Ti Panagbaliw ti Langa ni Jesus

Maysa nga aldaw, intugot ni Jesus ti tallo kadagiti adalanna, ni Pedro, Santiago ken Juan. (Ti adalan nga agnagan iti Juan ket saan nga isu ti nangbautisar ken Jesus.) Napanda iti maysa a nangato a bantay tapno agkararag.

Idi agkarkararag ni Jesus, rimmaniag ti rupana a kas karaniag iti init, pimmuraw ti badona a kas iti lawag. Napurpuraw pay ngem iti uray aniaman a naaramid ditoy lubong.

Kalpasanna, nagparang kadakuada ni Moises ken ni propeta nga Elias. Nagbiag dagitoy a tattao ginasgasut a tawen sakbay daytoy a kanito. Kinasaritada ni Jesus maipapan iti ipapatayna a mapasamak iti mabiit idiay Jerusalem.

Kabayatan a makitungtong ni Moises ken Elias ken ni Jesus, kinuna ni Pedro ken Jesus, “Nasayaat unay nga addatayo ditoy. Agaramidtayo iti tallo nga paglinungan, maysa para kenka, maysa ken ni Moises, maysa met para ken ni Elias.” Saan nga ammo ni Pedro ti ibagbagana.

Kabayatan nga agsasao ni Pedro, bimmaba ti maysa a naraniag nga ulep ket pinalikmutanna ida. Nagtimek ti Dios manipud iti ulep ket kinunana, “Daytoy ti Anakko nga ay-ayatek. Maay-ayoak kenkuana. Dumngegkayo kenkuana!” Nagbuteng dagiti tallo nga adalan ket nagrukobda iti daga.

Ineggaman ida ni Jesus ket kinunana, “Saankayo nga agbuteng. Tumakderkayo” Idi kumitada iti aglawlaw, awanen ni Moises ken Elias, ni laengen Jesus ti adda sadiay.

Simmalog ni Jesus ken dagiti tallo nga adalanna manipud iti bantay. Kinuna ni Jesus kadakuada, “Saanyo pay laeng nga ibagbaga iti siasinoman ti maipapan iti napasamak ditoy. Iti saan a mabayag matayakto ngem agungarak met laeng. Kalpasan daytoy, mabalinyonton nga ibaga ti napasamak kadagiti tattao.”

Istorya iti Biblia manipud; Matthew 17: 1-9; Mark 9: 2-8; Luke 9: 28-36