Ti Tulag ti Dios iti Israel

Inturong ti Dios dagiti Israelita iti let-ang agingga iti bantay Sinai kalpasan iti panangballasiwda iti Nalabbaga a Baybay. Ditoy met laeng ti nakakitaan ni Moises iti umap-apoy a kayo. Nangipatakder dagiti tattao iti toldada idiay puon ti bantay.

Nagsao ti Dios kenni Moises ken kadagiti Israelita, kinuna,"No agtulnog ken tungpalenyo ti tulagko, agbalin kayonto a napateg a tattaok. Pagarian iti papadi. Agbalinto a nasantoan ti nasionyo."

Napalabas ti tallo nga aldaw, nagsagana dagiti tattao a sumango iti Dios. Bimmaba ti Dios idiay rabaw iti Bantay Sinai a napakuyugan kadagiti gurruod, kimat, asok ken uni iti napigsa a trumpeta. Ni Moises laeng ti napalubusan a sumang-at idiay rabaw iti bantay.

Inted iti Dios ti katulagan kadakuada ket kinunana," Siak ni Yaweh a Diosyo, ti nangisalakan kadakayo manipud idiay Egipto. Saanyo a dayawen dagiti palso a Dios."

" Siak ni Yaweh, managimonak a Dios. Saankayo nga agaramid ken agdayaw kadagiti didiosen.Saanyo nga usaren ti nagan ko nga awan panagdayawna. Ipategyo ti aldaw iti panaginana gapu ta nasantoan daytoy. Aginanakayo iti maikapito nga aldaw ken lagipendak."

"Dayawem dagiti nagannak mo. Saanka a pumatay ken saanka a makikamalala.Saanka nga agtakaw. Saanka nga agulbod. Saanmo a tarigagayan ti asawa, sanikua ken amin a kukua iti karrubam."

Insurat iti Dios dagiti sangapulo a bilin iti dua a pisi a bato ket intedna kenni Moises. Nangted pay ti Dios kadagiti adu a linlinteg ken bilbilin a surutenda. Inkari iti Dios a no agtulnog dagiti tattao kadagiti linteg, bendisionan ken tarabayenna ida. No sukirenda dagitoy, dusaento ida iti Dios.

Nangted pay ti Dios kadagti Israelita iti nalawag a pannakailadawan iti tolda nga ipapaaramidna. Maawagan daytoy a Tolda a Pagu- ummongan. Maaddaan iti dua a kuarto a pinagsina iti dakkel a kurtina. Ti mabalin laeng a sumrek ket ti nangato a padi agsipud ta adda ti presensia iti Dios sadiay.

Siasinoman a mangsukir kadagiti linteg iti Dios, ket mabalin a mangipan iti ayup iti pagidatonan iti sango iti Tolda a Paguummongan. Idaton ken puuran daytoy iti padi iti disso iti pagidatonan. Kaluban iti dara iti naidaton nga ayup dagiti basol iti nagsukir iti linteg iti Dios. Daytoy ti mangdalus kenkuana. Pinili iti Dios ni Aaron a kabsat ni Moses ken dagiti kaputotanna nga agbalin a papadina.

Immannugot dagiti tattao nga agtulnog kadagati linteg nga inted iti Dios kadakuada. Masapul a ti Dios laeng ti dayawenda ken agbalinda a napateg a tattaona. Saan a nabayag kalpasan iti panagkarida iti Dios, nagaramidda manen iti nakaro a basol.

Nakitungtong ni Moises iti Dios iti adu nga aldaw idiay rabaw iti Bantay Sinai. Saan a nauray dagiti tatto ti panagsubli ni Moises isu nga inyapanda iti balitok kenni Aaron. Kiniddawda nga iyaramdanna ida iti maysa a didiosen.

Nagaramid ni Aaron iti didiosen.Nabalitokan ken sinanbaka ti langana. Nangrugi dagiti tattao iti dakes a panangidaydayaw ken panagidatdatonda iti didiosen. Kasta unay ti pungtot iti Dios gapu iti basolda ket pinanggepna a dadaelen ida. Gapu iti daytoy, nagkararag ni Moises para kadakuada. Dinengngeg iti Dios ti kararag ni Moises ket saanna ida a dinadael.

Nakita ni Moises dagiti didiosen idi simmalog isuna manipud idiay bantay, nakaunget ket binurakna dagiti bato a nangisuratan iti Dios kadagiti sangapulo a bilinna.

Inwaras ni Moises ti narumek a didiosen iti danum. Inpainumna kadagiti tattao. Nangiyeg ti Dios iti maysa a didgra ket adu ti natay kadakuada.

Nagaramid manen ni Moises iti baro a pisi iti bato a pangisuratanna kadagiti Sangapulo a Bilin kas sukat diay binurakna. Kalpasanna nagsubli manen isuna idiay rabaw iti bantay Sinai ken nagkararag a pakawanen koma iti Dios dagiti tattao. Dinengngeg iti Dios ti kararag ni Moises ket pinakawanna ida. Simmalog ni Moises manipud idiay bantay nga awitna dagiti dua a pisi a bato a nakaisuratan iti Sangapulo a Bilin. Inturong manen iti Dios dagiti Israelita manipud iti Bantay Sinai a mapan idiay Naikari a Daga.

Ti istorya ti Biblia manipud: Exodo 19-34