19. Al anbia

Al gissa di ti guul chunu?

1. Mala al malik Akaab dawar yaktul al nabi Aliya?

   Akaab zi’il min Aliya achan Aliya gaal kadar matara ma tanzil fi mamlakat Israiil. Aliya gaal kalam da achan Akaab wa chaab hana mamlakat Israiil ga’idiin ya’abudu sanam wahid al bi sammu baal (19:2).

2. Kikef Allah rabba le Aliya wakit al hu labbat min Akaab jambal wadi fi sahara?

   Allah rassal al tuyur al ga’idiin yi jibu khubza wa laham le Aliya wakit al hu labbat min Akaab (19:3).

3. Kikef Allah rabba Aliya fi wakit al hu ga’id yi ich maa mara al armala wa wileedaha?

   Allah jaala yaman burma hana dagig wa gazaz hana dihin hana mara al armala dol abadan ma gassaro. Le muddat siniin katiir, kaan induhum da’iman ma’ach al yakfi lehum, hatta wakit al ma’ach akhar ke biga mafi fil balaad (19:4).

4. Chunu al Aliya gaala le nas achan yikhtaru le yi sawu wakit al humma joo ma’al anbia hana baal fi jabal karmal?

   Aliya gaal le nas kadar humma lazim ma yi khayiru rayuhum fi chey al yi khus Allah. Kan Yawah bas Allah, humma lazim ya’abudu, lakin kan baal bas Allah, humma lazim ya’abudu fi badala (19:6).

5. Be nizba le Aliya kikef al chaab yagdaro yi gulu hal Yahwah wala baal bas yi kun Allah al hag?

   Aliya wa al anbia hana macho yi gaddumu dahiye fi madbah. Al nas yafahamo kadar Allah al bi rud wa bi rassil al nar fil madbah da bas Allah al hag (19:7).

6. Chunu al hassal fi wakit al anbia hana baal sa’alo le baal achan yi rassil al nar fil madbah?

   Chey ke ma hassal wakit al humma sa’alo le baal yi rassil al nar (19:8).

7. Chunu al hassal fi wakit al Aliya talab min Yahwah le yi rassil al nar fil madbah?

   Al nar nazal min al sama wa harrag al madbah wa kullu chey al fi jamba (19:11).

8. Kikef Iliyaas chaffa Noman min marada hanal baras?

   Iliyaas gaal le Noman khalli yamchi yi tamis sabaa marrat fi bahar al urdun. Awalan da, hu aba. Lakin baaden, hu khayar fikira wa sawa chey al Iliyaas gaal leya yi sawi. Allah chaffa tawali baad al hu ti’i (19:14, 19:15).

9. Kikef al chaab dawar yaktul al nabi Yeremia?

   Humma zagolo Yeremia fil biir al ma inda katiir wa khallo fi bakan le yi mut. Lakin baaden da, al malik rassal khudama le yamurgu (19:17).

10. Be wa’ad hana al weenu al anbia dol zakkaro lel nas?

    Al anbia zakkaro lehum kadar Allah bi rassil lehum al Masih (19:18).

Al gissa di maanataha lena chunu?

1. Kikef al chaab radda da’iman lel anbia al Allah rassalahum lehum?

   Al chaab ma aman be chey al anbia ga’idiin yi guulu. Bel aks, humma ta’aso al anbia wa dawaro da’iman yaktuluhum. Be da kulu, al anbia dol ga’idiin da’iman yi kaburu al chaab fi chey al yi khus Allah.

2. Kikef al nabi Aliya aach fi zaman hana juu al jafaf sabbaba da?

   Wakit al matara bigat mafi fi mamlakat Israiil da, akil kulu biga chiya bilhain. Fi zaman da, Allah rabba Aliya be tarikha khasa. Hu rassal al tuyur al ga’idiin yi jubu akil le Aliya. Hu battan sabbab al akil hana mara wahide armala al miskine le abadan ma yi gassir le achan hi tagdar ti rabbi Aliya. Allah rabba Aliya achan Aliya ti’i le Allah wa balakh rissala hana Allah lel chaab.

3. Mala Aliya gaal le nas khalli yi subbu alme fi ras al madbah?

   Aliya gaal le nas khalli yi zubbu fi ras al madbah le achan yi kun gasi bilhain le yaharig.Hu dawar khalli al nas ya’arfu kadar Yahwah bas al yi harrig al madbah da bel hagiga. Achan ke da, hu dawar kadar al madbah yi layin bilhain le achan Allah weheeda bas yagdar yi harriga. Hu ya’arfa kadar chey al gasi le Allah ke abadan mafi.

4. Mala Noman ma macha fil bahar tawali fi wakit al Iliyaas leya khalli yamchi?

   Noman ankun fakkar kadar chey al Iliyaas gaala leya le yi sawi da kaan sahil bilhain le yachfi min marada. Awalan, hu fakkar kadar lazim yi sawi chey wahid gasi bilhain gabul. Lakin, wakit hu sawa chey al hayin al Iliyaas gaal leya yi sawi da, hu biga aafe!

5. Chunu al anbia gaalo le nas yi sawu le achan Allah ma yi dammiruhum?

   Al anbia gaalo le nas kadar humma lazim yi tubu min zunubuhum. Da maanata gaal humma yi khayiru fikiruhum fi chey al yi khus Allah wa yabado yi fakkuru fooga be tarikha mukhtalifa. Achan ke da, humma lazim yafahamo kadar Yahwah bas Allah al hakh wa yi khallu ibadat al asnaam. Kan humma ma tabo da, Allah yi dammiruhum achan humma aznabo fooga.

Zibdet al kalam

Allah da’iman rassal al anbia achan yi guulu lel israiiliin kadar ya’abudu illa hu weheeda bas. Lakin al chaab ta’aso al anbia wa abo ma yassamohum. Humma abado al asnaam fi badal Yahwah. Humma hatta dawaro yaktulu al anbia al Allah ga’id yi rassiluhum lehum. Lakin al anbia dol ga’idiin da’iman yi kallumu fi chey al yi khus Allah wa Allah da’iman ga’id yi chif lel anbia hagga. Al anbia dol khaboro al chaab le yi tub, kan ma ke Allah yi akhibuhum. Be da kulu, Allah wa’adahum kadar hu bi rassil lehum al Masih.