Ti Istorya ti Mannalon

Maysa nga aldaw agisursuro ni Jesus kadagiti tattao iti igid ti dan-aw. Adu dagiti tattao a napan tapno dumngeg kenkuana. Naglugan ni Jesus iti maysa a bangka iti igid ti danum tapno maaddaan ti paggiananna. Nagtugaw isuna iti bangka ket insurona dagiti tattao.

Nagistorya ni Jesus, “Adda ti maysa a mannalon a nagmula kadagiti bukel. Bayat ti panangimurumorna dagiti bukel, adda ti nagdisso iti dalan. Immay dagiti billit ket kinnanda amin dagidiay a bukel.”

“Adda met ti dadduma a nagdisso iti kabatbatoan a bassit laeng ti dagana. Nagtubo a dagus dagitoy a bukel ngem saan unay a nagramut. Nalaylay ken natay dagiti mula idi nainitan.

“Nagdisso met dagiti dadduma iti kasisiitan. nagtubo dagiti bukel ngem linapdan dagiti siit isunga saan pulos a nagbunga.”

“Nagdisso met dagiti dadduma a bukbukel iti nadam-eg a daga. Nagbunga dagitoy ti ad-adu pay ngem kadagiti naimula a bukel. Agdengngegkayo amin a makangkangngeg kadagiti ibagbagak!"

Mariribukan dagiti adalan iti daytoy nga istorya isunga impalawag ni Jesus ti kaipapananna. Kinunana, “Mayarig ti sao ti Dios iti bukel. Ti tao a nakangngeg iti sao ti Dios ket ti dalan. Saan a naawatan ti tao daytoy gapu ta tinakaw ti diablo ti sao kenkuana."

“Ti kabatbatoan ket mayarig iti tao a naragsak a nakangngeg ken namati iti sao ti Dios, ngem saanna kayaten nga agtulnog iti Dios idi nakapadas isuna ti nalabes a panakaparparigat.”

“Mayarig met ti kasisiitan iti tao a nakangngeg iti sao ti Dios ngem idi naglabas ti panawen, napukaw ti panagayatna iti Dios gapu kadagiti pakadanagan a parikut iti biag, tarigagay a bumaknang ken panagaramid kadagiti banbanag a makaited ti ragsak. Gapu iti daytoy, saan a makita dagiti sursuro ti Dios kadagiti aramidna.

“Mayarig met iti nadam-eg a daga iti tao a nakangngeg iti sao ti Dios, pinatina daytoy isunga makita dagiti sursuro ti Dios kadagiti aramidna."

Istorya ti Bibliya manipud: Mateo 13:1-8, 18-23; Marcos 4:1-8, 13-20; Lucas 8:4-15