33. Massal hanal harati

Al gissa di ti guul chunu?

1. Mala Isa rikib fi markaba le yi allim al nas?

   Al nas joo katiriin wa hawago gerib ziada. Khalas hu gamma rikib fil markaba achan yalga faraga le yi hajji lel nas kulluhum (33:1).

2. Chunu hassal le terab al dafag fil derib?

   Al tuyur akalo al terab al dafag fil derib (33:2).

3. Chunu hassal le terab al dafag fi turab al muhajar?

   Al terab al dafag fi turab al muhajar yibis ajala achan ma inda tine al yi magin fooga, khalas yibis wa mat (33:3).

4. Chunu hassal le terab al dafag fi chook?

   Bazar lakin chook khanaga, wa ma khalla wilid (33:4).

5. Chunu hassal le terab al dafag fi turab al adil?

   Al terab al dafag fi turab al adil wilid talatin (30), sittin (60), wa baad minnuhum miya (100) (33:5).

6. Al terab yi massil chunu fil gissa di?

   Al terab yi massil hine kalimat Allah al machat lel nas fil bakanat chik-chik (33:6).

7. Al derib yi massil chunu fil gissa di?

   Al derib yi massil nas al fihimo kalimat Allah, baaden iblis jaa chala min fikiruhum (33:6).

8. Al turab al muhajar yi massil chunu fil gissa di?

   Al turab al muhajar yi wassif nas al simio kalam Allah, lakin suubat al haya ma khallahum yi wakulu bel kamil le Allah (33:7).

9. Al turab al inda chook yi massil chunu fil gissa di?

   Al turab al inda chook yi massil nas al yi khallu al maal wa khumam hana dunia yachkhiluhum ziada min muhabbatuhum le Allah (33:7).

10. Al turab al adil yi massil chunu?

    Al turab al adil yi massil nadum al yassama wa yi amin be kalam hana Allah (33:9).

Al gissa di maanataha lena chunu?

1. Fi fikirku mala Isa hajja al gissa di le nas al katiriin?

   Kaan fi nafar hana nas katiriin fi ussut al jamaa, al ga’idiin yi ruddu fi kalam hana Isa be turukh mukhtalifa. Al gissa di ti wassif kikef humma gibilo kalam Allah. Humma kulluhum ga’idiin yassamo kalam hana Isa, lakin chiya minnuhum bas amano be kalama wa sawo al Allah dawara le yi sawu. Nas al akhariin fachalo le yi hibbu Allah be asbab mukhtalifiin.

2. Kikef al taab wal suubat yagdaro yadaro al insaan ma yi wakil fi Allah?

   Nas katiir ga’idiin yi fakkuru be khalat ke kadar Allah yi khalli yahassal lehum illa achia al kher. Achan da, wakit humma yataabo, yi fakkuru kadar Allah tchatchahum, ma ga’id yi tamim wala yi fakkir lehum. Wa khalas yagufu ma yi wakulu leya wa ma yi tabu. Lakin Allah wa’ad kadar al nas yi bachtunu talamiiza bilhain.

3. Kikef humum lel maal wa khumam hana dunia yadaro al nas le muhabba hana Allah?

   Isa gaal kadar al nas ma yagdaro yi hibbu Allah wal maal. Lazim yikhtaru wahid, imma yakhadumu le Allah aw lel maaluhum. Nas katiriin jarabo yakhadumu lel itneen kulluhum lakin ma gidiro. Kan ma khallo muhabbatuhum lel maal, humma yi khallu muhabbat Allah. Allah ma yarda min al nas dol.

4. Kikef al insaan yi jiib al samar talatin (30), sittin (60) aw Miya (100) marrat?

   Nadum wahid yagdar yi kalim fi Isa le nas akhariin katiriin wa yi jiibuhum le yi hibbu Allah. Chey da ma yahassal tawali bas. Lakin kan humma tabo Allah fi hayatuhum wa yi kalumu al akhariin beya, nas kutar yagbalo chahadatuhum. Al nas dol munkin yabgo usratuhum, rufuganuhum wala hatta nas al akhariin al ma ma’arufiin.

Zibdet al kalam

Nas kutar joo le yassamo taalim hana Isa. Al nas kaano katiriin lahaddi hu rikib al markaba fil alme achan yagdar yi hajji lehum kulluhum. Nas al katiriin ga’idiin yassamo kalama be turukh mukhtalifa. Wahidiin min al nas ma fihimo kamil. Akhariin aman le wakit giseyer. Lakin wahidiin amano be kalama wa khadamo Allah muddat hayatuhum. Be sabab da, Isa oorahum al gissa hanal harati. Al terab al wago fil turab al chik-chik wa bazaro fi bakanat chik-chik dol yi massulu al nas al chik-chik fi lubbal nas al katiriin. Al Masih ga’id yi guul le nas al katiriin wa le talamiiza khalli yintabu be kalam hana Allah. Lazim humma yi akkudu battan kadar ma yi khallu chey akhar fi hayatuhum le yi chil muhabba hana Allah. Kan humma istamaro fi imanuhum, humma yagdaro yi sawu chey katiir le Allah.