Ti Ipapanaw

Naragsak a pumanaw dagiti Israelita iti Egipto gapu ta nawayawayaandan manipud iti pannakaadipenda, mapandan idiay Naikari a Daga. Inted dagiti Egipcio ti aniaman a dawaten dagiti Israelita, balituk, pirak ken dadduma pay a napapateg a banbanag. Simmurot met kadagiti Israelita dagiti dadduma a ganggannaet a namati iti Dios.

Indauloan ida ti Dios a mapan idiay Naikari a Daga babaen ti panangsurotda ti adigi nga ulep iti aldaw ken adigi nga apuy iti rabii. Kinuyog ida ti Dios iti panagdaliasatda, masapul laeng a surutenda ti panangidalan ti Dios kadakuada.

Saan a nagbayag, nagbaliw ti panunot ti Paraon ken dagiti tattaona. Kayatda nga isubli dagiti Israelita tapno pagbalinenda manen nga adipen. Impalubos ti Dios a sukiren isuna ti Paraon tapno makita ti tattao nga isuna ti pudno nga Dios. Iti kasta, maammoanda a mannakabalin ni Yahweh ngem iti Paraon ken kadagiti didiosenna.

Kinamat ti Paraon ken dagiti soldadona dagiti Israelita tapno pagbalinenda manen ida nga adipen. Idi nakita dagiti Israelita dagiti soldado ti Egipto a sumungsungad, naamirisda nga awan ti papananda gapu ta adda dagiti soldado ti Paraon iti likodanda ken adda iti sangoananda ti Nalabbaga a Baybay. Nagbuteng dagiti Israelita ket kinunada, “Saantayo koma lattan a pimmanaw iti Egipto, mataytayo met laeng ditoy!”

Kinuna ni Moises kadagiti Israelita, “Saankayo nga agbuteng! Tulongan ken salaknibannatayo ti Dios.” Kinuna ti Dios kenni Moises, “Ibagam kadagiti tattao a magnada a mapan iti Nalabbaga a Baybay.”

Iniakar ti Dios diay adigi nga ulep, inkabilna daytoy iti tengnga dagiti Israelita ken dagiti Egipcio tapno saan a makita dagiti Egipcio dagiti Israelita.

Imbaga ti Dios kenni Moises nga iyunnatna ti imana idiay baybay tapno aggudua ti danum. Ginudua ti Dios ti baybay babaen iti angin a nangiduron iti danum iti agsumbangir, Babaen iti daytoy naaddaan ti dalan iti baybay.

Nagna dagiti Israelita iti namaga a daga idiay tengnga ti Nalabbaga a Baybay, nagbalin a kas pader ti agsumbangir a danum ti baybay.

kalpasanna, innikat ti Dios ti ulep iti dalan dagiti Egipcio, nakita dagiti Egipcio nga agliblibas dagiti Israelita isunga sinurotda ida.

Sinurotda ngarud dagiti Israelita iti dalan ti baybay nga inaramid ti Dios. Riniribuk ti Dios dagiti Egipcio ket nailumlom dagiti karwaheda. Nagpukpukkaw dagiti Egipcio,, “Pumanawtayo ditoyen! Ti Dios ti makigubgubat para kadagiti Israelita!”

Kalpasan a nakaballasiw dagiti Isarelita idiay baybay, imbaga ti Dios kenni Moises nga iyunnatna manen ti imana. Inaramid ni Moises ti imbaga ti Dios ket babaen daytoy, nagsubli ti danum iti sigud nga ayusna. Nalmes dagiti Egipcio a nangkamat kadakuada.

Idi nakita dagiti Israelita a natay dagiti Egipcio, nagtalekda iti Dios ken namatida a profeta ti Dios ni Moises.

Nagrag-o dagiti Israelita gapu ta insalakan ida ti Dios manipud iti patay ken iti pannakaadipen! Nawayadan nga agserbi iti Dios. Nagkankantada a nangrambak iti pannakawayawayada. Nagdaydayawda iti Dios agsipud ta insalakanna ida manipud kadagiti Egipcio.

Imbilin ti Dios kadagiti Israelita a tinnawen a rambakanda ti Ilalabas kas pananglaglagipda no kasano nga tinulongan ida ti Dios nga agballigi ken ti panangisalakanna kadakuada iti pannakaadipenda idiay Egipto. Rambakanda Ti Ilalabas babaen iti panagpartida ti urbon a karnero nga awan pakapilawanna. Agaramidda ti tinapay nga awan ti lebadurana ket kanenda ti karne ken tinapay kas panangrambakda.

Istorya ti Bibliya manipud: Exodo 12:33 - 15:21