Ti Tulag ti Dios ken ni Abraham

Adu a tawen kalpasan iti layus, immadu manen ti tattao ditoy daga. Maysa laeng ti us-usarenda a pagsasao. Imbilin iti Dios kadakuada nga aganakda iti adu tapno mapunno ti lubong iti tao, ngem saanda a nagtungpal iti Dios no di ket nagu-ummungda ken nagaramidda iti maysa a siudad.

Nakapalpalangguad dagiti tattao ket saandan nga inkaskaso ti bilin iti Dios. Nangrugida payen a nangipatakder iti maysa a nakangatngato a torre tapno madanonna iti langit. Nakita iti Dios a no itultuloyda iti agmaymaysa nga agaramid iti dakes, mabalinda a makaaramid iti ad-adu pay a pakabasolan.

Gapu iti daytoy, binaliwan iti Dios ti pagsasaoda. Nangaramid ngarud ti Dios iti nadumaduma a pagsasao isu a saanen nga nagkikinnaawatan dagiti tattao, agsipud ta naaddaanda iti agduduma nga klase ti pagsasao. Inwaras iti Dios dagiti tattao iti nadumaduma a paset iti lubong. Ti rinugianda a pinatakder a siudad ket maawagan iti Babel a ti kayatna a sawen, “mariribukan.”

Kalpasan iti ginasut a tawtawen, nagsao ti Dios iti maysa a tao, Abram ti naganna. Kinuna iti Dios kenkuana, “Panawam ti pagiliam ken ti pamiliam ket mapanka iti daga nga ipakitak kenka. Bendisionankanto ket maaddaanka iti adu a kaputotan ken agbalinda a nabileg a nasion. Bendisionankanto ket agdinamagto ti naganmo. Bendisionak dagiti mangbendision kenka, ilunodko dagiti mangilunod kenka. Mabendisionan amin a pampamilia ditoy lubong gapu kenka.”

Nagtulnog ni Abram iti Dios. Intugotna ti asawana a ni Sarai agraman dagiti amin nga adipenna ken amin dagiti sanikuana. Napanda iti daga nga impakita iti Dios kenkuana, ti daga iti Canaan.

Idi nakadanon ni Abram idiay Canaan, kinuna iti Dios “Kitaem ti aglawlaw mo. Itedko kenka ken kadagiti kaputotam amin a daga a makitkitam a kas tawidyo.” Kalpasanna, nagnaed ngarud ni Abram iti dayta a pagilian.

Maysa nga aldaw, nagsabat da Abram ken Melkizedek. Padi iti kangatoan a Dios ni Melkizedek. Binendisionan ni Melkizedek ni Abram a kinunana, “Bendisionan koma iti Dios a Kangatoan nga akinkukua iti langit ken daga ni Abram.” Kalpasanna, inted ni Abram ken ni Melkizedek ti apagkapullo iti amin a sanikuana.

Naglabas ti adu a tawtawen ngem awan latta iti anak da Abram ken Sarai. Nagsao ti Dios ken ni Abram, inkarina manen a maaddaan isuna iti anak a lalaki ken kaputotan a kas kaadu dagiti bitbituen iti tangatang. Namati ni Abram iti kari ti Dios. Inawagan ti Dios a nalinteg ni Abram gapu ta namati kadagiti karkarina.

Nangaramid iti Dios iti tulag ken ni Abram. Ti katulagan ket maysa a napagnunumoan iti dua a gunglo. Kinuna iti Dios, “Ikkankayo ken ni Sarai, nga asawam, iti maysa nga anak a lalaki. Itedko ti daga iti Canaan kadagiti kaputotam.” Kadagita a panawen, awan pay laeng ti anak ni Abram a lalaki.

Istorya iti Biblia manipud: Genesis 11-15