Ti Nagudua a Pagarian

Natay ni David kalpasan iti adu a tawen. Nangrugi a nagturay ti anakna a ni Solomon iti Israel. Nagtimek ti Dios kenni Solomon, sinasulsodna no anya ti kangrunaan a kayatna. Naragsakan ti Dios idi dinawat ni Solomon nga aramidenna isuna a nasirib. Pinagbalinna ni Solomon a kasiriban iti sangalubongan. Adu a banag ti naamoan ni Solomon. Nagbalin isuna a nasirib nga ukom. Pinagbalinpay isuna iti Dios a nakabakbaknang.

Impatakder ni Solomon ti Templo idiay Jerusalem. Pinanggep idin iti amana a ni David nga ipatakder daytoy a templo. Inyurnonganna pay idi iti materyales daytoy. Nagdaydayaw ken nagidaton dagiti tattao iti Dios idiay templo. Sigud nga ar-aramidenda dagitoy idiay Tolda iti Pagu-ummungan. Immay ken nagnaed ti presensya iti Dios idiay templo, iti sibay dagiti tattaona.

Nagayat ni Solomon kadagiti babbai a naggapu iti naduma-duma a nasyon. Sinukirna ti Dios. Nangasawa ni Solomon iti agarup 1000 a babbai. Adu kadagitoy a babbai ti naggapu iti naduma-duma a nasyon. Intugut dagitoy a babbai dagiti didiosenda ket intultuloyda a dinaydayaw dagitoy. Idi limmakayen ni Solomon, dinaydayawna metten dagitoy a didiosen.

Nakaunget ti Dios kenni Solomon. Gapu iti dayta, kas dusa iti panangsukir ni Solomon iti Dios, inkarina nga pagsinaennanto ti pagarian iti Israel kalpasan iti pannakatay ni Solomon.

Kalpasan a natay ni Solomon, nagbalin nga ari ti anakna a ni Rehoboam. Maag a tao ni Rehoboam. Nagmaymaysa amin a tao iti Israel tapno patalgendanda ti kinaarina. Nagriri dagiti tattao ken ni Rehoboam. Imbagada a pinarigat ida ni Solomon. Imbagada a pinagtrabaho ida ni Solomon iti nadagsen ken pinagbayadna ida iti adu a buwis.

Minamaag a simmungbat ni Rehoboam, "Ipagarupyo a pinarigatna kayo iti amak a ni Solomon ngem narigrigat to pay ti ipaaramidko kadakayo. Dusaen kayonto iti nakarkaro pay ngem kadagiti inaramidna.

Gapu iti dayta nga imbaga ni Rehoboam, nagrebelde ti sangapulo a tribu iti Israel maibusor kenkuana. Dua laeng a tribu ti nagtultuloy a nagtalek ken ni Rehoboam. Dagitoy nga dua a tribu ti nagbalin a pagarian iti Judah.

Dinutokanda ni Jeroboam nga agbalin nga ari dagiti sangapulo a tribu ti Israel a nagrebelde kenni Rehoboam. Impatakderda ti pagarianda iti amianan. Inawaganda ti pagarianda nga Israel.

Nagrebelde ni Jeroboam iti Dios. Insungsungna dagiti tattao nga agbasol. Nangipatakder isuna iti dua a didiosen. Dinaydayaw dagiti tattao dagitoy a didiosen imbes a mapanda idiay Templo iti Judah nga agdayaw iti Dios.

Nagbalin nga agkabusor ti pagarian iti Judah ken Israel ket kankanayon dagitoy nga aglaban.

Nadangkes amin nga ari iti baro a pagarian iti Israel. Adu kadagitoy nga ari ket pinatay dagiti dadduma nga Israelita nga agtartarigagay nga agbalin nga ari.

Nagdaydayaw dagiti amin nga ari ken dagiti tattao iti Israel kadagiti didiosen. Ti panagdayawda kadagiti didiosen ket masansan a pakairamanan iti kinaderrep ken panagidatonda kadagiti ubbing.

Kaputotan ni David dagiti ari iti Judah. Nasayaat ken sipupudno ti panagturay dagiti dadduma nga arida. Managdayawda pay iti Dios. Uray no kasta, nadangkes ken naagum ti kaaduan kadagiti ari iti Judah, agdaydayawda pay kadagiti didiosen. Indaton pay dagiti dadduma nga ari dagiti bukodda nga annak kadagiti didiosen. Nagrebelde ti kaaduan kadagiti tattao iti Judah iti Dios. Nagdaydayawda pay kadagiti didiosen.

Istorya ti Biblia manipud: 1 Ar-Ari 1-6; 11-12