Ti Tulag ti Dios ken ni David

Ni Saul ti umuna nga ari ti Israel. Kayat dagiti tattao ni Saul gapu ta nataraki ken natayag isuna. Nasayaat nga ari ni Saul idi umun-una a tawtawen ti panagturayna iti Israel, ngem nagbalin isuna a dakes ket saanen nga agtultulnog iti Dios. Gapu iti dayta, nagpili ti Dios ti sabali tapno sumukatto nga ari kenni Saul.

Adda ti maysa a baro nga Israelita nga agnagan ti David, pinili isuna ti Dios tapno sumukat ken ni Saul nga ari ti Israel. Maysa nga agayaywan ti karnero ni David a naggapu iti Bethlehem. Iti naduma-duma a tiempo iti panagaywanna kadagiti karnero ti amana, nakapatay ni David ti leon ken oso a nangdarup kadagiti karnero. Napakumbaba ken nalinteg ni David, nagtalek ken nagtulnog isuna iti Dios.

Nagbalin a nalaing a panguloen ken soldado ni David. Idi baro pay laeng isuna ket inabakna ni Goliath a maysa nga higante. Nalaing a soldado ni Goliath, napigsa isuna ken nganngani a tallo metro ti kinatayagna. Insalakan ni David ti Israel babaen ti tulong ti Dios. Kalpasanna, adu pay a kabusor ti Israel iti inabakna. Gapu ditoy, dinayaw dagiti tattao ni David.

Nagimon ni Saul gapu ti kasta unay nga ayat ti tattao kenni David. Namin-adu a pinadas ni Saul a patayen ni David, isunga naglemmeng ni David kenkuana. Maysa nga aldaw, binirbirok ni Saul ni David tapno patayenna isuna. Napan ni Saul idiay kueba a paglemlemmengan ni David ngem saanna isuna a nakita. Asideg laeng ni David kenni Saul, mabalinna koma a patayen isuna ngem saanna a pinatay ni Saul. Nangpigis isuna ti bado ni Saul tapno mapaneknekanna a saanna a kayat nga patayen ni Saul tapno agbalin nga ari.

Nagbalin met lang nga ari ni David iti Israel idi natay ni Saul iti gubat. Nasayaat isuna nga ari ken ay-ayaten isuna dagiti tattao. Binendisionan ti Dios ni David isunga nagballigi isuna. Adu a gub-gubat ti napanan ni David, inabakna dagiti kabusor ti Israel babaen ti tulong ti Dios. Pinarmek pay ni David ti Jerusalem ket inaramidna a sentro ti siudad. Nagbalin a nabaknang ken napigsa a nasion ti Israel kabayatan ti panagturay ni David.

Kayat ni David ti mangpatakder ti templo a lugar a mabalin a pagdayawan ken pangidatonan dagiti Israelita kadagiti datdatonda maipaay iti Dios. Agdaydayaw ken agidatdaton laeng dagiti Israelita iti Dios idiay tolda a paguumongan nga impaaramid ni Moises iti 400 a tawtawen.

Imbaon ti Dios ti profeta a ni Natan tapno mangibaga ti mensahe ken ni David, kinunana, “Saan a sika ti mangipatakder ti templo gapu ta mannakigubatka. Ipatakderto ti anakmo a lalaki ti templo para kaniak ngem bendisionanka. Maysanto kadagiti kaputotam ti agari kadagiti tattaok nga agturay iti agnanayon!” Ti Mesias laeng ti kaputotan ni David a mabalin nga agturay iti agnanayon. Ti Mesias ti pinili ti Dios a mangisalakan kadagiti tattao kadagiti basbasolda.

Idi nangngeg ni David dagitoy, nagyaman a dagus ken nagdayaw isuna iti Dios gapu ta inkarina a dayag ken iti adu a bendision ti Dios kenkuana. Saan nga ammo ni David no kaano a mapasamak dagitoy. Kabayatan a matungpal daytoy, masapul nga aguray dagiti Israelita ti nasurok a sangaribu a tawen.

Nagturay ni David nga adda ti hustisia ken kinapudno iti adu a tawtawen ken binendisionan isuna ti Dios. No man pay kasta, nakaro ti basol a naaramid ni David iti kamaudianan ti biagna.

Maysa nga aldaw, idi makigub-gubat amin a soldado ni David iti adayo kadagiti balayda. Timman-aw ni David iti ruar ti palasyo ket nakitana ti napintas a babae nga agdigdigos, ni Batseba.

Imbes a saanna a kitaen ni Batseba, impaayab ni David ni Batseba iti taona. Kinaidda ni David ni Bathseba sana pinagawid idiay balayda. Saan a nagbayag, impakaammo ni Batseba kenni David a masikog isuna.

Pinaayaban ni David ti asawa ni Batseba a ni Urias, manipud idiay gubat. Maysa kadagiti kalalaingan a soldado ni David ni Urias. Imbaonna ni Urias nga agawid tapno makadua kenni Batseba ngem saan nga inaramid ni Urias ti imbilin ni David kabayatan ti pannakigubat dagiti kakaduana, isunga pinasubli ni David ni Urias idiay paggugubatan, imbilinna iti heneral nga ipanna ni Urias idiay lugar a napigpigsa dagiti kabusorda tapno matay isuna.

Inasawa ni David ni Batseba kalpasan a natay ni Urias. Saan a nagbayag, inyanak ni Batseba ti anakda kenni David. Saan a naay-ayo ti Dios iti inaramid ni David isunga imbaonna ni profeta a Natan tapno ibagana kenni ni David ti kinadakes ti basol nga inaramidna. Pinakawan ti Dios ni David gapu ta nagbabawi isuna. Manipud idi, nagtulnog ni David iti Dios uray pay kadagiti naririgat a panawen.

Natay ti ubing nga inyanak ni Batseba a kas dusa ti basol ni David. Naglalaban ti pamiliana. Kimmapsot ti pannakabalin ni David. Uray pay nakaaramid ni David ti nakaro a basol iti Dios, nagtalinaed a napudno ti Dios kadagiti karkarina kenkuana. Kalpasanna, naaddaan manen ni David ken ni Batseba ti anak a lalaki, Solomon ti impanaganda kenkuana.

Istorya ti Biblia manipud: 1Samuel 10; 15-19;24;31; 2 Samuel 5;7; 11-12