Ni Esteban ken ni Felipe

Maysa kadagiti panguloen ti immuna nga Iglesia ket ni Esteban. Nasayaat ti kababalinna, napnoan pay isuna ti pannakabalin ti Espiritu Santo a mangmangted ti kinasirib kenkuana. nangaramid isuna ti adu a milagro. Makapaawis ti panangisuro ni Esteban a masapul a mamati dagiti tattao kenni Jesus.

Maysa nga aldaw, bayat ti panangisuro ni Esteban maipapan kenni Jesus, adda dagiti Judio a nakisupiat kenkuana, saan a mamati dagitoy kenni Jesus. Nakaungetda kenni Esteban ket gapu ditoy, nagulbodda kadagiti panguloen ti relihiyon ket kinunada a,"Nangngegmi nga agsasao daytoy a tao ti dakes a banbanag a maibusor kenni Moises ken iti Dios!" Isunga impatiliw dagiti panguloen ti relihion ni Esteban. Impanda isuna idiay ayan ti kangatoan a padi ken dadduma pay a pang-panguloen ti Judio. Adu pay ti ulbod a saksi ti napan idiay tapno mangibaga ti kinaulbod maipapan kenni Esteban.

Sinaludsod ti kangatoan a padi ni Esteban, “Pudno kadi dagiti imbagada maipapan kenka?” Simmungbat ni Esteban babaen iti panangpalagipna kadagiti naiimbag a banbanag nga inaramid ti Dios manipud idi tiempo ni Abraham agingga iti tiempo ni Jesus. Impalagipna met no kasano ti agtultuloy a panangsukir dagiti tattao ti Dios kenkuana. Kalpasanna daytoy ket kinunana, “Dakayo a saan a dumdumngeg ken managrebelde a tattao, kankanayonyo a sukiren ti Espiritu Santo. Kasta met ti inaramid dagiti kapuonanyo, saanda laeng a sinukir ti Dios no di ket pinatayda pay dagiti profeta. Nakarkaro pay ketdi ti basol nga inaramidyo! Pinatayyo ti Mesias."

Idi nangngeg dagiti panguloen ti relihion dagiti imbagana, inabbunganda dagiti laplapayagda gapu iti ungetda. Nagpukkawda ti napigsa ken ginuyodda ni Esteban iti ruar ti siudad tapno patayenda babaen iti panangbato kenkuana.

Nagpukkaw ni Esteban sakbay a matay isuna, kinunana, “Jesus, awatemon daytoy Espirituk.” Kalpasanna, nagparintumeng isuna ken nagppukaw manen, “Apo, saanmo kadi nga ibilang a basolda daytoy nga ar-aramidenda kaniak." Kalpasan daytoy ket natayen isuna.

Adda maysa a lalaki nga agnagan ti Saulo, immanamong isuna kadagiti tattao a nangpapatay kenni Esteban. binantayanna pay dagiti pagan-anayda kabayatan a bat-batoenda ni Esteban. Iti dayta nga aldaw, adu dagiti tattao idiay Jerusalem ti nangparparigat kadagiti tattao a namati kenni Jesus isunga pimmanaw dagiti namati ket napanda kadagiti naduma-duma a lugar. Nu man pay kasta, intultuloy dagiti namati a nangasaba iti maipapan kenni Jesus sadinno man ti papananda.

Gapu iti pannakaparparigat kadakuada. Pimmanaw ti maysa kadagiti namati, ni Felipe nga adalan ni Jesus. Napan isuna idiay Samaria ken inkasabana dagiti banbanag maipapan kenni Jesus sadiay, adu ti naisalakan a tattao gapu ti panangasabana. Maysa nga aldaw, imbaga ti anghel ti Dios kenni Felipe a mapan iti maysa a dalan idiay let-ang. Bayat ti pannagnana iti dalan ti let-ang, nakita ni Felipe ti maysa a nangato nga opisial manipud idiay Etiopia a nakalugan iti maysa a karwahe. Imbaga ti Espiritu Santo kenni Felipe a katungtongen daytoy a tao.

Idi immasideg ni Felipe iti karwahe, nangngegna a basbasaen ti opisial a taga Etiopia ti insurat ni profeta nga Isaias. kunana, “Impanda isuna a kas maysa a karnero a mapapatay. kas maysa a karnero a naulimek, saan isuna pulos a nagsasao. Nakaro ti panangparigatda kenkuanda. Saanda a rinaem ken Pinatayda pay isuna.”

Sinaludsod ni Felipe ti opisial, “Matarusam kadi dayta basbasaem?” Simmungbat ti taga Etiopia, “Saanko matarusan daytoy malaksid no adda ti mangilawlawag kaniak. Umayka ta agtugawka ti abayko. Ni Isaias kadi ti ibagbagana ditoy suratna wenno sabali?"

Impalawag ni Felipe iti opisial a ti insurat ni Isaias ket maipapan kenni Jesus. Nangaramat met ni Felipe kadagiti dadduma a naisurat a sao ti Dios tapno maibagana ti Naimbag a Damag maipapan kenni Jesus.

Bayat iti panagdaliasat ni Felipe ken ti opisial a taga Etiopia, nakakitada ti maysa a dan-aw. Imbaga ti taga Etiopia, “Kitaem! Adda ti dan-aw! Mabalinak kadi a bautisaran?” Insardengda ti karwahe.

Napanda iti ayan ti dan-aw ket binautisaran ni Felipe ti opisial a taga Etiopia. Kalpasan a simmang-atda manipud iti dan-aw, Impanaw a dagus ti Espiritu Santo ni Felipe ket impanna iti sabali a lugar. Intultuloyna idiay ti panangasabana kadagiti tattao ti maipapan kenni Jesus.

Nagtultuloy met a nagdaliasat ti opisial a taga Etiopia paawid idiay ayanda. Naragsak isuna ta naam-ammona ni Jesus.

Istorya ti Biblia manipud: Dagiti Aramid 6:8-8:5;8:26-40