Nailansa iti Krus ni Jesus

Kalpasan a linais dagiti soldado ni Jesus, intugotda isuna tapno ilansada iti krus. Impabaklayda kenkuana ti krus nga isunto ti pakatayanna.

Impan dagiti soldado ni Jesus iti lugar a maawagan iti, “Banga-banga”. Iti dayta a lugar, inlansada dagiti ima ken saka ni Jesus iti krus. Uray no kasta, kinuna ni Jesus, “Ama, pakawanem ida ta saanda ammo ti ar-aramidenda.” Imbilin ni Pilate nga ikabil dagiti soldado daytoy a sao iti maysa a pagsuratan, “Ari dagiti Judio”. Imbilinna pay nga ikabilda daytoy idiay ngatoen iti ulo ni Jesus idiay krus.

Pinagpipinnostaan dagiti soldado ti bado ni Jesus. Idi inaramidda daytoy, tinungpalda ti naipadto a, “Pagbibingayandanto dagiti pagan-anayko ken pagpipinnostaanda iti badok”.

Nailansa ni Jesus iti nagbaetan iti dua nga agtatakaw. Linais isuna iti maysa kadagiti agtatakaw ngem kinuna diay maysa, “Awan kadi ti panagbutengmo iti Dios? Nagbasolta, ngem daytoy a tao ket awan nagbasolanna.” Kalpasan daytoy, kinunana kenni Jesus, “Pangngaasim ta laglagipennakto idiay pagariam.” Simmungbat ni Jesus, “Tatta nga aldaw, makadwakanto idiay paraiso.”

Linais dagiti panguloen iti Judio ken dagiti dadduma a tattao ni Jesus. Kinunada kenkuana “No pudno a sika ti Anak iti Dios, bumabaka ngarud dita krus ket isalakanmo ta bagim! Iti kasta mamati kaminto kenka.”

Kalpasanna, simmipnget ti tangatang iti dayta a lugar uray no katengngaan idi iti aldaw. Nagtalinaed a nasipnget iti tallo nga oras.

Nagpukkaw ni Jesus ket kinunana, “Natungpalen! Ama, italekkon ti espirituk kenka.” Kalpasan daytoy, indumognan ti ulona ket intaleknan ti espirituna iti Dios. Naggingined idi natay ni Jesus. Napigis ti dakkel a kurtina idiay templo. Daytoy a kurtina ti mangisinsina kadagiti tattao manipud iti presensia iti Dios. Napigis daytoy manipud iti ngato agingga iti baba.

Gapu iti ipapatayna, nangaramid ni Jesus iti wagas tapno makaasideg dagiti tattao iti Dios. Nakita iti soldado nga agbanbantay ken ni Jesus dagiti amin a napasamak, kinunana, “Pudno nga awan basolna daytoy a tao. Isuna ti Anak iti Dios.”

Dua kadagiti panguloen iti Judio a namati a ni Jesus ti Mesias ti nangkiddaw kenni Pilato nga alaenda ti bagi ni Jesus. Isuda ni Jose ken Nicodemus. Binalkotda ti bagi ni Jesus iti lupot ken inkabilda isuna iti tanem a naaramid manipud iti bato. Kalpasanna, intulidda ti dakkel a bato iti sango iti tanem tapno maserraan daytoy.

Istorya iti Bibliya manipud: Mateo 27:27-61; Mark 15:16-47; Lucas 23:26-56; Juan 19:17-42