7. Allah barak Yakhub

Al gissa di ti guul chunu?

1. Kikef Isaakha wa Rifka rabbo iyaluhum chik-chik?

   Isaakha yi hibb Isau ziada min Yakhub wa Rifka ti hibb Yakhub ziada min Isau (7:1).

2. Chunu chey al Isau anta le Yakhub badal al akil?

   Isau bas mawlud awal. Achan hu bas al bikhir, inda hugug le yalga maal katiir min abu ziada min Yakhub, wa yalga charaf ziada min Yakhub. Lakin, Isau badal kullu al achia dol maa Yakhub fi sabab akil chiya bas (7:2).

3. Mala Rifka wa Yakhub tchatcho Isaakha wa dawaro yi akkudu leya kadar Yakhub da bas Isau?

   Rifka wa Yakhub yi dooru kadar Isaakha yi barik Yakhub fi badal Isau (7:3, 7:4).

4. Mala Yakhub rabat farwa hana khanam fi ragaba wa ideena?

   Yakhub yi door kadar Ideena wa ragaba bamalo suf, misil ideen wa ragab hana akhu Isau. Khalas Isaakha yi chumma le farwa hanal kabich wa yi guul kadar Yakhub da bas Isau (7:3, 7:4).

5. Yakhub sirig baraka hana Isau, fi bakan da Isau fakkar yi sawi chunu le Yakhub?

   Isau dawar yarja yaman Isaakha yi mut, wa baad da yaktul Yakhub (7:5).

6. Chunu Rifka sawata le tadara Isau ma yaktul Yakhub?

   Rifka wa Isaakha rassalo Yakhub ba’id min balaaduhum le achan Isau ma yaktula (7:6).

7. Kam wakit Yakhub ga’id ba’id min balaada?

   Yakhub ga’id maa ahal Rifka le muddat ichirin sana (20 sana). Wa baaden gabbal fi balaada maa usra al Allah anta leya wakit hu ga’id ba’id min balaada (7:8).

8. Kikef Yakhub khayar ray hana Isau le ma yaktula?

   Hu rassal khubuchan wa maal katiir le Isau achan yi khayir fikira le ma yaktula (7:9).

9. Hal Isau dawar battan yaktul Yakhub?

   Isau battan ma za’alan min Yakhub wa khalas hu ma dayir yaktula. Isau wa Yakhub aacho sawa fi balaad kanaa wa sataro abuhum sawa (7:10).

Al gissa di maanataha lena chunu?

1. Mala Rifka ti hibb Yakhub ziada min Isau?

   Yakhub yi riid yagod fil beet fi bakan al Rifka ga’ide. Ankun achan da bas hi ti hibba ziada min Isau.

2. Mala Isaakha bi hibb Isau ziada min Yakhub?

   Isau bi riid gannisin. Ankun Isaakha kulu ga’id yi riid gannisin wa yakul seet hana kadade al Isau ga’id baktula. Achan ke da, hu bi hibb Isau ziada min Yakhub.

3. Machakil al weenu zaharo achan Isaakha wa Rifka ga’idiin yi hibbu iyaluhum ayyi wahid chik-chik?

   Yakhub wa Isau ya’arfu kadar abbahatuhum dol ma ga’idiin yi hibbuhum kulluhum sawa-sawa. Achan da bas Yakhub wa Isau ga’idiin yi harubu da’iman ambeenatuhum. Humma kulluhum itneen dawaro yalgo ayyi wahid chey al akhu inda.

4. Mala Isau kaan jahiz le yi badil kuburita bel akil?

   Isau ma lamaya bilhain be wa’ad al Allah sawa le Ibrahim. Chey wahid al ajaba da illa akil hana yom da bas. Baaden da, hu dawar yalga warasa hana abu. Lakin hu ma fakkar le yalga chey wahid min Allah.

5. Yakhub tchatcha le Isaakha achan yistafiid barakita. Chunu al chey yi guul fi Yakhub?

   Da kaan adil le Yakhub achan yi fatich baraka min abu. Lakin hu biga khaltan achan tchatcha abu le yalgaha. Achan hu sawa al chey da, hu arrad min akhu wa ga’id ichirin (20) sana fi balaad akhar.

6. Hal Yakhub da kaan nadum adil?

   Baad marrat Yakhub ga’id yi karim Allah, wa hu dawar al baraka min Allah. Lakin Yakhub da inda khalat katiir. Hu da’iman dawar yi tchatchi nas le yalga chey hu yi doora. Be da kulu, Allah barak Yakhub achan hu wa’ada le Ibrahim kadar yi barik zurriyta.

Zibdet al kalam

Allah ikhtar le yi barik yakhub gubal ma yaldo, wa hu ga’id amin fi wa’ada. Lakin, Yakhub ma sawa da’iman chey al yi wassif kadar hu adil. Hu da’iman ga’id yi tchatchi nas al akhariin le yalga chey al hu dawara. Be da kulu, Allah ya’arfa kadar Yakhub dawar ya’abuda. Lakin battan, Allah wa’ada le Ibrahim kadar yi barik zurriyta. Achan ke da, Allah barak Yakhub hatta wakit al hu arrad min akhu. Hu gabbala Yakhub fi Kanaa wa barak usrata. Yakhub ma kaan da’iman saleeh, lakin hu aman be Allah.