Inayaban ti Dios ni Moises

Kalpasan a natay ni Jose, amin a kakabagianna ket nagtalinaed idiay Egipto. Nagtultuloyda ken dagiti kaputotanna a nagnaed idiay iti adu a tawtawen. Naaddaanda iti adu nga annak. Isuda dagiti Israelita.

Kalpasan iti ginasut a tawtawen, immadu iti bilang dagiti Israelita. Saan metten a malagip dagiti Egipcio ni Jose ken dagiti banbanag nga inar-aramidna a panangtulong kadakuada idi. Nagbuteng dagiti Egipcio gapu ta immadu dagiti Israelita, isu a pinagbalin ti Paraon nga agturturay iti dayta a tiempo nga adipen dagiti Israelita kadagiti Egipcio.

Pinilit dagiti Egipcio dagiti Israelita nga agaramid iti adu a pasdek ken siudad. Gapu iti nakaru a rigat iti trabahoda, nagbalin a kakaasi unay dagiti Israelita. Ngem binendisionan ida iti Dios ket immadu pay ti annakda.

Nakita iti Paraon nga umad-adu dagiti annak dagiti Israelita. Isu nga imbaonna dagiti soldadona tapno papatayenda dagiti amin a maladaga a lallaki babaen iti panangibilleng kadakuada idiay karayan iti Nilo.

Adda maysa a babai nga Israelita a nangipasngay iti maysa a maladaga a lalaki. Inlimmeng iti babai ken iti asawana ti ubing iti amin a kabaelanda.

Idi saan a mailimmengen dagiti nagannak ti maladaga, ingkabilda ti ubing idiay agtaptapaw a basket idiay kalidliddaan idiay igid iti karayan iti Nilo tapno maisalakan isuna kadagiti mangpapatay kenkuana. Buybuyaen met ni manangna no ania ti mapasamak kenkuana.

Nakita iti babai nga anak iti Paraon ti basket ket kinitana no ania ti adda idiay unegna. Idi nakitana nga ubing ti nagyanna, innalana daytoy ket imbilangna a kas bukodna nga anak. Nangayab isuna iti maysa a babai nga Israelita tapno mangpasusu iti ubing. Saanna nga ammo nga isu gayam ti pudno nga ina iti ubing. Idi dakkelen ti ubing, saannan a kasapulan ti aggatas pay. Isu nga insublina daytoy iti anak iti Paraon. Pinanaganan ngarud iti anak iti Paraon ti ubing iti Moises.

Iti maysa nga aldaw, idi dakkelen ni Moises, nakakita isuna iti maysa nga egipcio a mangsap-saplit iti maysa a padana nga Israelita nga adipen. Pinadasna nga isalakan daytoy.

Idi pagarupen ni Moises nga awan ti nakakita kenkuana, pinatayna ti Egipcio ket inkalina ti bagina. Ngem adda gayam nakakita iti inaramidna.

Idi naammoan iti Paraon ti inaramidna, pinanggepna a papatayen ni Moises. Gapu iti daytoy, naglibas ni Moises. Napan isuna idiay let-ang manipud Egipto tapno maisalakanna ti bagina kadagiti soldado iti Paraon.

Nagbalin ni Moises a mangay-aywan kadagiti ay-ayup idiay let-ang nga adayo idiay Egipto. Nakaasawa isuna idiay ken naaddaan iti dua nga annak a lallaki.

Iti maysa nga aldaw, kabayatan nga ipaspastor ni Moises dagiti karnerona, nakakita isuna iti maysa nga agap-apoy a kayo. Ti kinaagpaysona, saan met talaga a mapupuuran diay kayo. Inasetganna diay agap-apoy a kayo tapno makitana a nalaing. Idi immasideg isunan ket nagtimek ti Dios kenkuana. Kinuna iti Dios, “Moises, ikkatem ta sandalyasmo ta nasantoan a daga ti badbaddekam.“

Kinuna pay iti Dios,“Nakitak ti panagsagaba dagiti tattaok idiay Egipto. Tatta ngarud ket ibaonka a mapan iti Paraon tapno mawaya-wayaan dagiti Israelita manipud iti pannakaadipenda idiay Egipto. Itedkonto kadakuada ti Canaan. Daytoy ti daga nga inkarik kenni Abraham, Isaac ken ni Jacob.

Nagsaludsod ni Moises, “kasano no damagen dagiti tattao kaniak no siasino ti nangibaon kaniak, ania ti ibagak? Kinuna iti Dios, “SIAK ket ni SIAK. Ibagam kadakuada nga, 'imbaonnak ni Siak.' Ibagam met a, ‘Siak ni Yahweh, ti Dios ni Abraham, Isaac ken ni Jacob. Daytoy ti agnanayon a naganko.

Mabuteng ni Moises ket saanna a kayat a mapan iti Paraon gapu ta ammona a saanna unay a kabaelan ti agsao. Gapu iti daytoy, imbaon iti Dios ti kabsatna a ni Aaron tapno tulunganna ni Moises. Binallaagan iti Dios ni Moises ken Aaron nga agbalinto a nasukir ti Paraon ken saanto a dumngeg.

Istorya iti Biblia manipud: Exodu 1-4