Ti Layus

Kalpasan iti nabayag a panawen, immadu dagiti tattao iti lubong. Nagbalinda a managdakdakes ken naranggas unay. Kasta unay iti kinadakesda isu nga inkeddeng iti Dios a dadaelen ti lubong babaen iti dakkel a layus.

Adda maysa a tao a kaay-ayo unay iti Dios, ni Noe. Nalinteg isuna a tao a makipagnanaed kadagiti managdakdakes a tattao. Impakaammo iti Dios ken ni Noe ti panggepna a pananglayus ti lubong. Imbaon iti Dios ni Noe nga agaramid iti dakkel a daong.

Kinuna iti Dios kenni Noe, aramidenna ti daong nga 140 metro ti kaatiddogna, 23 metro ti kalawana ken 13.5 metro ti kangatona. Kayo ti aramaten ni Noe nga agaramid ti daong nga addaan iti tallo a grado, adu a kuarto, addaan iti atep ken maysa a tawa. Ti daong ti mangisalakan ken Noe agraman ti pamiliana ken dagiti amin a kita iti ayup nga agbibiag iti daga kabayatan iti layus.”

Nagtulnog ni Noe iti Dios. Nagtitinnulong da Noe ken dagiti tallo nga annakna a lallaki iti panangaramid ti daong sigun iti imbilin iti Dios kadakuada. Gapu ta dakkel unay ti daong, adu a tawtawen ti naglabas sakbay a nalpas daytoy. Binallaagan ni Noe dagiti tattao maipapan iti umay nga layus. Imbagana nga agbabawida ken agtulnogda iti Dios ngem saanda a namatpati kenkuana.

Binilin iti Dios ni Noe ken ti pamiliana nga agurnongda iti umdas a makan para kadakuada ken kadagiti ay-ayup. Idi nakasaganan ti amin, kinuna iti Dios ken ni Noe a sumrekdan iti daong agraman ti asawana ken dagiti tallo nga annakna a lallaki ken dagiti as-asawada. Walo da amin a tao a simrek iti daong.

Imbaon iti Dios dagiti amin a kita iti ayup ken ni Noe tapno maiserrek iti daong ket mailasatda iti layus. Dagitoy amin a kita iti ayup ket addaan iti agpares a lalaki ken babai kasta met dagiti bilbillit. Imbaon met iti Dios ti sagpipito a lalaki ken babai kadagiti amin a kita iti ayup a mabalin a maidaton kenkuanna. Idi nakastrekda aminen iti daong, inrikep iti Dios ti ruanganna.

Kalpasanna, nangrugi a nagtudo iti awan sardengna. Nagtultuloy ti panagtudtudona iti las-ud ti 40 nga aldaw ken 40 a rabii. Pimsuak ti danum a naggapu iti uneg iti daga. Nalipus iti danum ti daga agraman dagiti kangangatoan a banbantay.

Natay amin nga agbibiag iti daga malaksid laeng kadagiti tattao ken ay-ayup nga adda iti uneg iti daong. Tumtumpaw ti daong iti danum, nakalasat iti layus dagiti amin nga adda idiay unegna.

Kalpasan a nagsardeng ti panagtudtudona, tumtumpaw latta ti daong iti lima pay a bulan. Kabayatan iti daytoy a panawen, nangrugi a bimmaba ti danum. Iti maysa nga aldaw, nagdisso ti daong iti tuktok iti maysa a bantay. Nalipus pay laeng iti danum ti daga. Idi naglabas ti tallo pay a bulan, makitan dagiti tuktok iti banbantay.

Kalpasan iti uppat a pulo pay nga aldaw, nagpatayab ni Noe ti maysa nga uwak tapnu maammoanna no nagmagan ti daga. Nagsubli-subli ti uwak ta awan iti makitana a namaga a daga.

Saan a nagbayag, nagpatayab ni Noe iti maysa a kalapati. Awan pay iti makitana a namaga a daga isu a nagsubli kenni Noe. Idi naglabas iti maysa a lawas, pinatayab manen ni Noe ti kalapati. Saan a nagbayag, nagsubli nga adda sinippitna a sanga iti Olibo. Bumabbaban ti danum, nangrugi manen nga agtubo dagiti mulmula..

Naguray pay ni Noe iti maysa a lawas, pinatayabna manen diay kalapati iti mai-katlo a daras. Itan, adda nabirukanna a pagdissoan ket saanen a nagsubli. Agmagmagan ti daga.

Kalpasan iti dua a bulan, kinuna ti Dios kenni Noe, “Tatta, mabalin kayon a rumuar iti daong agraman dagiti ay-ayup. Aganakkayo iti adu tapno maaddaan kayo iti adu nga appuko ket punnuenyo iti tao ti lubong. Rimmuar ngarud da Noe ken ti pamiliana manipud iti daong.

Kalpasan a rimmuar da Noe iti daong, nagaramid ni Noe iti maysa nga altar. Ditoy a nangidaton ni Noe iti agduduma a kita iti ayup a mabalin nga idaton iti Dios. Naay-ayo ti Dios kadagiti indaton ni Noe, binendisionan ti Dios ni Noe ken ti pamiliana.

Kinuna iti Dios, “Ikarik kadakayo a saanko nga uliten nga ilunod ti daga gapu kadagiti dakes a banbanag nga ar-aramiden dagiti tattao. Saanko metten a dadaelen ti lubong babaen iti layus uray no managbasol ti tao manipud kinaubingda.”

Inaramid ngarud iti Dios ti kaunaan a bullalayaw kas pangilasinan iti karina. Tunggal tiempo nga agparang ti bullalayaw iti tangatang, laglagipen iti Dios ti inkarina. Laglagipen met dagiti tattao ti inkari iti Dios kadakuada.

Istorya iti Biblia manipud: Genesis