32. Isa al Masih dawa mara mardana wa rajil muchotin

Al gissa di ti guul chunu?

1. Chunu al cheytan ga’id bi sawi fi nadum al hu dakhal fooga?

   Al chetytan anta gudura le nadum da lahaddi mafi nadum akhar al yagdar yalzama. Cheytan khalla yasurukh leel wa nahar wa yamchi aryan wa yi jarri nafsa bel hajar (32:3, 32:4).

2. Chunu kaan usum al cheytan al ga’id fi dakhil nadum?

   Usum al cheytan kan “jech” achan humma chawatin katiriin (32:6).

3. Al chawatin talabo min Isa al izin le yi sawi chunu?

   Badal yamurgu min al hille, al chawatin talabo izin min Isa al Massih le yadukhulu fil khanazir (32:7).

4. Chunu hassal fi wakit al chawatin dakhalo fil khanazir?

   Kullu khanazir al adaduhum alfeen (2000) dafogo fi bahar wa alme akalahum (32:8).

5. Nas al hille gaalo chunu le Isa wakit humma chafo al nadum ligia al afe wa simiyo kadar al khanazir mato?

   Achan nas al hille kano kayifiin min Isa wa talabo minna yamchi fi hillituhum (32:10).

6. Al mara al ga’ide lubal nas al katiriin; muchkiltaha chunu?

   Al mara di mardana ga’ide ti dafig dam takhriban atnachar(12) sana. Kamalata gurusa katiir le talga afe maa dakatir kutar wa lakin mafi wahid minnuhum al gidir yi dawiha. Badal da, dahaba maradaha zaad (32:13).

7. Be nizba lel mara, chunu al yagdar yi dawiha?

   Al mara fakkarat kadar hi talga afe kan hi gidirat ti lammis khalag hana Isa al Masih (32:14).

8. Chunu hassal wakit al mara di lammasat Isa?

   Wakit hi lammasata tawali al dam wigif. Wa fi wakit da, Isa hassa kadar gudura marag minna wa sa’al yatu lammasani (32:14, 32:15).

9. Be nizba le Isa, chunu kaan al sabab le mara di talga al afe?

   Isa gaal lel mara kadar imana bas najjaha. Hi ligat al afe achan hi amanat kadar Isa yagdar yachfiha (32:16).

Al gissa di maanataha lena chunu?

1. Kikef al chawatin ga’idiin yaamalo maa rajil al muchotin da?

   Al chawatin dol, kaano yi azzubu wa yi ayibu nadum al muchotin da. Humma khallo ga’id yi sawi chey al ma adil hatta ga’id yi jarri nafsa. Wa yasurukh leel wa nahar min al waja. Al chawatin yi dooru yi dammuru chaab al Allah Khalagahum.

2. Al gissa ti wassif kadar Isa inda gudura foog al chawatin. Al gudura di kikef?

   Isa al Massih inda gudura le yi ammir lel chawatin yamurgu min al rajil. Hu kaman inda gudura yi hadid le chawatin bakan al yagdaro yamchu fooga ba’ad ma yamurgu minna. Isa al Masih kaan yagdar yi rassil al chawatin fil jahannam. Al chawatin kafo kadar Isa yi sawi chey da. Achan ke da, humma sa’alo Isa le yamchu yadukhulu fil khanazir.

3. Mala nas al hille talabo min Isa yamchi fi hillituhum?

   Al nas kan ga’idiin foog al maal al khisiro be sabab khanaziruhum al akalatuhum alme, lakin ma ihtamo kadar al rajil da ligi afe min al chawatin. Humma talabo le Isa yamchi fi hillituhum achan humma anta khima le maalum ziada min khimat al insan.

4. Mala Isa gaal rajil al ligi min al cheytan yamchi beeta?

   Al rajil dawar yi tabi Isa wa yabga tilmiza. Lakin Isa gaal leya khalli ussut usrata wa yi kun tilmiz fi libbuhum. Nas al hille tarado Isa. khalas Isa gaal lel rajil da khalli yagod fi beeta le achan hu yagdar yi kalim le nas al ga’idiin jamba fi Isa ba’ad hu yamchi min al hille.

5. Mala Isa al Masih talab min al mara ti hajji be chey al hassal laha?

   Isa chaffa al mara achan hi amanat beya. Lakin Isa dawar battan kadar nas al akhariin kulu yi amunu beya. Be sabab da, Isa ma khalla al mara talga la afe bel achir. Badal da, hu talab minnaha khalli ti oori nas kullu kikef Isa anta al affe. Be tarikha di, wassafat nafisa kadar hi tilmiza.

Zibdet al kalam

Isa al Masih chaffa naseen al kaano tabaniin bilhain. Rajil muchotin al mafi nadum al yagdar yalzama. Mara al indaha dam ga’id yi dafig wa mafi dictor al yagdar yi dawiha. Isa kaan inda gudura le yachfihum tawali al itneen. Lakin, Isa ma chaffa ayyi wahid minnuhum bel achir. Hu tarrad al chawatiin min al rajil le yadukhulu fil khanazir le achan yi mutu fi alme. Khalas, kullu nas al hille simiyo kadar hu chaffa al rajil da. Be nahya akhara, hu gaal le rajil al liga afe khalli yamchi beeta wa da’iman yanti khabar da le kullu nas fi chey al Isa sawa leya. Wa kaman, Isa ma khalla al mara talga al afe bel achir. Hu nadaha gidam al jamaa le achan hi tagdar ti guul le nas kullu kikef Isa al Masih chaffaha. Isa ga’id yi jahiz al nas achan yi kunu gadiriin le yi bayunu lel nas kullu kadar hu kaan yatu wa chey al ga’id yi sawi lehum.