Pinaimbag ni Jesus ti Lalaki a naluganan ti Demonyo ken ti Babae a Masakit
Maysa nga aldaw, naglugan ni Jesus ken dagiti adalanna iti bangka. Bimmalasiwda iti dan-aw ket napanda idiay pagnanaedan dagiti Geraseno.
Idi nakaballasiwda, nagtartaray a simmabat kenni Jesus ti maysa a lalaki a naluganan ti demonyo.
Napigsa unay daytoy a lalaki awan pulos ti makalapped kenkuana. Inkawar pay dagiti tattao dagiti ima ken sakana ngem kanayonna laeng a pugsaten dagitoy.
Agnanaed daytoy a lalaki kadagiti tantanem iti dayta a lugar. Kanayon nga agririyaw daytoy a lalaki iti aldaw ken rabii. Awan ti badona ken kanayonna a sugaten ti bagina iti bato.
Idi napan ti lalaki kenni Jesus, nagparintumeng daytoy iti sangoananna. Kinuna ni Jesus iti demonyo, “Rumuarka iti daytoy a lalaki!”
Nagpukkaw ti naluganan a lalaki ket kinunana, “Jesus nga Anak ti kangatoan a Dios! Ania ti kayatmo kaniak? Pangaasim ta saannak a parigaten!” Sinaludsod ni Jesus ti demonyo, “Ania naganmo?” Simmungbat daytoy ket kunana, “Rinib-ribu ti naganko gapu ta adukami." (Ti “Rinib-ribu” ket bunggoy iti rinib-ribu a soldado iti Roma.)
Nagpakpakaasi dagiti demonyo kenni Jesus, “Pangaasim!, Saannakami a papanawen iti daytoy a lugar." Adda iti bunggoy ti baboy a mangmangan iti asideg nga turod. Nagpakpakaasi dagiti demonyo kenni Jesus ket kinunada, “Pangaasim, palubosannakami laengen a sumrek kadagiti baboy!” Pinalubosan ida ni Jesus ket kinunana, "Mapankayo!”
Rimmuar dagiti demonyo manipud iti lalaki ket simrekda kadagiti bab-baboy. Nagtaray dagiti agarup 2,000 a baboy iti derraas. Timmappuakda iti dan-aw ket nalmesda amin.
Idi nakita dagiti agay-aywan kadagiti baboy ti napasamak, nagtarayda a napan idiay ili ket imbagada kadagiti tattao a masabsabatda ti inaramid ni Jesus. Napan dagiti tattao a naggapu iti ili ket nakitada ti lalaki a dati a naluganan dagiti demonyo. Natalna isuna nga nakatugaw, nakabadon ken nagsubli iti sigud ti panaggunayna.
Nagbuteng dagiti tattao isunga imbagada kenni Jesus a pumanaw idiay ayanda. Naglugan ngarud ni Jesus iti bangka tapno pumanaw ngem nagpakaasi a sumurot kenkuana ti lalaki a naluganan dagiti demonyo.
Kinuna ni Jesus kenkuana, “Saanka a sumurot, agawidka ket ibagam kadagiti gagayyem ken pamiliam dagiti amin nga inaramid ti Dios kenka ken no kasano a kinaasiannaka.”
Pimmanaw ngarud ti lalaki ket imbagana kadagiti amin ti inaramid ni Jesus kenkuana. Nasdaaw dagiti amin a nakangngeg iti istoryana.
Nagsubli ni Jesus iti ballasiw ti dan-aw. Inaribungbongan ti adu a tattao ni Jesus idi nakadanon isuna. Nagdidinnuron dagiti tattao. Adda ti maysa a babae idiay nga adda sakitna. Sangapulo ket dua a tawen a saan nga agsarsardeng ti dara a rumrumwar kenkuana. Naibayadna kadagiti mangagas ti amin a kuwartana tapno maagasan isuna ngem kimmarkaro pay ti sakitna.
Nadamagna nga adu dagiti masakit nga inagasan ni Jesus ket pinampanunotna, "Masiguradok a maagasanak met no masagid ko laeng ti pagan-anay ni Jesus!” Napan ngarud isuna iti likodan ni Jesus ket sinagidna ti pagan-anayna. Kalpasanna daytoy, nagsardeng a dagus ti panagruar ti dara kenkuana!
Narikna a dagus ni Jesus nga adda ti napaimbag babaen ti pannakabalinna isunga timmalyaw ket nagsaludsod isuna, “Siasino ti nangsagid kaniak?” Simmungbat dagiti adalanna ket kinunada, “Napalawlwanka ti nagadu a tattao a mangsagsagid ken mangdungdungpar kenka. Apay ta saludsodem no siasinno ti nangsagid kenka?”
Nagparintumeng ti babai iti sangoanan ni Jesus, agtigtigerger ken mabutbuteng isuna. Imbagana kenni Jesus ti inaramidna ken no kasano nga naagasan isuna. Kinuna ni Jesus kenkuana, “Naagasanka babaen ti pammatim. Agawidka nga adda ti kappia.”
Istorya ti Bibliya manipud: Mateo 8:28-34; 9:20-22; Marcos 5:1-20; 5:24b-34; Lucas 8:26-39; 8:42b-48