sakbay a matay daytoy.

Nagtultuloy a nagsao dagiti profeta maipaay iti Dios uray no kagurgura ida dagiti tattao. Binallaaganda dagiti tattao a dusaen ida ti Dios no saanda nga agbabawi kadagiti basbasolda. Impalagipda met kadagiti tattao ti kari nga umayto ti Messias iti Dios.

Istorya iti Biblia manipud: 1Ar-ari 16-18; 2 Ar-ari 5; Jeremias 38