Nangisuro ni Jesus iti Nadumaduma nga Istorya
Nangisuro ni Jesus iti ad-adu pay nga istorya maipapan ti pagarian ti Dios. Kinunana, “Mayarig ti pagarian ti Dios iti bukel ti mustasa nga immula ti maysa a tao iti talonna. Ammoyo a bukel ti mustasa ti kabassitan kadagiti amin a bukel.”
“Inton agtubo ti bukel ti mustasa, agbalin a kadakkelan kadagiti isu amin a mulmula iti minuyongan. Gapu iti dayta, mapmapan dagiti billit ken agininanada kadagiti sangana.”
Nangisuro pay ni Jesus iti sabali nga Istorya, “Mayarig ti pagarian ti Dios iti lebadura nga inlaok ti maysa a babae iti arina agingga a naiwaras iti amin a masa.”
“Mayarig pay ti Pagarian ti Dios iti gameng nga inkali ti maysa a tao iti talon. Idi nasarakan daytoy ti sabali a tao ket inkalina manen. Kasta unay ti rag-ona ket inlakona dagiti amin a sanikuana tapno gatangenna dayta a talon.”
“Mayarig pay ti Pagarian ti Dios iti perlas a naan-anay. No masarakan daytoy ti aggatgatang iti perlas, ilakonanto dagiti amin a sanikuana tapno magatangna daytoy.”
Kalpasanna, sinarita ni Jesus ti maysa nga istorya kadagiti tattao nga agtaltalek kadagiti naimbag nga aramidda ken mangtagtagibassit kadagiti dadduma. Kinuna ni Jesus “Adda dua a lallaki a napan nagkararag idiay templo. Agsingsingir ti buwis ti maysa, panguloen met ti relihion ti maikadua.”
"Nagkararag ti panguloen ti relihion iti kastoy, ‘Agyamanak o Dios gapu ta saanak a managbasol a kas kadagiti dadduma a tattao nga agtatakaw, managdakdakes ken mannakikamalala. Agyamanak ta saanak a kas iti daytoy agsingsingir ti buwis.'"
“Maminduaak nga agayayunar kada lawas, itedko iti templo ti apagkapullo dagiti amin a kuwarta ken banbanag a maaw-awatko.”
"Immadayo ti agsingsingir ti buwis iti panguloen ti relihion ket saanna pulos a maitangad ti ulona iti langit gapu iti panagbainna iti Dios. Dinandanogna ti barukongna ket nagkararag ti kastoy, 'Maasianka kaniak o Dios ta managbasolak.'”
Kalpasan daytoy kinuna ni Jesus, “Ibagak kadakayo ti pudno, dinengngeg ti Dios ti kararag ti agsingsingir ti buwis ket imbilangna isuna a nalinteg. Saan a naay-ayo ti Dios iti kararag ti panguloen ti relihion. Ibaba ti Dios amin a tao a napasindayag. Itan-oknanto dagiti tattao a napakumbaba.”
Istorya ti Bibliya manipud: Mateo 13:31-33, 44-46; Marcos 4:30-32; Lucas 13:18-21; 18:9-14