Ti Baro A Tulag Ti Dios

Imbaga iti anghel iti birhen a ni Maria nga ipasngaynanto ti anak iti Dios. Kabayatan a birhen pay laeng ni Maria, binendisionan iti Espiritu Santo ket nagsikog isuna. Impasngayna ti maysa a lalaki ket pinanagananna iti Jesus. Kayat na sawen agpada a Dios ken tao ni Jesus.

Nagaramid ni Jesus kadagiti adu a milagro a mangpaneknek nga isuna ket Dios. Nagna isuna iti rabaw iti danum, pinasardengna ti bagyo, inagasanna dagiti adu a masaksakit, pinaksiatna dagiti demonyo, pinagungarna dagiti natay, ken pinagbalinna nga umdas ti lima a tinapay ken dua a babassit nga ikan a kinnan ti nasurok 5000 a tattao.

Maysa met a nalaing a manursuro ni Jesus, nagsao nga addaan iti turay gapu ta Anak isuna iti Dios. Insurona a masapul nga ayatem ti padam a tao kas panagayatmo iti bagim.

Insurona pay a kasapulan nga ipangpangrunam nga ayaten iti Dios ngem ti aniaman a banag, agraman ti kinabaknang mo.

Kinuna ni Jesus, napatpateg ti pagarian iti Dios ngem iti uray aniaman ditoy lubong. Ti kapapatgan a banag kadagiti tattao ket ti panakairamanda iti pagarian iti Dios. Masapul a mapakawanka kadagiti basbasolmo tapno makastrekka ti pagarian iti Dios.

Insuro ni Jesus a maisalakan dagiti umawat kenkuana ngem adda met dagiti saan. Inyarigna dagiti dadduma a tattao iti nadam-eg a daga. Inawatda ti naimbag a damag ni Jesus ket naisalakanda. Dagiti dadduma ket kasla natangken a daga iti dalan, saan a sumrek ket saan nga agbunga ti sao iti Dios, isuda dagiti tattao a mangilaksid iti mensahe maipapan ken ni Jesus, saandanto a makastrek ti pagarian iti Dios.

Insuro ni Jesus nga ay-ayaten unay iti Dios dagiti managbasol. Kayatna ida a pakawanen ken pagbalinen nga annakna.

Imbaga pay ni Jesus kadatayo a kabusor iti Dios ti basol. Nairaman dagiti amin a kaputotan da Adan ken Eba idi nagbasolda. Kas supapakna, nagbasol amin a tattao ditoy lubong ket naisinada iti Dios. Gapu iti daytoy, nagbalin a kabusor iti Dios dagiti tao.

Nupay kasta, ay-ayaten unay iti Dios dagiti tattao ditoy lubong. Intedna ti kakaisuna nga Anakna tapno saanto a madusa ti siasinoman a mamati ken ni Jesus gapu kadagiti basbasolna. Agbiagdanto nga agnanayon ti denna iti Dios.

Gapu kadagiti basolmo, rumbeng laeng a matayka. Makapungtot kuma ti Dios kenka, ngem impabaklayna amin daytoy ken ni Jesus. Inawat ni Jesus ti dusam idi natay isuna idiay krus.

Saan pulos a nagbasol ni Jesus. Pinilina ti madusa ken matay. Daytoy ti naan-anay a daton a mangpakawan iti basolmo ken iti basol dagiti amin a tattao. Gapu ta indaton ni Jesus ti bagina tapno pakawanen iti Dios ti amin a basbasol, uray dagiti nadagsen a basol.

Saanka a maisalakan babaen iti naimbag nga aramidmo. Awan a pulos kabaelam a mangiyasideg ti bagim iti Dios. Ni laeng Jesus ti makaikkat kadagiti basbasolmo. Masapul a patiem a ni Jesus ti Anak iti Dios, natay isuna idiay krus iti saadmo, pinagungar isuna iti Dios.

Isalakan iti Dios ti siasinoman a mamati ken mangawat ken ni Jesus kas Apona. Gapuna, saanna nga isalakan ti siasinoman a saan a mamati kenkuana. Awan aniaman no nabaknang wenno napanglawka, lalaki man wenno babai, ubing wenno nataengan, wenno sadinnoman ti pagnanaedam. Ay-ayatennaka iti Dios. Kayatna a mamatika ken Jesus tapno adda nasinged a langenlangenyo.

Aw-awisennaka ni Jesus a mamati kenkuana ken masapul a mabautisaranka. Mamatika kadi a ni Jesus ti Mesias, ti kakaisuna nga anak iti Dios? Mamatika kadi a managbasolka ken maikarika a dusaen iti Dios? Mamatika kadi a natay ni Jesus idiay krus tapno mapakawan dagiti basolmo?

No mamatika ken ni Jesus ken iti inaramidna maipaay kenka, maysakan a Kristiano! Inlapsutnaka iti Dios manipud iti nasipnget a pagarian ni Satanas ket ipannaka iti nalawag a pagarian iti Dios. Inikkat iti Dios ti dakes a kinataom. Sinukatanna iti baro ken nalinteg a wagas iti panagbiag.

No maysaka a Kristiano, pinakawanen iti Dios dagiti basolmo gapu iti inaramid ni Jesus. Imbilangnakan iti Dios a gayyem, saannakan a kabusor.

No gayyemnaka iti Dios ken agserserbika ken ni Jesus nga Apo, kayatemto ti agtulnog iti isursuro ni Jesus kenka. Uray maysakan a Kristiano, masulisogkanto latta nga agbasol ngem matalek ti Dios ken imbagana a nu ipudnom dagiti basbasolmo ket pakawanennaka. Papigsaennaka tapno saanka nga agbasol.

Imbilin iti Dios nga agkararagka, adalem ti saona, dayawem isuna a kadwa dagiti dadduma a Kristiano. Imbilina pay nga ibingaymo kadagiti sabali a tattao ti inaramidna kenka. Makatulong amin dagitoy kenka tapno maaddaanka iti nadekdekket a pannakilangenlangen kenkuana.

Istorya ti Biblia manipud: Roma 3:21-26, 5:1-11; Juan 3:16; Marcos 16:16; Colosa 1:13-14; 2 Corinto 5:17-21; 1 Juan 1:5-10