Ti Pannakausig ni Jesus

Katengngaan iti rabii idi impan dagiti soldado idiay balay iti kangatoan a padi ni Jesus. Impanda isuna idiay tapno usigin isuna iti kangatoan a padi. Iti adayo, sumursurot ni Pedro kadakuada. Nagtalinaed ni Pedro iti ruar iti balay ken napan naginudo iti asideg iti apuy idi inserrekdan ni Jesus.

Inusig dagiti panguloen iti Judio ni Jesus iti uneg iti balay. Nagayabda iti adu a palso a saksi. Nagulbod dagitoy maipapan ken ni Jesus. Uray no kasta, saan a nagsusurot dagiti imbagbagada. Saan a napaneknekan dagiti panguloen a Judio ti ibagbagada a nagbasolan ni Jesus. Saan a nagsasao ni Jesus.

Kalpasanna, kinita iti kangatoan a padi ni Jesus ket kinunana, “Ibagam no siasinoka? Sika kadi ti Mesias nga Anak iti sibibiag a Dios?”

Simmungbat ni Jesus, “Siak, makitadakto a nakatugaw iti abay iti Dios a bumaba iti langit.” Gapu iti unget iti kangatoan a padi, pinisangna ti badona ken impukkawna kadagiti dadduma a panguloen iti relihion, “Saan tayon a kasapulan iti adu a saksi! Nangngegyo nga imbagana nga isuna ti Anak iti Dios. Anya ti pangngeddengyo?"

Simmungbat dagiti amin a panguloen iti Judio iti kangatoan a padi, kinunada, “Maiparbeng a matay isuna!” Inabbunganda dagiti mata ni Jesus.Tinupra-tupraan, binaotbaot ken linaisda ni Jesus.

Nakita iti maysa nga agserserbi a babai ni Pedro kabayatan iti panagur-urayna iti ruar iti balay iti kangatoan a padi. Kinuna iti babai kenkuana, “Kaduanaka met ni Jesus!” Inlibak ni Pedro daytoy. Kalpasanna dayta, isu met laeng a banag ti imbaga iti maysa manen a babai. Inlibak manen ni Pedro daytoy. Kamauddiananna, imbaga dagiti tattao, “Ammomi a kaduanaka ni Jesus ta agpadakayo a taga Galilea.”

Nagsapata ni Pedro ket kinunana, “Uray dusaennak iti Dios no pudno nga am-ammuk dayta a tao!” Idi imbaga ni Pedro dayta, nagtaraok a dagus ti kawitan ket timmalyaw ni Jesus kenkuana.

Immadayo ni Pedro ket nagsangsangit daytoy. Kabayatanna, nakita ni Judas a mangliliput no kasano nga inukom dagiti panguloen iti Judio ni Jesus a matay. Nagladingit launay ni Judas. Pimmanaw isuna ket pinatayna ti bagina.

Kabigatanna, impan dagiti panguloen iti Judio ni Jesus iti gobernador, a ni Pilato. Ninamnama dagiti tattao nga ukomenna ni Jesus a managbasol ket madusa iti patay. Dinamag ni Pilato ni Jesus, “Sika kadi ti ari dagiti Judio?”

Simmungbat ni Jesus ket kinunana, “Kusto ta imbagam, ngem ti pagariak ket saan a kas iti pagarian dituy lubong. Ta no kasta koma ket makilaban dagiti adipen ko a mangisakit kanyak. Immayak ditoy lubong tapno iwaragawagko ti kinapudno a maipanggep iti Dios. Dumngeg ken agtulnog kaniak ti siasinoman a mangayat iti kinapudno .” Kinuna ni Pilato, “Ania aya ti kinapudno?”

Rimmuar ni Pilato kalpasanna a makasarita ni Jesus. Napan ni Pilato kadagiti tattao, kinunana, “Awan ti makitak a nagbasolan daytoy a tao.” Nupay kasta, impukkaw dagiti panguloen iti Judio ken dagiti tattao, “Ilansa isuna iti krus!” Simmungbat ni Pilato, “Saan a nagbasol daytoy a tao.” Impigpigsa pay dagiti tattao ti nagpukkaw. Imbaga manen ni Pilato iti maikatlo a daras, “Saan a nagbasol daytoy a tao!”

Nagbuteng ni Pilato ta amangan no aggulo dagiti tattao no saanna nga ited ti kayatda. Gapu iti daytoy immannugot ni Pilato nga ilansa dagiti soldado na ni Jesus iti krus. Sinapsaplitan dagiti soldado a taga Roma ni Jesus. Binadoanda isuna iti kawes iti ari ken kinoronaanda pay isuna iti siit. Kalpasanna, linaisda isuna a kunkunada, “Kitaenyo ti Ari dagiti Judio!”

Istorya iti Biblia manipud: Mateo 26:57-27:26; Marcos 14:53-15:15; Lucas 22:54-23:25; Juan 18:12-19:16