Ti Paskua

Binallaagan ti Dios ti Paraon nga patayenna dagiti amin nga inauna nga annak a lallaki dagiti Egipcio, tattao ken ay-ayup, no saanna a wayawayaan dagiti Israelita. Idi nangngeg ti Paraon daytoy, saan latta isuna a namati ken nagtulnog iti Dios.

Nangaramid ti Dios iti wagas tapno maisalakanna dagiti inauna a lallaki iti asinnoman a mamati kenkuana. Masapul nga agpili ti tunggal pamilia ti urbon a karnero nga awan ti pakapilawanna tapno patayen.

Imbaga ti Dios kadagiti Israelita a mangikabilda ti dara ti urbon a karnero iti hamba dagiti ruangan ti balbalayda, kalpasanna ket itunoda diay karne ken partakanda a kanen agraman ti tinapay a naaramid nga awan ti lebadurana. Kinuna pay ti Dios kadakuada nga sakbay a manganda ket rumbeng laeng a nakasaganadan a pumanaw iti Egipto.

Inaramid met ngarud dagiti Israelita amin nga imbilin ti Dios kadakuada. Kabayatan iti tengnga ti rabii, napan ti Dios ti aglawlaw ti Egipto ket pinapatayna amin nga inauna nga annak a lallaki.

Amin a ruangan ti balbalay dagiti Israelita ket napalawlawan ti dara isunga linabsan ti Dios dagiti balbalayda. Saan a pinapatay ti Dios ti amin nga adda iti uneg dagiti balbalay. Naisalakanda gapu ta nangikabilda ti dara ti urbon a karnero a kas imbilin ti Dios kadakuada.

Ngem saan latta a pinatpati dagiti Egipcio ti Dios ken saanda a nagtunog iti imbilinna. Isunga saan a linabsan ti Dios dagiti balbalayda. Pinapatay ngarud ti Dios dagiti amin nga inauna nga annak a lallaki dagiti Egipcio.

Natay dagiti annak dagiti nakabalud uray pay ti anak ti Paraon. Gapu iti daytoy a pasamak ket nagladingit ti adu a tattao iti Egipto.

Iti dayta met laeng a rabii, pinaayaban ti Paraon ni Moises ken Aaron. Kinunana kadakuada, “Pumanawkayo a dagus ditoyen! isurotmo amin nga Israelita!” Pinilit met dagiti Egipcio dagiti Israelita a pumanaw a dagus.

Istorya ti Biblia manipud: Exodo 11:1-12:32