Ni Pablo ken Silas idiay Filipos

Iti panagdalyasat ni Saul iti pagarian iti Roma, inusarna ti naganna a Romano a “Pablo”. Maysa nga aldaw, napan ni Pablo ken ti gayyemna a ni Silas idiay ili iti Filipos tapno iwaragawagda ti naimbag a damag maipapan kenni Jesus. Napanda iti igid iti karayan a pagrukrukbaban dagiti tattao idiay ruar iti siudad. Naam-ammuda sadiay ti maysa nga agtagtagilako a babai nga agnagan iti Lydia. Ay-ayaten ken daydayawenna ti Dios.

Tinulungan iti Dios ni Lydia tapno mamati isuna iti mensahe a maipapan kenni Jesus. Nagpabautisar isuna ken ti pamiliana. Inawis ni Lydia ni Pablo ken ni Silas nga agtalinaedda paylaeng idiay balayna. Nakipagnaed ngarud ni Pablo ken ni Silas iti pamilia ni Lydia.

Kankanayon a makisinsinnarak ni Pablo ken ni Silas kadagiti tattao iti lugar a pagkarkararaganda. Iti inaldaw a panpannagnada, adda sumursurot kadakuada a maysa nga adipen a babai a linuganan iti demonyo. Kabaelan daytoy a babai ti mangipadto iti masakbayan babaen iti demonyo isu a dakkel ti kuarta a mabirbirukan iti amona.

Tunggal lumabasda, kankanayon nga ipukpukkaw iti babai nga adipen ti, “Agserserbi dagitoy iti Kangatoan a Dios. Ibagbagada kadakayo ti wagas tapno maisalakankayo!” Ibagbagana a kanayon daytoy isu a nauma ni Pablo kenkuana.

Kamaudiananna, iti maysa nga aldaw idi ruggian iti adipen a babai ti agpukkaw, sinango ni Pablo daytoy ket kinunana iti demonyo nga adda iti babai, “Iti nagan ni Jesus! Rumuarka kenkuana.” Pimmanaw a dagus ti demonyo iti bagi iti adipen a babai.

Kasta unay ti pungtot iti lalaki nga amo iti adipen a babai! Naamirisda a no awan ti demonyo, saan a kabaelan iti babai a mangipadto iti masakbayan dagiti tattao. Kayatna a sawen, saan metten nga agbayad dagiti tattao iti amo iti babai gapu iti pannakaipadto iti mapasamak kadakuada.

Gapu iti dayta, impan dagiti amo iti adipen a babai ni Pablo ken ni Silas kadagiti agturturay idiay Roma. Dinangranda ida ken inkabilda iti pagbaludan.

Inserrekda ni Pablo ken ni Silas iti katatalgedan a pagbaludan ken inkawarda pay dagiti saksakada. Idi katengngaan iti rabii, nagkankantada kadagiti pammadayaw iti Dios.

Kellaat a nagginggined iti napigsa! Naglukat dagiti amin a ruangan iti pagbaludan ket naikkat dagiti kawar dagiti amin a balud.

Idi nakariing ti guardia, nakitana a nakalukat ti ruangan dagiti pagbaludan, kasta unay ti danagna! Impagarupna a nakalibas dagiti amin a balud isu a pinanggepna a patayen ti bagina. (Ammona a patayen isuna dagiti opisial iti Roma no makalibas dagiti balud). Nakita ni Pablo isuna ket pinukkawanna, “Isardengmo dayta! Saanmo a dangran ta bagim. Adda kami amin ditoy.”

Agtigtigerger ti guwardia a napan iti ayan ni Pablo ken ni Silas ket sinaludsodna, “Ania ti rumbeng nga aramidek tapno maisalakanak?” Simmungbat ni Pablo ket kinunana, “Mamatika kenni Apo Jesus ket maisalakanka ken ti pamiliam.” Kalpasan daytoy, intugot iti guwardia ni Pablo ken ni Silas idiay balayna ket inugasanna dagiti sugsugatda. Inkasaba ni Pablo ti naimbag a damag maipapan kenni Jesus iti amin nga adda idiay balayda.

Namati ti guwardia ken ti pamiliana kenni Jesus ket nabautisaranda. Nangted ti guwardia iti makan kenni Pablo ken ni Silas ket nagrag-oda amin.

Kabigatanna, pinalubosan dagiti panguloen iti siudad ni Pablo ken ni Silas manipud iti pagbaludan. Kiniddawda kadakuada a pumanawdan idiay Filipos. Sinarungkaranda ni Lydia ken dagiti daduma pay a gagayyemda iti dayta a siudad sakbayda a pimmanaw. Nagtultuloy a naiwaras ti naimbag a damag a maipapan kenni Jesus. Nagtultuloy met nga immadu dagiti namati ken Cristo.

Nagdalyasat ni Pablo ken dagiti dadduma a panguloen a Kristiano kadagiti adu a siudad. Inkasaba ken insuroda kadagiti tattao ti naimbag a damag maipapan kenni Jesus. Nagaramidda iti adu a surat tapno mapabileg ken masuroan dagiti namati kadagiti kapilya. Nagbalin a paset iti Biblia ti dadduma kadagitoy.

Istorya iti Biblia manipud: Aramid 16:11-40