Benindisionan ti Dios ni Jacob

Kabayatan a dumakdakkel ni Jacob, kaykayatna nga agtalinaed iti balay ngem ni Esau ket kaykayatna nga apan agan-anup. Kaykayat ni Rebekah ni Jacob ngem ni Isaac ket ni Esau ti kaykayatna.

Maysa nga aldaw, nagawid ni Esau a kasta unay ti bisinna a nagapu iti panaganupna. Kinuna ni Esau kenni Jacob, ’’Pangaasim ta ikkanak iti makan nga inlutom.’’ Kinuna ni Jacob, ”Itedmo pay nga umuna ti karbengam a kas inauna nga anak kaniak.’’ Inted met ni Esau kenni Jacob ti karbenganna a kas inauna nga anak ket inikkan isuna ni Jacob iti makan.

Kayat ni Isaac nga ited kenni Esau ti pamendisionna ngem sakbay a maitedna ket inallilaw isuna ni Rebekah ken ni Jacob. Nagpamarang ni Jacob nga isuna ni Esau. Lakay unayen ni Isaac ket saanen a makakita isu nga inkawes ni Jacob ti bado ni Esau. Nangikabil pay isuna iti buok iti kalding iti tinged ken imana.

Napan ni Jacob kenni Isaac ket kinunana, ’’Siak ni Esau. Immayak tapno bendisionannak koma.” Idi narikna ni Isaac ti buok iti kalding iti tinged ken ima ni Jacob, ken naangutna dagiti kawesna impagarupna nga isu ni Esau isu a binendisionanna daytoy.

Kinagura ni Esau ni Jacob gapu ta tinakawna dagiti karbenganna a kas inauna nga anak ken uray pay ti bendisionna. Gapu iti daytoy, pinanggepna a papatayen ni Jacob kalpasan a matay ti amada.

Nangngeg ni Rebekah ti panggep ni Esau, isu nga imbaon ni Rebekah ken ni Isaac ni Jacob a mapan iti adayo a lugar. Sadiay nga agnanaed dagiti kakabagianna.

Adu a tawtawen a nakipagnaed ni Jacob kadagiti kakabagian ni Rebekah. Iti dayta a tiempo, nakaasawa isuna ken naadaan iti sangapulo ket dua nga annak a lallaki ken maysa a babai. Inaramid iti Dios ni Jacob a nabaknang unay.

Nagsubli ni Jacob idiay Canaan kalpasan iti dua pulo a tawen a naiyadayu ti pagtaenganna. Kadwana dagiti pamiliana ken dagiti adipenna ken amin dagiti tarakenna nga ay-ayup.

Kasta unay ti panagbuteng ni Jacob gapu ta impagarupna a kayat pay laeng ni Esau a papatayen isuna. Gapu iti daytoy, nangipatulod isuna iti adu nga ay-ayup a kas sagotna. Intulod ngarud dagiti adipen ni Jacob dagiti ay-ayup kenni Esau ket kinunada, ’’Ti nangted kadagitoy nga ay-ayup ket ni Jacob nga adipenmo.’’ Umayto isuna iti mabiit.

Kinaagpaysona napakawanen ni Esau ni Jacob ken naragsakda idi nagkitada a dua. Nagnaed ngarud a natalna ni Jacob idiay Canaan. Impunponda Jacob ken Esau ni Isaac idi natay isuna. Dagiti katulagan nga inkari iti Dios kenni Abraham nga naipasa kenni Isaac ket naipasa kenni Jacob.

Istorya iti biblia manipud: Genesis 25:27-33:20