Ti Panagsubli Ni Jesus

Agarup 2000 a tawen, umad-ado dagiti tattao ditoy lubong ti makangkangngeg iti naimbag a damag maipapan ken ni Jesus a Mesias. Umad-ado met dagiti namati. Inkari ni Jesus nga agsublinto inton aggibusen ti lubong. Uray nu saanpay isuna a nagsubli , tungpalennanto ti inkarina.

Bayat ti panagur-uraytayo iti panagsubli ni Jesus, kayat iti Dios nga agbiagtayo a nasantoan ken agdayaw kenkuana. Kayatna pay nga ibagatayo kadagiti dadduma ti maipangngep iti pagarianna. Kinuna ni Jesus idi adda pay laeng isuna ditoy lubong, "Ikasabanto dagiti adalan ti naimbag a damag maipanggep iti pagarian iti Dios kadagiti amin a tattao iti sangalubongan, kalpasanna aggiboston ti lubong."

Adu kadagiti puli iti tattao ti saanpay a nakangngeg iti maipanggep ken ni Jesus. Sakbay a nagsubli ni Jesus idiay langit, imbilinna kadagiti Kristiano nga ikasabada ti naimbag a damag kadagiti tattao a saanpay pulos a nakangngeg iti daytoy. Kinunana, "Mapankayo agisuro kadagiti amin a puli iti tattao ken pagbalinenyo ida nga adalak! Imbagana pay, adun dagiti maapit iti kataltalunan!"

Kinuna pay ni Jesus, "Saan a nangatngato ti agserserbi ngem iti apo na. Parigaten ken patayen dakayonto met dagiti agtuturay iti daytoy a lubong gapu kaniak kas iti pananggurada kaniak. Numan pay agsagabakayo iti daytoy a lubong, ket rumegtakayo agsipud ta pinarmekkon ni Satanas a mangituray iti daytoy a lubong. Nu agtalinaedkayo a matalek kaniak agingga iti panungpalan isalakannakayto iti Dios!"

Imbaga ni Jesus daytoy nga istorya kadagiti adalanna tapno ilawlawagna dagiti mapasamak inton aggibusen ti lubong. Kinunana, "Nagmula ti maysa a lalaki iti napintas a bukel iti taltalonna. Kabayatan a matmaturog isuna, immay ti kabusorna ket nagmula met iti ruot idiay katriguan, ken kalpasanna pimmanawen."

"Idi nagtubon dagiti mula, kinuna dagiti agserserbi kenkuana, 'Apo, nagmula kayo iti nasayaat a bukel iti taltalon. Apay adda nailaok a ruot?' Simmungbat ti Apona ket kinunana, 'Nalabit nga immula iti kabusor dagita.'"

"Simmungbat dagiti agserserbi iti Apoda, 'Kayatyo kadi a parutenmi dagiti ruot?' Kinuna iti Apo, 'Saan ta no aramidenyo dayta, maparut met dagiti dadduma a trigo. Aguraykayo inggana iti panagaapit sayonto ummungen dagiti ruot tapno mapuuran, ngem ikabilyo dagiti trigo iti kamarin.'"

Saan a naawatan dagiti adalan ti kayat a sawen iti istorya isu a dinawatda ken ni Jesus nga ilawlawagna daytoy kadakuada. Kinuna ni Jesus, "Maiyarig ti tao a nagmula kadagiti nasayaat a bukel iti Mesias. Maiyarig met ti taltalon iti lubong. Maiyarig dagiti nasayaat a bukel kadagiti tattao nga agtultulnog iti Dios."

"Maiyarig dagiti ruot kadagiti tattao a pasurot iti diablo. Maiyarig ti tao a nagmula kadagiti ruot iti diablo. Maiyarig ti panawen iti apit iti panungpalan iti lubong ken maiyarig dagiti nagapit kadagiti anghel iti Dios."

"Inton aggibusen ti lubong, ummungento dagiti anghel dagiti amin a tattao a pasurot iti diablo ket ibellengdanto ida iti gumilgil-ayab nga apoy. Idiaydanto nga agsangit ken agngaretnget kadagiti ngipenda gapu iti nakaro a panagsagabada. Agraniagto dagiti nalinteg a kas iti raniag iti init idiay pagarian iti Dios nga Amada."

Imbaga met ni Jesus nga agsublinto isuna ditoy daga sakbay iti panungpalan iti lubong. Agsublinto isuna a kas iti wagas nga ipapanawna. Ti kayatna a sawen ket maaddaanto isuna iti napisikalan a bagi ket umayto kadagiti ululep iti tangatang. Inton agsubli ni Jesus ket agungarto dagiti amin a Kristiano a natay ket sumabetdanto kenkuana iti tangatang.

Kalpasanna daytoy, maipangatonto iti tangatang dagiti Kristiano a sibibiag pay laeng ket makitipondanto kadagiti dadduma a Kristiano a nagungar. Makikadwadanto amin idiay ayan ni Jesus. Kalpasan dayta, makipagnaedto ni Jesus kadagiti tattaona nga addaan iti naan-anay a kappia ken panagkaykaysa iti agnanayon.

Inkari ni Jesus nga ikkannato iti korona ti tunggal maysa a mamati kenkuana. Agbiag ken makipagturaydanto iti Dios iti naan-anay ken agnanayon a kappia.

Ngem ukomento iti Dios dagiti saan a mamati ken ni Jesus. Ibellengnanto ida idiay impierno. Agnanayonto nga agsangsangit ken agngarngaretnget dagiti ngipenda sadiay gapu iti tuok. Agnanayon a puuranto ida iti saan a maeddep nga apuy ken kanen ida dagiti igges.

Inton agsubli ni Jesus ket naan-anayton a parmekenna ni Satanas ken ti pagarianna. Ibellengnanto ni Satanas idiay impierno nga agnanayon a pakapuoranna. Kadwa ni Satanas dagiti amin a nangpili a sumurot kenkuana imbes nga agtulnogda koma iti Dios.

Gapu ta nagsukir ni Adan ken Eba iti Dios ken inyegda iti basol iti daytoy a lubong. Inlunod iti Dios ti lubong ken inkeddengna a dadaelenna daytoy. Ngem dumtengto ti aldaw a parsuaento manen iti Dios ti baro a langit ken baro a daga nga awanto ti pakapilawanna.

Agnaedto ni Jesus ken dagiti tattaona idiay baro a lubong ken iturayannanto dagiti amin a banbanag iti agnanayon. Leppasennanto ti panagsagaba, panagladingit, panagsangit, kinadakes, sakit, wenno pannakatay. Iturayanto ni Jesus ti pagarianna nga addaan iti kappia ken hustisya. Makidennanto isuna kadagiti tattaona iti agnanayon.

Istorya ti Biblia manipud: Mateo 24:14; 28:18; Juan 15:20, 16:33; Paltiing 2:10; Mateo 13:24-30, 36-42; 1 Tesalonica 4:13-5:11; Santiago 1:12; Mateo 22:13; Paltiing 20:10, 21:1-22:21