Pinagungar ni Jesus ni Lazaro

Maysa nga aldaw, naammuan ni Jesus a nakaro ti sakit ni Lazaro. Addaan ni Lazaro iti dua a kakabsat a babbai, ni Marta ken Maria. Nasinged a gayyem ni Jesus dagitoy. Idi nangngeg ni Jesus daytoy a damag, kinunana, “ Saan nga agtungpal ken patay dayta a sakit ngem maipaay daytoy iti pakaidayawan ti Dios.” Ay-ayaten ni Jesus dagiti gagayyemna ngem naguray pay sadiay iti dua nga aldaw.

Kalpasan iti dua nga aldaw, kinuna ni Jesus kadagiti adalanna, “Agsublitayon idiay Judea.” Simmungbat dagiti adalan ket kinunada, “Maestro, kaanu laeng idi pinanggepdaka a papatayen dagiti tattao iti dayta a lugar!” Kinuna ni Jesus, “Nakaturogen ti gayyemko a ni Lazaro, masapul a mapan ko riingen.”

Simmungbat dagiti adalan ni Jesus ket kinunada, “Apo, no matmaturog laeng ni Lazaro, sigurado nga umimbagto.” Ngem imbaga ni Jesus ti kinapudno kadakuada, “Natayen ni Lazaro. Maragsakanak ta awanak sadiay tapno mamatikayo kaniak.”

Idi nakadanon ni Jesus iti ili da Lazaro, uppat nga aldawen ti napalabas manipud idi natay ni Lazaro. Simmabat ni Marta kenkuana ket kinunana, “No addaka la koma ditoy Apo, saan koma a natay ti kabsatko. Mamatiak nga ited iti Dios kenka aniaman a dawatem kenkuana.”

Simmungbat ni Jesus, “Siak ti mangpapa-ungar kadagiti natay ken mangmangted iti Biag. Siasinoman a mamati kaniak, uray no matay ket agbiag. Amin a mamati kaniak, saanto pulos a matay. Mamatika kadi iti daytoy?” Simmungbat ni Marta ket kinunana, “Wen Apo! Mamatiak a sika ti Mesias, ti Anak ti Dios.”

Kalpasan daytoy, simmangpet ni Maria ket nagparintumeng iti sangoanan ni Jesus ket kinunana, “Apo, no adda ka laeng koma ditoy, saan pay koma a natay ti kabsatko.” Sinaludsod ni Jesus kadakuada, “Sadinno ti nangikabilanyo ken ni Lazaro?” Simmungbatda, “Impanmin iti tanem. Umaykayo ta intayo kitaen.” Nagsangit ni Jesus kalpasanna.

Maysa a kuweba ti tanem ni Lazaro nga addaan iti kalub a bato a maitulid ti ruanganna. Idi makadanon ni Jesus iti tanem, Kinunana kadakuada, “Itulidyo ti bato.”Kinuna ni Marta, ”Uppat nga aldawen manipud idi natay ti kabsatko. Nabangsiten ti angotna!”

Simmungbat ni Jesus ket kinunana, "Saanko aya nga imbaga kadakayo a makitayo ti dayag iti Dios no mamatikayo kaniak?” Intulid da ngarud ti bato a kalub iti tanem.

Timmangad ni Jesus iti langit ket kinunana, “Ama, agyamanak ta dumdumggegka kaniak. Ammok a dengdenggennak a kankayon, aramidek daytoy para kadagiti amin a tattao a nakatakder ditoy tapno mamatida nga imbaonnak.” Nagpukkaw ni Jesus ket kinunana, “Rummuarka Lazaro!”

Rimmuar ngarud ni Lazaro a nabalkot pay laeng iti lupot ti natay. Kinuna ni Jesus kadakuada, “Tulonganyo isuna a mangikkat iti lupot ket ruk-atanyo ni Lazaro!” Namati dagiti adu a Judio ken Jesus gapu iti daytoy a milagro.

Nagimon dagiti panguloen iti relihiyon dagiti Judio. Nagu-ummongda ngarud tapno pagtutungtunganda no kasano a papatayenda ni Jesus ken ni Lazaro.

Istorya iti Biblia manipud: John 11: 1-46