Ti Nabaknang a Panguloen
Iti maysa nga aldaw, adda iti maysa nga agtutubo a panguloen a napan kenni Jesus. Sinaludsodna ken Jesus, “Naimbag a manursuro, ania kadi ti rumbeng nga aramidek tapno maadaannak iti biag nga agnanayon?” Kinuna ni Jesus kenkuana, “Apay nga inawagannak iti naimbag? Ti Dios laeng ti naimbag. Ngem no kayatmo a maaddaan iti biag nga agnanayon, agtulnogka kadagiti linteg iti Dios.”
Nagsaludsod ti panguluen. “Ania ti nasken a surotek?” Simungbat ni Jesus ket kinuna, “Saanka a pumatay, saanka a makikamalala. Saanka nga agtakaw. Saanka nga agulbod. Dayawem dagiti nagannakmo ken ayatem ti karrubam a kas iti panagayat mo iti bagim.”
Ngem kinuna iti panguloen, “Inaramidko dagita a linteg manipud pay idi ubingak. Ania pay kadi ti nasken nga aramidek tapno maaddaanak iti biag nga agnanayon?” Kinita ni Jesus isuna ket kinaassianna daytoy.
Simmungbat ni Jesus, “No kayatmo ti agbalin a naan-anay, mapanmo ilako dagiti amin a sanikuam. Itedmo ti kuwartam kadagiti marigrigat ket maaddaan kanto iti kinabaknang idiay langit. No maaramidmo daytoy, umayka ket surotennak.”
Nagliday ti panguloen idi nanggegna ti kinuna ni Jesus. Gapu ta baknang isuna, saanna a kayat nga ipaay dagiti sanikuana. Gapu iti dayta, pinanawanna ni Jesus.
Kalpasan daytoy, kinuna ni Jesus kadagiti adalanna, “Nagrigaten aya a makastrek dagiti nababaknang iti pagarian iti Dios! Nalaklaka pay a sumrek ti kamelio iti abut iti dagum ngem ti nabaknang a tao a sumrek iti pagarian iti Dios.”
Nasdaaw dagiti adalan idi nangngegda ti imbaga ni Jesus, ket kinunada, “Siasino ngarud ti mabalin a maisalakan?”
Kimmita ni Jesus kadagiti adalanna ket kinunana, ‘Kadagiti tattao ket saan a mabalin daytoy; ngem iti Dios awan ti banag a saan a mabalin.”
Kinuna ni Pedro kenni Jesus, “Linipat mi amin a sanikuami ket sinurot daka. Anianto met ti magun-od mi?”
Simmungbat ni Jesus, “No siasinoman ti makabael a mangpanaw iti balayna, kakabsatna, nagannakna, annak, wenno sanikuana gapu kaniak, makaawat to iti ad-adu a kinabaknang ken makaawat pay iti biag nga agnanayon. Ngem adu dagiti umun-una nga maud-udinto ken adu met dagiti maud-udi nga umun-unanto.”
Istorya iti Biblia manipud Mateo 19:16-30; Marcos 10:17-31; Lucas 18:18-30