Ti Naikari nga anak

Kalpasan iti sangapulo a tawen, nakadanon da Abram ken Sarai idiay Canaan. Awan pay laeng iti anakda, isu a kinuna ni Sarai ken ni Abram, "saan nga impalubos iti Dios nga aganakak ken baketak unayen tapnu agsikug pay, asawaem daytoy adipen ko a ni Hagar tapno maaddaan iti anak a para kaniak."

Inasawa ngarud ni Abram ni Hagar. Naaddaan ni Hagar iti anak a lalaki ket pinanaganan ni Abram iti Ismael. Pinagimonan ni Sarai ni Hagar. Idi sangapulo ket tallo ti tawen ni Ismael, nagsao manen ti Dios ken ni Abram.

Kinuna iti Dios, "Siak ti mannakabalin a Dios, makitulagak kenka." Nagdumog ni Abram iti daga. Imbaga iti Dios kenkuana, "Paraburanka iti adu nga annak ken appuko, itedko kenka ken kadagiti kaputotam ti daga iti Canaan. Agbalinak a Diosda ti agnanayon. Kasapulan a kugitem ti amin a lallaki iti pamiliam."

"Maaddaan ti asawam a ni Sarai iti anak. Isu ti naikari nga anak. Panaganamto iti Isaac. Makitulagakto kenkuana, maaddaanto isuna iti adu a kaputotan ket agbalinda a nabileg a nasion. Pagbalinek met ti kaputotan ni Ismael a nabileg a nasion ngem ti tulagko ket adda ken ni Isaac." Binaliwan iti Dios ti nagan nga Abram iti Abraham, ti kayatna a sawen "Ama iti adu". Binaliwan met iti Dios ti nagan ni Sarai iti Sarah, ti kayatna a sawen "prinsesa."

Iti dayta met laeng nga aldaw, kinugit ni Abraham dagiti amin a lallaki iti pagtaenganna. Agarup maysa a tawen ti napalabas, impasngay ni Sarah ti anak ni Abraham. agtawen idi ni Abraham ti 100 ket 90 met ti tawen ni Sarah iti daydiay a tiempo. Pinanagananda ti anak ni Abraham iti Isaac kas imbilin ti Dios kadakuada.

Idi maysan a barito ni Isaac, pinadas iti Dios ti pammati ni Abraham ket kinunana, "Alaem ni Isaac a kakaisu nga anakmo ket idatonmo kaniak." Nagtulnog ni Abraham iti Dios ket insaganana nga idaton ti anakna.

Idi magmagna da Abraham ken Isaac nga agturong idiay lugar a pagidatonan, nagsaludsod ni Isaac, "Ama, addan ti kayo a pagsungrod iti daton ngem ayanna ti karnero?" Simmungbat ni Abraham, "Anakko, mangipaay ti Dios iti karnero a maidaton."

Idi makadanonda iti lugar iti pagidatonan, rineppet ni Abraham ni Isaac ket impaiddana iti altar. Patayenna koman ti anakna ngem nagsao ti Dios, "Agsardengka! saanmo a dangran ti ubing. Ammok itan nga agbutengka kaniak gapu ta saanmo nga inpaidam dayta maymaysa nga anakmo."

Iti saan unay nga adayo, nakita ni Abram ti maysa a kalakian a karnero nga naisab-it iti maysa a kayo. Nangisabet ti Dios iti maysa a karnero tapno isu ti maidaton kenkuana a saan ketdi a ni Isaac. Siraragsak ni Abraham a nangidaton iti karnero nga inted iti Dios kenkuana.

Kinuna iti Dios ken ni Abraham, "gapu ta sisasagana ka a mangted iti amin kaniak uray pay ti bugbugtong nga anakmo, ikarik a bendisionanka, agbalin dagiti kaputotam nga ad-adu pay ngem dagiti bituen iti tangatang. Gapu ta nagtulnogka kaniak, mabendisionan amin a pamilia ditoy lubong gapu iti pamiliam."

Istorya iti Biblia manipud: Genesis 16-22