Ti Istorya iti Naulpit nga Agserserbi
Maysa nga aldaw nagsaludsod ni Pedro kenni Jesus, “Apo, mamin-ano kadi a pakawanek ti kabsatko no makabasol kaniak? Mamin-pito kadi?” Kinuna ni Jesus, “Saan laeng a mamin-pito no diket maminpito a pito pulo!” Ti kayat a sawen ni Jesus iti daytoy, rumbeng laeng a kanayontayo a mamakawan. Kalpasanna, nagistorya ni Jesus.
Kinuna ni Jesus, “Maiyarig ti Pagarian iti Dios iti maysa nga ari a mangsingsingir kadagiti utang dagiti agserserbi kenkuana. Adda ti agserserbi a nakautang iti dakkel kenkuana a ti kaibatoganna ket ti tangdanna iti las-ud iti 200,000 a tawtawen."
“Gapu ta saan a makabayad ti agserserbi iti utangna, kinuna iti ari, 'Ilakoyo kas adipen daytoy a lalaki ken ti pamiliana tapno mabayadanna ti utangna.'’’
“Ngem nagparintumeng ti agserserbi iti sangoanan iti ari ken nagpakpakaasi a kunana, ‘Pangaasim an-anusannak pay laeng. Bayadakto ti amin nga utangko kenka.’ Naasian ti ari iti agserserbi isu a saannan a pinabayadan ti utangna ken pinalubosanna daytoy a siwayawaya.”
“Idi pimmanawen ti agserserbi iti imatang iti ari, nasabatna ti padana nga agserserbi a nakautang kenkuana iti agbalor iti uppat a bulan a tangdan. Tinengngelna ti padana nga agserserbi ket kinunana, ‘Bayadam ti kuarta nga inutangmo kaniak!’’’
“Nagparintumeng ti padana nga agserserbi ket kinunana , ‘Pangaasim, an-anusannak pay laeng, bayadakto ti amin nga utangko kenka.’ Ngem impabaludna ti padana nga agserserbi inggana a mabayadanna ti amin nga utangna.”
“Nakita dagiti dadduma nga agserserbi ti napasamak ket maburiburanda iti nakitada. Napanda iti ari ket imbagada ti amin a napasamak.”
“Pinaayaban iti ari ti agserserbi ket kinunana, ‘Dakeska nga agserserbi! Pinakawankon ti utangmo agsipud ta nagpakpakaasika kaniak. Kasta met koma ti inaramidmo.’ Kasta unay ti pungtot iti ari ket impabaludna ti dakes nga agserserbi aginggana a mabayadanna dagiti amin nga utangna.”
Kalpasanna kinuna ni Jesus, “Kastoy met laeng ti aramiden iti Amak a nainlangitan kadakayo no saanyo a pakawanen a naimpusoan ti kabsatyo.”
Istorya iti Biblia manipud Mateo 18:21-35