Pinagungar iti Dios ni Jesus
Kalpasan nga inlansa dagiti soldado ni Jesus, imbaga dagiti saan a mamati kenkuana a panguloen dagiti Judio kenni Pilato, “Imbaga idi dayta ulbod a Jesus nga agungarto kalpasan iti tallo nga aldaw. Masapul nga adda ti mangbantay iti tanemna tapno masigurado a saan a takawen dagiti adalanna ti bagina, ken ibagada a nagungar isuna."
Kinuna ni Pilato, “Mangayab kayo kadagiti soldado ket siguradoenyo a natalged ti tanem.” Nangikabilda iti selio diay bato nga adda iti ruangan iti tanem. Pinabantayanda ngarud kadagiti soldado ti tanem tapno masiguradoda nga awan ti mangtakaw iti bagina.
Aldaw iti Panaginana ti sumaruno nga aldaw kalpasan iti pannakaipunpon ni Jesus. Saan a mapalubusan dagiti Judio a mapan idiay tanem iti dayta nga aldaw. Iti sumaruno nga aldaw, nasapa a napan dagiti babbai iti nakaitaneman ni Jesus tapno mangikabilda kadagiti pabanglo iti bagina.
Kabayatan a mapmapan dagiti babai iti nakaitaneman ni Jesus, kellaat a naggingined iti napigsa. Nagparang ti maysa nga anghel a naggapu idiay langit. Nagraniag unay ti kawesna a kasla kimat. Intulidna ti bato a nakakalub iti ruangan iti tanem ket tinugawanna daytoy. Kasta unay ti buteng dagiti soldado a nakabantay isu a natumbada iti daga.
Idi nakadanonen dagiti babbai iti tanem, kinuna iti anghel kadakuada, “Saan kayo nga agbuteng. Awanen ditoy ni Jesus ta nagungaren kas iti imbagana a mapasamak. Kitaenyo ti tanem tapno mapaneknekanyo.” Kinita dagiti babbai ti tanem a nakaikabilan iti bagi ni Jesus ngem awanen ti bagina sadiay!
Kalpasanna, kinuna iti anghel kadagiti babbai, “Mapanyo ibaga kadagiti adalanna, ‘Nagungaren ni Jesus. Umun-unan isuna a mapan idiay Galilea.’"
Napalalo ti buteng ken rag-o dagiti babbai, nagtarayda a napan nangibaga kadagiti adalan ti naimbag a damag.
Kabayatan a mapmapan dagiti babbai tapno ibagada ti naimbag a damag kadagiti adalan, nagparang ni Jesus kadakuada ket nagrukbabda kenkuana. Kinuna ni Jesus, “Saankayo nga agbuteng. Mapanyo ibaga kadagiti adalak a mapanda idiay Galilea. Makitadakto idiay.”
Istorya iti Biblia manipud: Mateo 27:62-28:15; Marcos 16:1-11; Lucas 24:1-12; Juan 20:1-18