Nagbalin a Kristiano ni Pablo

Ni Saulo ket isu ti baro a nangbantay kadigiti pagan-anay dagiti lallaki a nangpatay ken ni Esteban. Saan a namati isuna ken ni Jesus. Gapu iti dayta, pinarigatna dagiti namati kenni Jesus. Napan isuna kadagiti balbalay idiay Jerusalem tapno tiliwen ken ipakulongna dagiti namati, babai man wenno lalaki. Pinalubosan isuna iti kangatoan a padi a mapan idiay Damasco tapno tiliwenna dagiti amin a Kristiano idiay ken isublina ida idiay Jerusalem.

Bayat ti panagdaliasat ni Saulo nga apan idiay Damasco, adda nalawag a silaw a naggapu idiay langit. Linawagan daytoy a silaw ti aglawlawna. Natumba ni Saulo. Adda nangngegna a timek a nagkuna, “Saulo! Saulo! Apay ta parparigatannak?” Sinaludsod ni Saulo, "Sino ka, Apo?” Simmungbat ni Jesus kenkuana, “Siak ni Jesus a parparigatem.”

Saanen a makakita ni Saulo idi bimmangon daytoy. Kinadduaan isuna dagiti gagayyemna a napan idiay Damasco. Tallo nga aldaw a saan a nangnangan ken immin-inum ni Saulo.

Adda maysa nga adalan idiay Damasco nga agnagan iti Ananias. Imbaga iti Dios kenkuana, “Mapanka iti balay a pagnanaedan ni Saulo. Ipataymo dagita imam kenkuana tapno makakita manen isuna.” Ngem kinuna ni Ananias, “Apo, nadamagko no kasano ti panangparigat daytoy a lalaki kadagiti namati.” Simmungbat ti Dios, “Mapanka! Pinilik isuna a mangisuro iti maipapan kanyak kadagiti Judio ken kadagiti dadduma a puli ti tattao. Adu a banag ti sagabaenna para Kaniak.”

Napan ngarud ni Ananias iti ayan ni Saulo. Impatayna dagiti imana kenkuana ket kinunana “Imbaunnak ni Jesus a nagparang kenka idiay dalan nga agturong ditoy, tapno maisubli ti panagkitam ken maikkanka ti pannakabalin babaen iti Espiritu Santo.” Dagus a nakakita manen ni Saulo. Binautisaran isuna ni Ananias. Kalpasanna, nangan ni Saulo ket nagsubli ti pigsana.

Dagus a nangrugin a mangasaba ni Saulo kadagiti Judio idiay Damascus. Ibagbagana, “Ni Jesus ti Anak ti Dios!” Nasdaaw dagiti Judio ta namati metten kenni Jesus ti tao a mangparparigat kadagiti namati idi. Nangasaba ni Saulo kadagiti Judio, pinaneknekanna a ni Jesus ti Mesias.

Kalpasan iti adu nga aldaw, pinanggep dagiti Judio a patayen ni Saulo. Nangibaonda kadagiti tattao ti mangsiput kenkuana iti ruangan ti siudad tapno patayenda isuna. Naammoan ni Saulo iti panggep dagiti Judio a mangpapatay kenkuana, tinulungan isuna dagiti gagayyemna a makalibas. Maysa a rabii, inkargada ni Saulo iti maysa a basket sada imbaba iti pader ti siudad. Kalpasan a nakalibas ni Saulo idiay Damasco, intultuloyna ti nangasaba maipapan ken ni Jesus.

Napan sinarak ni Saulo dagiti adalan idiay Jerusalem. Nagbuteng dagiti adalan kenni Saul. Impan ni Barnabas ni Saulo kadagiti apostol. Maysa a namati ni Barnabas. Imbagana kadagiti apostol no kasano a situtured a nangasaba ni Saulo idiay Damasco. Kalpasan daytoy, inawaten dagiti adalan ni Saulo.

Nakadanon ti siudad ti Antioch dagiti dadduma a namati a naparigat idiay Jerusalem. Intultuloyda ti nangaskasaba iti maipapan kenni Jesus iti dayta a lugar. Kaadwan kadagiti tattao idiay Antioch ket saan a Judio, uray no kasta, iti umuna a gundaway ket nagadu kadakuada ti nagbalin a namati. Napanda Barnabas ken ni Saulo idiay. Nangisuroda kadagiti barbaro a namati ti ad-adu pay a banag a maipapan kenni Jesus tapno mapabilegda ti iglesia idiay. Umuna a naawagan dagiti namati a “Kristiano" idiay Antioch.

Maysa nga aldaw, kabayatan ti panagayunar ken panagkararag dagiti Kristiano idiay Antioch, imbaga ti Espiritu Santo kadakuada nga, “Ibaonyoda Barnabas ken Saulo ta rugiandan ti panagserbi a nangayabak kadakuada.” Inkararagan dagiti namati idiay kapilya ti Antioch da Barnabas ken Saulo. Impatayda dagiti imada kadakuada. Kalpasan daytoy, imbaonda ida a mapan kadagiti dadduma a luglugar tapno ikasabada ti naimbag a damag a maipapan kenni Jesus. Insuroda Barnabas ken Saulo dagiti tattao manipud iti naduma-duma a puli ti tattao. Adu a tattao ti namati kenni Jesus.

Istorya iti Biblia manipud: Dagiti Aramid 8:3; 9:1-31; 11:19-26; 13:1-3