Pinakan ni Jesus ti 5,000 a Tattao

Imbaon ni Jesus dagiti apostolna tapno mangasaba ken mangisuro kadagiti tattao iti naduma-duma a bario. Kalpasanna, nagsublida kenni Jesus ket imbagada kenkuana dagiti inaramidda. Inawis ni Jesus ida a sumurot kenkuana iti maysa a naulimek a lugar iti ballasiw ti dan-aw. Nagluganda ngarud iti bangka tapno makainanada idiay.

Nakita ti adu a tattao a naglugan ni Jesus ken dagiti adalanna iti bangka. Nagtatarayda iti igid ti dan-aw tapno umun-unada a makadanon idiay bangir. Idi nakaballasiw ni Jesus ken dagiti adalanna, agur-uray kadakuada ti nagadu a tattao.

Ti bilang dagiti tattao nga adda idiay ket nasurok nga 5,000 a lallaki malaksid pay kadagiti babbai ken ub-ubbing a kaduada. Naasian unay ni Jesus kadagiti tattao, para kenkuana, kas lada a karnero nga awan ti mangayaywan kadakuada. Insurona ken inagasanna dagiti adda sakitna kadakuada.

Idi rumabiin, kinuna dagiti adalan ni Jesus kenkuana, “Rumabiin ket awan ti ili nga asideg ditoy. Pagawidemon dagiti tattao tapno makabirokda iti makanda.”

Kinuna ni Jesus kadagiti adalanna, “Ikkanyo ida iti kanenda!” Simmungbatda, “Kasano nga aramidenmi dayta? Adda laeng iti lima a tinapay ken dua a babassit nga ikanmi.”

Binilin ni Jesus dagiti adalanna a patugawenda dagiti tattao iti karuruotan, saglilima a pulo ti tunggal bunggoy.

Innala ni Jesus ti lima a tinapay ken dua nga ikan. Timmangad ni Jesus iti langit ken nagyaman iti Dios gapu kadagiti makan.

Kalpasanna ket pinisipisi ni Jesus dagiti tinapay ken ikan. Imbaonna dagiti adalanna tapno iwarasda ti makan kadagiti tattao. Saan a nagsarsardeng dagiti adalan a nangiwarwaras ti makan ket saanda a naib-ibusan! Nakapangan ken nabsog amin dagiti tattao.

Kalpasan daytoy, inurnong dagiti adalan dagiti sobra a makan ket napunnona pay iti sangapulo ket dua a basket! Naggapu amin dagitoy a makan manipud iti lima a tinapay ken dua nga ikan.

Istorya ti Bibliya manipud: Mateo 14:13-21; Mark 6:31-44; Lucas 9:10-17; Juan 6:5-15