Ti Pannakaliput ni Jesus

Tinawen a ramrambakan dagiti Judio ti Ilalabas. Daytoy a panagrambak ket maipapan iti panangisalakan iti Dios kadagiti kapuonan dagiti Judio manipud iti pannakaadipen idiay Egipto adun a tawen ti napalabas. Agarup tallo a tawen manipud idi inrugi ni Jesus ti panangaskasaba ken panangisursurona kadagiti lugar nga adu ti tao. Imbaga ni Jesus kadagiti adalanna, kayatna a rambakan ti aldaw iti Ilalabas a kaduana ida idiay Jerusalem. Kinunana pay a mapapatayto isuna sadiay.

Maysa kadagiti adalan ni Jesus ni Judas, isu ti agig-iggem iti pagyanan iti kuarta dagiti adalan. Naagum ni Judas iti kuarta ket masansan a takawenna daytoy. Idi simmangpet ni Jesus ken dagiti adalan idiay Jerusalem, napan ni Judas kadagiti panguloen iti Judio. Imbaga ni Judas a liputanna ni Jesus kasukat iti kuarta a maitedda kenkuana. Ammo ni Judas nga ilibak dagiti panguloen iti Judio a ni Jesus ti Mesias. Pinanggep dagitoy a papatayen ni Jesus.

Binayadan dagiti panguloen iti Judio, nga indauloan iti kangatoan a padi, ni Judas iti tallo pulo a pirak. Inaramidda daytoy tapno liputan ni Judas ni Jesus. Mapasamak daytoy kas impadto dagiti propeta. Immanamong ni Judas, innalana ti kuarta ket pimmanaw. Rinugian ni Judas a mangsapul iti tiempo tapno matulonganna ida a mangtiliw ken ni Jesus.

Rinambakan ni Jesus ken dagiti adalan ti Ilalabas idiay Jerusalem. Kabayatan iti pannangan idi aldaw iti Ilalabas, nangala ni Jesus iti tinapay, pinisipinisina daytoy ket kinunana “Alaenyo ket kanenyo. Daytoy iti bagik a maited kadakayo. Aramidenyo daytoy a panglaglagip kaniak.” Imbaga ni Jesus kadagiti adalanna a maidatonto ti bagina para kadakuada babaen iti kasta a wagas.

Nangala ni Jesus iti kopa ket kinunana, “Inumenyo daytoy. Daytoy ti darak iti Baro a Tulag a maited maipaay iti pannakapakawan dagiti basbasol. Tunggal inumenyo daytoy, aramidenyo a panglaglagip kaniak.”

Kalpasan daytoy, imbaga ni Jesus kadagiti adalanna, “Liputannakto iti maysa kadakayo.” Nakigtot dagiti adalan, sinaludsodda no siasinno ti makaaramid iti daytoy a banag. Kinuna ni Jesus, “Ti tao a pangtedak iti daytoy a pisi iti tinapay ket isu ti mangliliput.” Kalpasanna, inyawatna ti tinapay kenni Judas.

Kalpasan nga inawat ni Judas ti tinapay, inturayan isuna ni Satanas. Iti dayta nga rabii, pimmanaw ni Judas ket napan kadagiti panguloen iti Judio tapno tulonganna ida a mangtiliw ken ni Jesus.

Kalpasan iti pannangan, napan ni Jesus ken dagiti adalanna iti Bantay ti Olibo. Kinuna ni Jesus, “Panawandak iti daytoy a rabii. Kas naisurat, ‘Papatayekto ti agpaspastor ket mawarawaranto dagiti amin a karnero.’’

Simmungbat ni Pedro ket kinunana, “Pumanaw man dagiti dadduma, saankanto pulos a panawan!” Kinuna ni Jesus ken ni Pedro, “Kayatnakayo nga iturayan ni satanas ngem inkararagankan Pedro tapno agtultuloy ti pammatim kaniak. Mamintallonakto nga ilibak sakbay nga agtaraok ti kawitan tatta a rabii.”

Simmungbat ni Pedro ket kinunana, “Uray pay no matayak, saankanto pulos nga ilibak!” Kasta met laeng ti imbaga dagiti amin nga adalan kenkuana.

Napan ni Jesus ken dagiti adalan na iti lugar a maaw-awagan iti Getsemane. Imbaga ni Jesus kadagiti adalanna nga agkararagda tapno saanda a masulisog. Kalpasanna, nagkararag ni Jesus nga agmaymaysa.

Nagkararag ni Jesus iti namitlo a daras, “Ama, no mabalin koma, pangaasim ta saanmo nga iparikna ti kasta unay a panagrigat kaniak, ngem no awanen ti sabali pay a wagas tapno mapakawan ti basbasol dagiti tattao, ti pagayatam ti matungpal.” Nariribukan unay ni Jesus. Nagtedted ti ling-etna a kasla dara. Nangibaon ti Dios iti maysa nga anghel tapno mangpabileg kenkuana.

Kalpasan iti tunggal panagkararag na, mapmapan ni Jesus iti ayan dagiti adalanna ngem nakaturogda. Idi nagsubli ni Jesus iti maikatlo a daras, kinunana kadakuada, “Agriingkayon! Adda ditoyen ti mangliliput.''

Simmangpet ni Judas a kaduana dagiti panguloen iti Judio, dagiti soldado ken adu a tattao. Adda awitda a kampilan ken pang-ur. Immasideg ni Judas ken Jesus ket kinunana, “Kablaawan ka, Manursuro,” kalpasanna, inagkanna ni Jesus. Daytoy ti pagilasinan dagiti panguloen iti Judio no siasino ti tiliwenda. Kinuna ni Jesus, “Judas, liputannak kadi babaen iti maysa nga agek?”

Idi tiliwenen dagiti soldado ni Jesus, inasut ni Pedro ti kampilanna ket tinagbatna ti lapayag iti maysa nga agserserbi iti kangatoan a padi. Kinuna ni Jesus, “Idulinmo ta kampilan! Mabalinko a dawaten iti Amak a mangibaon kadagiti angheles tapno mangsalaknib kaniak ngem masapul nga agtulnogak iti Amak.” Kalpasan daytoy, pinaimbag ni Jesus ti lapayag iti lalaki. Nagtataray dagiti amin nga adalan idi natiliw ni Jesus.

Istorya iti Biblia manipud: Matthew 26:14-56; Mark 14:10-50; Luke 22: 1-53; John 12:6; 18: 1-11