Ti Panagsubli ni Jesus idiay Langit

Iti aldaw a panagungar ni Jesus, adda dua nga adalanna nga agdaldaliasat a mapan iti kabangibang nga ili. Kabayatan iti pannagnada, pagsar-saritaanda ti napasamak kenni Jesus. Ninamnamada a ni Jesus ti Messias ngem natayen isuna. Ibagbaga dagiti babbai a nabiag ni Jesus isu a saanda nga ammo no ania ti patienda.

Immasideg ni Jesus ket simurot kadakuada ngem saanda a nalasin isuna. Dinamagna no ania ti pagsar-saritaanda. Imbagada kenkuana dagiti amin a nakaskasdaaw a napasamak kenni Jesus kadagiti napalpalabas nga al-aldaw. Impagarupda a makikatkatungtungda iti maysa a gan-ganaet a saan a makaammo iti napasamak idiay Jerusalem.

Inlawlawag ni Jesus kadakuada ti kuna iti sao iti Dios maipapan iti Messias. Impalagipna kadakuada ti imbaga dagiti profeta nga agsagaba ken matayto ti Messias ngem agungarto met laeng iti maikatlo nga aldaw. Malemen idi nakadanunda iti ili a pagdagusanda.

Inawis dagiti dua a lallaki ni Jesus a makipagdagus pay laeng kadakuada, isu a simurot isuna. Idi mangrabiida, nangala ni Jesus iti tinapay, nagyaman iti Dios ket pinisina daytoy. Nalasin a dagus dagiti adalanna nga isuna ni Jesus. Ngem iti dayta a gundaway, nagpukaw isuna iti imatangda.

Kinuna dagiti dua a lallaki, “ni Jesus daydiay! Isu met laeng gayam a nakariknata iti ragsak idi ipalpalawagna ti sao iti Dios!” Nagsublida a dagus idiay Jerusalem ket idi nakadanunda, imbagada kadagiti adalan, “Nabiag ni Jesus nakitami isuna!”

Kabayatan nga agsar-sarita dagiti adalan, kellaat a nagparang ni Jesus kadakuada iti kuarto nga ayanda. Kinunana, “Kappia koma ti adda kadakayo!” Impagarup dagiti adalan nga al-alya isuna ngem kinunana, “Apay a mabuteng ken kasla saankayo a mamati nga addaak ditoy? Kitaenyo dagiti im-imak ken saksakak. Awan ti bagi dagiti al-alya a kas iti bagik. Tapno mapaneknekanna a saan isuna nga al-alya, dimmawat ni Jesus iti makan. Inikkanda isuna iti naluto nga ikan ket kinnanna.

Kinuna ni Jesus kadakuada, “Imbagak kadakayo a masapul a matungpal dagiti amin a naisurat iti sao iti Dios a maipapan kaniak.” Inlawlawag ni Jesus ti sao iti Dios kadagiti adalan. Kinunana, “Nabayagen a naisurat nga agsagaba, matay ken agungar ti Messias iti maikatlo nga aldaw.”

“Naisurat iti sao iti Dios nga iwaragawagto dagiti adalak kadagiti amin a tattao a masapul nga agbabawida, tapno maawatda ti pannakapakawan dagiti amin a basbasolda. Aramidendanto daytoy manipud idiay Jerusalem. Mapan danto met kadagiti amin a puli iti tattao. Dakayo ti saksi a makaammo kadagitoy a banbanag a napasamak.”

Namin-adu a nagparang ni Jesus kadagiti adalanna kabayatan iti simmaruno nga uppat a pulo nga aldaw. Iti maminsan, nagparang isuna iti naminpinsan kadagiti nasurok a limagasut a tattao. Pinaneknekanna kadagiti adalanna iti adu a wagas a sibibiag isuna. Insurona dagiti banbanag maipapan iti pagarian iti Dios.

Kinuna ni Jesus kadagiti adalanna, “Inted kaniak iti Dios ti amin a pannakabalin idiay langit ken ditoy daga. Mapan kayo, mangisuro kayo kadagiti amin a puli iti tattao tapno agbalinda nga adalak. Bautisaranyo ida iti nagan iti Ama iti Anak ken iti Espiritu Santo. Suroanyo ida nga agtulnog kadagiti amin nga imbilinko kadakayo. Laglagipenyo nga addaak a kankanayon kadakayo.”

Kalpasan iti uppat a pulo nga aldaw idi nagungar ni Jesus, kinunana kadagiti adalanna, “Agtalinaed kayo idiay Jerusalem agingga nga ited iti Dios Ama kadakayo ti pannakabalin babaen iti Espiritu Santo.” Kalpasanna, nagpangatu ni Jesus idiay langit. Linengdan isuna dagiti ulep. Nagtugaw ni Jesus iti makannawan iti Dios tapno agturay iti lubong.

Istorya iti Biblia manipud: Mateo 28:16-20; Marcos 16:12-20; Lucas 24:13-53; Juan 20:19-23; Aramid 1:1-11